Kategoriaren artxiboa: Sailkatugabeak

BESTEEK EGITEN DUTENAREN ZAIN

Asteburua fuerte hasi genuen Bihotza Gazte saioarekin, Bergara eta Gasteizetik osteratxoa egin genuen gure eskolako Fredi eta Xabi animatzeko.

Bergara

Izugarria da txapelketan batzen ari den jendetza eta Bergaran, berriro ere, jendea kanpoan geratu behar izan zuen.

Bergarako saioan Maialen Lujanbio izan zen garaile. Bizkaitarrek ez zuten egun ona izan. Etxahun Lekuek bostgarren postua eskuratu zuen eta Fredik seigarrena.

Hala ere, Fredik ale politak utzi zizkigun. Kartzelan, honako gaia egokitu zitzaion: Argazkilaria zara. Oraintxe iritsi zara gertakariaren lekura. Lanean hasteko unea da. Hauxe izan zen Fredik bota zuen lehen bertsoa:

Azken urteak Afganistanen
lanean ditut igaro.
Bonba auto bat lehertu da gaur
izugarria zeharo.
Hildako ugari dago lurrean
ta zaurituak luzaro,
niri begira negar daudenez
begien bistan akabo.
Nahiz nagusiei esan diedan
esaldi hauxe lehenago,
negatibo hauek gaur positibo
bilakatzerik ez dago.

Azkenean honela geratu ziren puntuazioak Bergaran:

Maialen Lujanbio 708,5
Aitor Mendiluze 680
Beñat Gaztelumendi 644,5
Jon Martin 619
Etxahun Lekue 608,5
Fredi Paia 596

Gasteiz

Eguraldi petrala, baina ALBEko tropak Gasteizerako bidea hartu zuen igandean. Bizkaitarrak gehiengo tabladu gainean. Bizkaitar batek eskuratu zituen puntu gehien, Miren Amuriza berriztarrak. Xabik bostgarren tokia eskuratu zuen. Saio polita egin zuen eta ale ederrak publikoaren gozamenerako. Sorpresaz beteriko saioa izan zen, faborito ez zirenak aurretik geratu baitziren.

Kartzelako gaian habanera ederrak bota zituen. Istorio polita josi zuen Xabik. Honela esaten zuen gaiak: Mezu hau jaso duzu mugikorrean: ez egon zain.

Oso zoriontsua naiz
ez dut gezurrik esango,
ni baino alaiagorik
ez da munduan izango.
Maleta ondo prestatu dut
prestatu buru ta zango,
Kuban beharko ditugu
bai hemengo ta bai hango.
Aireportura helduta
SMS bat sendo.
Ez nire zain egon arren
hori ez ote da tongo?
Nik itxarongo zintudan
badakizu oso ondo,
baina uste dut abioiak
ez duela itxarongo.

Gasteizen honela geratu ziren kontuak:

Miren Amuriza 655,5
Iñaki Zelaia 643,5
Arkaitz Estiballes 630,5
Unai Iturriaga 626
Xabi Paya 616
Maddalen Arzallus 588

Finalaurrekoetan bi itzuli izango dira. Lehen itzulian sei bertsolari eliminatuko dira. Momentuz, Fredi eta Xabik besteen saioetan besteek egiten dutenaren zain geratu beharko dute.

Hurrengo zita, igandean izango da, Hendaian. Bertan Jone Uriak abestuko du. Gogoratu ALBEk autobusa jarriko duela Hendaiara joateko. Gurekin etorri nahi izanez gero, mezu bat idatzi albegetxo@gmail.com helbidera.

Bergarako estekak:
Berria
Gara
Bertsoa.com
Txapelketa Nagusiko webgunea
Bertsoplaza
Ukberri

Gasteizko estekak:
Berria
Gara
Bertsoa.com
Txapelketa Nagusiko webgunea
Bertsoplaza
Ukberri

OSTIRALEAN BIHOTZA GAZTE

Utzi erantzuna

Murgilduta gabiltza txapelketan, baina saio klasiko batekin gatoz: Bihotza Gazte. Hiru bertsolari beterano izango ditugu kantuan, baina izenburuak dioen bezala, bihotza gazte dute eta ziur gaude saio itzela egingo dutela Kupela taldeak lagunduta.

Bihotza Gazte por Algortako Bertsolari Eskola II.

Bertso eta dantzaz parranda ederra bota nahi duzula? Zita ostiralean izango da, hilak 6, 21:00etan Algortako The Piper´s Irish Pubean.

Gogoan izan, larunbatean Fredi Paiak abesten duela Bergaran, Txapelketa Nagusiko lehen finalaurrekoetako saioa izango da eta igandean, Gasteizen, Xabi Paiaren txanda izango dela.

FINALAURREKOAK

Utzi erantzuna

Jakingo duzuen bezala, Txapelketa Nagusian ALBEtik parte hartu duten hiru bertsolariak finalaurrekoetara sailkatu dira.

Jada, badakigu non abestuko duen bakoitzak, zuen agendetan apuntatu itzazue datak:

Bergara, azaroak 7, Labegaraieta kiroldegia, 17:30

Aitor Mendiluze
Maialen Lujanbio
Etxahun Lekue
Beñat Gaztelumendi
Fredi Paia
Jon Martin

Gasteiz, azaroak 8, Europa pabilioian, 17:30

Unai Iturriaga
Miren Amuriza
Iñaki Zelaia
Arkaitz Estiballes
Xabi Paya
Maddalen Arzallus

Hendaia, azaroak 15, Beltzenia pilotalekua, 17:30

ALBEk autobusa jarri dut Hendaiara joateko. Etorri nahi baduzu, mezu bat bidali albegetxo@gmail.com helbidera.

Amets Arzallus
Jon Maia
Jone Uria
Aitor Sarriegi
Julio Soto
Onintza Enbeita

Gure bertsolariak animatzeko lehen zita Bergaran izango da datorren larunbatean, bertan, Fredi izango dugu kantuan.

3-0!

2 erantzun

3-0! ALBEko hiru bertsolari sailkatu ziren Txapelketa Nagusiko azken laurdenetarako eta hirurak lortu dute finalaurrekoetarako txartela. Atzo, Laudion, Fredi Paiak lortu zuen.

Atzoko saioan, Miren Amurizak lortu zituen puntu gehien, 655,5 eta ondoren Fredi sailkatu zen 649 punturekin. Inoizko saio erregularrena egin zuen Fredik. Esan daiteke saioak goia jo zuela Mirenek eta Fredik hamarreko txikian egindako lanarekin. Honako gaia jarri zieten: Zuk, Miren, bost urte daramatzazu zaharretxe batean bizitzen. Fredik gaur du bere lehen eguna, eta Mirenen gelan jarri dute.

Mirenek aipatu zuen gogaituta zegoela txoriekin hitz egiteaz eta Fredik honakoa erantzun zion: «Faltan botako duzu / txori eta kanta / gaur ekarri dizute / pajaro galanta».

Kartzelako gaia honakoa izan zen: Mila aldiz pentsatu izan duzu ez duzula berriro gezurrik esango, baina berriro esan duzu. Hau izan zen botatako azken bertsoa:

Hurrengo astean beste saio bat
hauxe da buruhaustea!
Zintzotasuna, fideltasuna
bikotearen eskea
ezin dut harri egin gorputza
ta titanio hestea
bertso kantuan ibili ezkero
sentitzen bainaiz askea.
Bikoteena epe luzera
beti izango da tristea
hipokrisia da aukera bat
represioa bestea.

Saioa bukatu eta puntuaketak itxaron genituen irrikaz. Bagenekin Jone Uriak eta Xabi Payak finalaurrekoetarako txartela ziurtatuta zutela. Lehen esan bezala, Fredik aurrera!

Aipatzekoa da Iñaki Aurrekoetxeak Berrian idazten duen zutabean ALBEri egindako aipamena: Bertso Eskola eraginkorraren saria ematen digu:

“Hiru kidek kantatu dute final-laurdenetan, eta hirurek egin dute aurrera. Konbentzioz erdalgune deritzogun horretan dihardu Algortako Bertso Eskolak, eta Txapelketa Nagusian Uriak eta Paiatarrek urratsen ari diren bidea nago bertsogintzaren historian eta, zergatik ez, euskalgintzarenean ere, aipamena merezi duela. Hiruk kantatu dute, baina atzetik beste hogeita hamahiru izan dituzte saiorik saio babesa ematen. Talde lan polita egiten ari dira.”

Beste sari bat eman dio Frediri, erregulartasunarena.

Txapelketako lehen fasea ezin hobea izan da gure eskolarentzat. Finalaurrekoetan egurra ematera joango dira Jone, Fredi eta Xabi.

ZORIONAK HIRUKOTE!

ZORIONAK ALBE OSATZEN DUGUN GUZTIOI!

Laudioko saioari buruzko estekak:

Berriako kronika
Iñaki Aurrekoetxearen analisia
Gara
Deia
Txapelketa Nagusiko webgunea
Bertsoa.com

DEZIMA TAILERRA

Erantzun 1

Euskal Herriko Bertsolari Txapelketa Nagusiak atseden-astea duela aprobetxatuz, Algortako Bertsolari Eskolak dezima (Iberoamerikako inprobisazioaren estrofa nagusia) gertutik ezagutzeko ikastaroa antolatu du bere egoitzan urriaren 27ko iluntzerako. Azalpenak Wilson Saliwonczyk payadore argentinarrak emango ditu, gaztelaniaz.

Wilson Saliwonczyk eskarmentu handiko payadore argentinarra da. Buenos Aireseko 9 de Julio hiriko inprobisatzaileak munduko hainbat bazter bisitatu ditu bere gitarrarekin: Alemania, Bolivia, Ingalaterra, Frantzia, Peru, Suitza…

Edukiak

Dezima Iberoamerikako inprobisazioaren tradizio gehienetan errotu den estrofa da. Ikastaroan, bere egitura dinamikoa aztertzeaz gain, dezimaren eta oro har inprobisazioaren zoko esanguratsuenak azalduko ditu Saliwonczykek. Aztergai nagusiak zazpi izango dira:

Dezima zerotik hasita: estrofaren eskema eta sorkuntza-teknikak.

Dezimaren barne azterketa: estrofen barneko antolaketa eta funtzionamendua.

Errima: pizgarri bihurtutako traba.

Aldez aurreko estrategia eskematikoak: oroimen librea eta oroimen lotua.

Inspirazioaren motorrak: piztu ezin direnak eta itzali ezin direnak.

Inprobisazioa, etenik gabeko lapsusa: “bururatzen zaidan lehen gauza” vs “autozentsura etengabea”.

Gogoa, beldurra, norberaren segurtasuna, lan ideologikoa.

Wilson Saliwonczyki buruzko informazio gehiago:

– Bideoak.

– Bat-bateko saioak.

– Bertso idatziak.

– Prentsa dossierra.

Gogoratu: urriaren 27an, 20:00etan Alday Patronatuan!

AUPA FREDI!

Utzi erantzuna

Azken laurdenetako azken saioa izango da larunbatekoa Laudion. Bertan erabakiko da finaulaurrekoetara pasatzen diren bertsolariak eta ziur gaude jendetza hurbilduko dela saioa.

Pasa den larunbatean bezala, ALBEk ordezkaritza izango du saioan. Oraingoan Fredi Paiaren txanda izango da. Bere hirugarren Txapelketa Nagusia izango da eta aurreko edizioetan bezala, finalaurrekoetara pasatzeko helburuarekin joango da.

Honako bertsolari hauekin lehiatu beharko du Fredik txartela lortzeko: Arkaitz Oiartzabal “Xamoa”, Iñigo Izagirre, Onintza Enbeita, Jon Martin eta Miren Amuriza.

Zita, larunbatean, hilak 24, arratsaldeko 17.30etan Laudioko Granja Kiroldegian.

Egurra Fredi!

LANGA GOI-GOIAN

Utzi erantzuna

Larunbatean jokatu zen Uztaritzen Txapelketa Nagusiko laugarren kanporaketa. Bertan, gure eskolakidea den Xabi Payak abestu zuen. Lan polita egin zuen eta eskuratutako laugarren postuarekin ziurtatuta dauka finalaurrekoetarako txartela. Saio honetan, nabarmen egin zuten puntuek gora.

Beñat Gaztelumendik irabazi zuen kanporaketa lan eta ale politak utzita eta Bergaran izango ditu zain Aitor Mendiluze eta Maialen Lujanbio.

Saioa bizia izan zen, aurrekoekin alderatuta, gora egin zuen puntuetan eta kalitatean ere. Xabik zortziko txikian eta kartzelan nabarmendu zen gehien.

Hau da zortziko txikian, Aitor Sarriegirekin batera jarri zioten gaia: Arropa erostera joan zarete, eta beti bezala, desesperatuta itzuli zarete etxera. Zuk Aitor dena daukazu handi, eta zuk Xabi, berriz, dena txiki. Honela erantzun zion Xabik Sarriegiri:

Lehenbizi probatu dut
L tailen saila,
gero, XLa
ez zan abantaila.
XXLa
sartzea ere zaila;
noizko egingo dute
XPren taila?

Txalo zaparrada itzela jaso zuten Xabiren ateraldiek. Ideiez gain, imintzioek lagunduta abestu zuen, hain ongi egiten dakien bezala.

Kartzelako gaian ia bertsolari denek jo zuten bide beretik: tratu txarrak jasandako emakume baten paperean sartu ziren. Honakoa zen gaia: Zerraila aldatzera etorri dira. Oraintxe eman dizute giltza berria. Horrela bota zuen Xabik azken bertsoan:

Orain malko direnez berriro
begietako makarrak
entzuten ditut bihotz barneko
zalantzaren deiadarrak.
“Damutuko zaizu hau seguru!”,
esaten zidan senarrak
baina geroni baino ez gara
geure erantzule bakarrak.
Horregatik bota behar ditut
gure etxeko giltza zaharrak
ea antzera galtzen ditudan
nire oroitzapen txarrak.

Lehen esan bezala, laugarren postua eskuratu zuen Xabik eta hementxe Uztaritzeko saioko sailkapena:

Beñat Gaztelumendi 669
Arkaitz Estiballes     661
Aitor Sarriegi           657
Xabi Paya              644,5
Unai Muñoa            615,5
Erika Lagoma         567

Bertan, komunikabideek argitaratutako berriak:

Bertsoa.com (saio osoa entzuteko aukera dago)
Bertsoplaza.tv (saioko bertsorik onenak entzuteko aukera dago)
Txapelketa nagusiko webgunea
Euskadi Irratiko “Hitza jolas” saioko kronika: 1.zatia eta 2.zatia
Berria
Gara

Zorionak Xabi!

XABI PAYAREN TXANDA

2 erantzun

Jonek utzi zigun aho zapore ezin hobea kendu ezinik ibili gara, eta orain Xabi Payaren txanda heldu da. Aurreko txapelketan finalaurrekoetara heldu zen eta ia oraingoan lortzen duen.

Uztaritzen izango da saioa, 17.30etan eta honako bertsolari hauekin lehiatu beharko du: Unai Muñoa, Beñat Gaztelumendi, Aitor Sarriegi, Arkaitz Estiballes eta Erika Lagoma.

uztaritze [1] por ti.

Animo Xabi!

ITZEL!

3 erantzun

Itzela, izugarria, borobila,… Adjektiboak falta zaizkigu azaltzeko gure eskolakide den Jone Uriaren saioa deskribatzeko.

Indartsu hasi zen zortziko nagusian. Oihana Bartrarekin egokitu zitzaion abestea. Aipatzekoa da aurreko bi ofizioak tonu serio batean joan zirela eta ofizio honetan umoretik jo zutela.

Saioko alerik onenak agian zortziko txikian entzun ziren. Oso bizi joan ziren ofizioak, baina batez ere Iñaki Gurrutxaga eta Jonek botatakoak izan ziren txalotuenak. Hau izan zen egokitu zitzaien gaia: Zuek bi lagun zarete. Uda herriz herri, festaz festa pasatu duzue. Jone, asteburu hontan aurreko asteburuko toki berera joatea proposatu dizu Iñakik. Baina zuk ez duzu nahi.

Eta hemen duzue transkribatuta txalo mordoa jaso zuen bertsoa:

Behar izan zenituen
zuk nire laguntzak,
hori ahaztu ote du
ba buruko kutxak?
Niri ez zaizkit gustatzen
mutiko giputxak,
hitz egin asko baina
gero soso hutsak!

Hamarreko txikiko saioan gorabeherak egon ziren, kartzelan gertatu zen bezala. Gaia oso irekia izan zen: Esku artean duzu sinatu beharreko papera. Bertsolari gehienek ezkontzaren bidetik jo zuten. Uxue Alberdik tratu txarrak jasandako emakume baten paperean sartu zen eta Jone Uria, berriz, ume bat adoptatuko duen ama baten paperean.

Saioa bukatuta, Jone Uria izan zen puntu gehien batu zituen bertsolaria eta horrenbestez, finalaurrekoetarako txartela eskuratu du. Hona hemen sailkapena:

Jone Uria           661,5
Uxue Alberdi       660
Iñaki Gurrutxaga 642,5
Oihana Bartra      612
Miren Artetxe      583,5
Odei Barroso      574,5

Komunikabideetan oihartzuna izan du txapelketaren hasierak eta bertan dituzue esteka batzuk:

Gara
Berria
Txapelketa nagusiko webgunea
Bertsoa.com (jada eskegi dituzte saioko bideo guztiak)
Euskadi Irratiko “Hitza Jolas” saioko kronika: 1.zatia eta 2.zatia

ZORIONAK JONE!

Gogoratu astearte honetan, hilak 6, bertso-eskola hasiko dela, 20.00etan Alday Patronatuan. Zuen zain egongo gara!

JONE URIA ZESTOAKO AZKEN LAURDENETAKO SAIOAN

Erantzun 1

Bertso gosez gabiltza bertsozaleok, baina Bertsolari Txapelketa Nagusia larunbatean abiatuko da Zestoan. ALBEk ordezkaria izango du saioan: Jone Uria.

Berarekin batera bertsolari hauek lehiatuko dira: Iñaki Gurrutxaga, Uxue Alberdi, Odei Barroso, Oihana Bartra eta Miren Artetxe. Saioa 17.30etan hasiko da Zestoako Gurutzeaga pilotalekuan.

Egurra Jone!

Gogoratu, bihar azken eguna da lanak bidaltzeko Balendin Enbeita bertsopaper lehiaketara !