Larunbatean ume, gazte, ez hain gazte, heldu eta guraso batu ginen Algortako Portu Zaharrean Hitzetik Hortzerako bertso-eskolen lehen txapelketan parte hartzeko.
Zortea izan genuen eguraldiarekin, Lorentzok mesede egin zigun bideo ederra grabatzeko. Denok abestu genuen, doinu desberdinetan eta oso giro ederrean.
Laster barru, ETBn ikusiko duzue zer nolako espektakulu polita prestatu genuen albekide guztien laguntzaz!
Pasa den ostiralean jokatu zen finala Bilboko Kafe Antzokian. Bi kanporaketa irabazi eta gero, Ipar Uribeko taldea finalera iritsi zen. Aurkari bezala, Lea Artibaiko taldea izan zuen.
Txikien mailan, nahiz eta 3 puntugatik galdu ez zen oztopoa izan nagusiek 29 puntuko aldea ateratzeko eta sariketa Algorta aldera ekartzeko.
Aipatu beharra dago, bosgarren aldia dela Ipar Uribeko taldeak sariketa irabazten duela.
Ipar Uribeko taldean parte hartu duten bertsolariak gure eskolako Imanol Uria, Inazio Vidal, Peio Arondo, Maddalen Markaida, Itxaso Paia, Jone Uria, Peru Vidal eta Arrate Illaro izan dira.
Zorionak danori!
Bertso eskola bat zer den, ez dizugu argituko
(hori teoriazaleek egin behar lukete, guk uste). Algortako Bertsolari Eskola
zelakoa den, bai ostera. Bertsolaria dugu oinarri eta helburu. Historia
apur bat badugu atzean. Orainean, egia esan, ez gabiltza txarto. Benetako
altxorra, baina, etorkizunean kokatzen gabiltza. Asmatuko ahal dugu!
Webgune honetan zer dagoen, hasierako izenburuek esango dizute. Zer ez dagoen,
berriz, zuk zeuk sumatuko duzu aztertu ondoren eta, guk ere jakin dezagun,
gurekin kontaktuan jartzeko bidea ere eskaintzen dizugu. Erabili harremanbide
hori arrenkura barik!
Bertsozalea bazara, behin baino gehiagotan egingo diguzu bisita. Horretan
seguru gaude. Baina gu bezalako bertsomanoa bazara (terminoa ez da peioratiboa;
guk behintzat harrotasunez darabilgu), gaur bai eta bihar ere bai ibiliko
zara gure webgune neurtu asmoko, errimatu gurako eta musikatu beharreko
honetan zehar.
Izan ere, ohiko atal egonkorrez gain, gure inguruko azkeneko berri jakingarriak
gertatu ahala eskegiko baititugu beti eguteran egon nahi lukeen eskegitoki
informatiko honetan.
Baina ez lotu atartean, sartu barrura beldur barik!