EUS domeinua sarean da dogoeneko. Domeinu honekin euskarak eta euskal kulturak interneteko aterpe teknologikoa izango du eta gainera, internetek berezkoa duen aniztasuna sendotu eta hedatu ere egingo du. Horrela irakurri ahal izan dut puntueus webgunean; eta izen bera daraman fundazio edo elkarte honek kudeatuko du domeinua. Horrelako gauza baten faltan ginen hemen; era baten ala bestean asteburuak eman dituen albiste abertzaleak kudeatzeko tresna gisa ere ikusi dut oharkabean. Izan ere, Donostiatik ekin, Gernikatik pasa eta Elgetaraino zabaldu da bi egun hauetan geure aberriarenganako maitasuna. Eta eus enbaxadore berri eta modernoena guztiak kudeatzeko prest dugu.
Inaxio Kortabarriak jaso zuen Donostiako zerura ikurriña. Espainiako Gobernuak bandera espainolaren kontura ezarri duen ordenantzari erantzunez burutu zen ekintza hau. Garitano diputatu nagusiak izandako sinkopeak ustekabean giroa aldrebestu bazuen ere, Errealeko jokalari ohiak arro jaso zuen geure bandera mastan gora. Gernikan berriz, 1936 urtean izandako bonbardaketak ekarri zituzten gogora eta Elgetan garai hartan miliziano, errekete eta gudariek lubakietan bizitakoa antzeztu zuten. Ikusten duzuenez eus markak edo domeinuak badu zer hedatu, sendotu…
Euskaldunok apustu zaleak omen gara eta atzokoan Olasagasti aizkolari gazteak dirua jokatu zuen Irazu nerabearekin. Erraz poltsikoratu zituen xoxak Tolosako zezen plazan izandako apustuan. Behin idiak Nenuko xaboiez garbitzen zituela entzun nion Igeldokoari; teknika bikaina izateaz gain, beharbada, aizkorak ere Nenukorekin zorroztuko ditu, nork jakin. Amoztuta eta etsita ikusi ditut Bartzelonako zale eta jokalariak Tito Vilanova entrenatzaile ohia zendu osteko egunetan; halere, taldeak, omenaldi xume bat egin aldera edo, tinko jarraitzen du liga txapelketa eskuratzeko lehian.
Santu berriak ere gurtu dituzte Vatikanoan. Frantsizko Aita Santuak mirariak eginak omen dituzten beste Aita Santu bi kanonizatu eta santutu zituen igande goizean. Milaka eliztar bildu zen San Pedro plazan ekitaldia zuzenan jarraitzeko eta bertan, isil isilik, eus markaren ordezkaria den Etxegarai kardinal lapurtarra ere ikusi ahal izan zuten fededunek.
Aste Santua bukatu ahala Santu kontuak iritsi zaizkigu Erromatik. Ni neu berriz, asteri ohore eginez edo, Santa Polan izan naiz egun haizetsu eta eguzkitsuetan igerian. Lasaitasunez betetako egunak izan dira familiarekin gozotzeko izan ditudanak; hondarretan gelditu dira pala jokoan utzitako oinatzak baina aitzitik, gurekin ekarri ditugu eus domeinura, eguzki izpiek azalean utzitako arrastoak. Indar berrituta edo, San Prudentzio egunera heldu gara, alajaina. Eta orain San Eus… heure santu santakin konpon hadi…
Comments are closed.