Bihar gure eskualdeko bertsolariekin izango duzu zita Sopelako Kurtzio Kultur Etxean. Honako bertsolari hauek ibiliko dira kantuan, Miren Loizagaren esanetara:
Beñat Vidal
Peru Vidal
Itxaso Paia
Jone Uria
Zita, bihar, 19.30etan, Sopelako Kurtzio Kultur Etxean. Bihar arte!
Aurreko igandean, Bizkaiko Txapelketako azken aurreko kanporaketa jokatu zen Igorreko frontoian. Bertan, gure eskolako Beñat Vidal eta Joanes Igeregik abestu zuten.
Gure eskolakideak ederto ibili ziren eta maila ona dutela erakutsi zuten. Saioko irabazlea Miren Amuriza izan zen. Orain arteko puntuaziorik altuena lortu berriztarrak.
Saioa orain arteko biziena izan zen. Bertso onak zein umoretsuak entzun genituen.
Beñat eta Joanesi elkarrekin abestea egokitu zitzaien zortziko nagusian. Hona hemen gaia: Beñat, 30 urte daroazuz eskola berean irakasle. Gaur, Joanes irakasle hasi berriaren lehenengo eguna da. Eskola amaituta alkartu zarie. Hemen Beñaten lehen bertsoa:
Klasera sartu eta aurrean
24 mutil neska,
izango zendun gela barruan
sekulako oihu festa.
Lehenengo eguna holakoa da
eta etzaitela kezka,
hasieratik Joanes gogor
egingo zenien, ezta?
Eta hauxe Joanesen erantzuna:
Benetan gogor egin dudanik
Beñat etzazu ba uste,
ta oihuak baino ez ditut jaso
nire azalpenen truke.
Egun bat baino ez da pasatu
ta jada utziko nuke,
nola demontre aguantau duzu
zuk 30 urte?
Gauzak horrela, honakoa azken emaitza:
Miren Amuriza 446,5
Peio Ormazabal 392
Eneko Abasolo 365,5
Beñat Vidal 333
Ortzi Garitano 331
Joanes Igeregi 327
Gogoratu hurrengo saioa, igandean izango dela, Erromoko Gobela Polikiroldegian, 17.30etan. 500 toki baino ez daude, eta joateko asmoa baduzue, sarrerak www.bertsosarrerak.eu webgunean eskuratu ditzakezue.
Oharra: Argazkia www.ukberri.net webgunetik hartua da.
Igandean gure azken bi kartutxoak erreko ditugu! Joanes Igeregi eta Beñat Vidal izango dira kantuan Igorren. Honako bertsolari hauek izango dituzte kantukide: Miren Amuriza, Eneko Abasolo “Abarkas”, Peio Ormazabal eta Ortzi Garitano.
Zita, igandean, Igorreko Kiroldegian, 17.30etan. Egurra Joanes eta Beñat!
Uda igaro ondoren, bertso gosez zaudela??? Ez zaitez kezkatu! Udagoienerako prestatu zaitezte! Bizkaiko Txapelketa ate joka daukagu, urriaren 10ean Mungian hasiko da. Gure eskolatik zazpi bertsolarik lortu dute txapelketarako txartela:
BEÑAT VIDAL
JOANES IGEREGI
ITXASO PAIA
JONE URIA
PERU VIDAL
ARRATE ILLARO
FREDI PAIA
Guztiek abestuko dute azken laurdetenetan, Fredi izan ezik, azken txapelketan finalista izan zenez, finaulaurrekoetarako txartela dauka. Eta hauxe duzue egutegia datak gorde ditzazuen:
Urriak 10, Mungia:
Oihana Bartra, Xabi Enbeita, Iker Belaustegi, Itxaso Paia, Ander Elortegi eta Julen Sololuze.
Urriak 17, Balmaseda:
Joseba Artza, Jone Uria, Asier Legarreta, Julen Erezuma, Iñaki Iturrioz eta Lander Ibarluzea.
Urriak 24, Aulesti:
Mikel Goiriena, Ibon Ajuria, Gorka Ostolaza, Arrate Illaro, Xabat Galletebeitia eta Peru Vidal.
Urriak 31, Igorre:
Miren Amuriza, Abarkas, Peio Ormazabal, Ortzi Garitano, Joanes Igeregi eta Beñat Vidal.
Abenduak 5, Gernika (azken finalaurrekoa):
Fredi Paia.
Egurra kuadrilla!
Ostiralean burutu zen Uribe-Butroeko Txapelketako azken kanporaketa. Bertan, gure eskolako Peru Vidalek abestu zuen. Hirugarren postua eskuratu eta finalerako sailkatu da.
Finala maiatzaren 22an izango da, Derion eta bertan ere Beñat Vidalek abestuko du.
Zorionak Peru!
Beñat Vidalek Uribe-Butroeko lehenengo kanporaketa irabazi zuen ostiralean Fikan. 100 bat bertsozale egon ziren saioa entzuten eta 80 bat afaltzen. Beñat zuzenean sailkatu da Derion jokatuko den finalera, maiatzaren 22an izango da.
Zorionak!
Larunbatean aukera izango dugu San Nikolas plazako frontoian bertso-pilotako saio berezia ikusteko, bertsoa eta pilotaren arteko uztarketa.
Bertsotan Arrate Illaro eta Beñat Vidal izango ditugu eta pelotan, berriz: M. Gonzalez, Larrazabal, I. Etxebarria eta Martin II.a
Animatu eta hurbildu!
