Zaleak atera izan balira zelaira…

Data: 2009(e)ko maiatzaren 14a Egilea: marijo

Ez naizela futbolzalea, eta horregatik ezin dudala ulertu “atzokoa”.
Horixe esan dit ohe lagunak gaur goizean Valentziatik deitu didanean.
Ez, ez naiz futbolzalea, baina parrandazalea bai, eta ni ez nintzateke hotelera aurreikusitako ordua baino lehen itzuli izan, han egon izan banintz.
Baina, bitxiena da, jakin banekiela Athleticek irabazi ezean, berea ez zela parranda osoa izango, eta damutu ere egingo zela hotelean logela bat gehiago ez hartu izanaz.
Hor ere ez naizela futbolzalea esan dit berak; ez dela gauza bera galtzea, edo atzo Athleticek galdu zuen moduan galtzea. Kontua zer izan da, baina, Athleticek ez zuela ondo jokatu ala Bartzelonak oso ondo jokatu uela: biak, erantzun dit.
Aitortu behar dut pena sentitu dudala. Hainbeste gogokin itxaroten egon ostean, sarrera erosteko aukera irabazi ostean zozketan, astebeteko oporrak hartu ostean, lagunekin plan itzela egin ostean… Baina Anjel Lertxundik ondo azaldu zuen moduan Demasa izan da. Hala ere, eta bera etorri bitartean, balkoiko banderak, baina-palu ta guzti, hortxe segituko du.

Kategoriak Ispiluari begira | Etiketak , | 3 iruzkin

Gobernu berriak webgune berria

Data: 2009(e)ko maiatzaren 12a Egilea: marijo

Zein da gure gobernua?
A aukera
B aukera

Jaurlaritzaren webgune ofizialak bere horretan segitzen duen bitartean, Lopezek bere propioa ireki du; euskarazko bertsioa baduen arren, Eusko Legebiltzarrari jarraituz, izen ofiziala gaztelerazkoa aukeratu du: “gobiernodecambioeneuskadi”. Zaharrak, oraindik martxan denak, “euskadi” izena zuen.

Kategoriak Eusko Legebiltzarra, Politika | Etiketak , , | 4 iruzkin

Lopez lehendakariaren erronka?

Data: 2009(e)ko maiatzaren 11a Egilea: marijo

ASTELEHENEKO GOIENKARIA, 2009-05-11

Pedro Ugarteri irakurri
nion zapatuan, Paisen, Patxi Lopez lehendakari
berriak, Axular izan zuela gogoan inbestidura saioan eta “Axular
herri honek eman duen idazlerik onenetakoa dela… Baina, ze herritaz
ari gara? Axular goi-nafarra izanik Lapurdin bizi eta hil zen. Ez dakigu
lehendakariak zerbait esan nahi izan zigun bera gogora ekarrita. Ziurrenik
ez”. Aintzane Ezenarrok egunean bertan esan zion
Lopezi “poztu egiten gara Pedro Axular zure herriko
erreferente bezela izendatu izana, horrek erakusten digulako zuentzat
ere Euskal Herria existitzen dela”. Ez dakigu nork esan zion Lopezi
Lauaxeta, Sarri eta Axular gogoan izateko Legebilzarreko
inbestidura saioan, ezta Kirmen Uriberen olerkia irakurtzeko
lehendakari karguari zin egiteko ekitaldian. Jaime Otamendik
elkarrizketatu zuenean argi esan zuen EAEko lehendakariak “euskaraz
gehiago hitz egiten den lekuetan gazteleraz gehiago ikasiko da eta gazteleraz
hitz egiten denetan, euskaraz gehiago ikasiko da. Hezkuntza sistemaren
helburua da derrigorrezko bigarren hezkutzaren amaieran neska-mutilek
euskaraz zein gazteleraz jakitea”. Erronka badauka PSEk Basagoitiri
hori ikustarazten.

Kategoriak Euskararen patria, Eusko Legebiltzarra, Politika | Etiketak , , , , , | Utzi iruzkina

Athleticen lehoi ye-yea

Data: 2009(e)ko maiatzaren 8a Egilea: marijo

P1020028

Ezidazue esan eztenik ye-yea Atheticen lehoia. San Mamesen dagoena baino, bai behintzat.
Hau Gernikan dago, nire etxe aurreko bakoi-artean. Permanente eta guzti dotore-dotore jantzi dabe datorren asteko finalaren zain.

Gurean (esateko modu bat da, ze neria balitz etxia diskusiño galanta izango neban banderian jabiakin), aldiz, baina-palu bat aprobetxauta, bandera dago. Kaletik pe dezente ikusten dala hitza emoten dotzuet.

balkoia-athletic-2

Kategoriak Ispiluari begira | Etiketak , | Utzi iruzkina

Patxi lehendakari

Data: 2009(e)ko maiatzaren 7a Egilea: marijo

“Oye, chica! Quítate de ahí que no vemos!”.
Gernikako juntetxeko ate aurrean entzun dudan lehenengoa. Bigarrena: txaloak. Baina segiduan “que no! que ése no es! que ése es Lazcoz!; bueno, pero no importa, también es nuestro!”.
Egia da antzekotasuna badaukatela, baina hainbesterako…

Pleno aretora sartu eta lehenengo ikusi dudana: medalla mordoa! Tierra, mar y aire! Une batez “cuerpo a tierra” egitea otu zait, baina ez naiz ausartu;-)

Jende asko, gorbata mordoa, leku gutxi, estu-estu guztiak… Ta, MariaTeresaFernandezdelaVega… Ze argal dagoen emakumea!

Ikustekoa izan da Gernikakoa. Sekula lehendakari kargu hartze baten egon barik nintzen, eta gaurkora ere ez joateko asmo sendoa nuen, baina lana lana da;-(

Azkenean, baina, pleno aretotik atera denean lehendakari berria, bere karguari zin egitera, humillatu barik, alde egin dugu juntetxetik; Kirmenen testuak berari entzutea nahiago dut.

Kategoriak Eusko Legebiltzarra, Politika | Etiketak , , | Iruzkin 1

Ikusteko dago

Data: 2009(e)ko maiatzaren 3a Egilea: marijo

Berriako politika arduradun Pello Urzelaik Jose Antonio Pastorri egindako elkarrizketaren sarrerakoan idatzitakoak atentzioa deitu zidan atzo: “Bilboko bulego berrian, Sabin Etxearen kale berean, erantzun ditu BERRIA-ren galderak”. Inora ez doan informazioa da, baina morboa badauka; jakinda gainera orain arteko sailburuetako asko han hartuko dituztela, Sabin Etxean. Agian, EAJ eta PSEren arteko elkarlana hortxe inguruan hasiko da? Ikusteko dago. Dena dela, Correoren azala askoz sinpatikoagoa zen. Begoña nahikoa ez eta, Bilboko gotzain Ricardo Blazquez eta Donostiakoa Juan Maria Uriarte ageri ziren Josu Jon Imazek zuzentzen duen enpresak patrozinatzen duen Athleticen elastikoa erakusten. Gogora etorri zait: Jaunak eman, Messi-as-Jaunak eraman. Ikusteko dago.
Bihar, berriz, bi hilabete eta lau egun beranduago, lehendakari berria izango dugu: Patxi Lopez bozkatuko dute Basagoitiren neska-mutilek. Ikusteko dago, baina bobernu berriak egingo duen politika; baita Pastorrek atzo zioena: “Gu ez gara joango euskararen kontrako politika batera”. Ikusteko dago.

Oharra: Asteleheneko Goienkaria tokatzen zitzaidala-eta, idatzi nuen atzo hau, horregatik daude izen propioak beltzez eta da asteburuko kontuak gogora ekarri. Baina datorren asterarte etzait txanda tokatzen; hala ta be, idatzita neukanez, hona ekartzia pentsau dot.

Kategoriak Politika | Etiketak , , , | Utzi iruzkina

Horrek bai atzekaldeak!

Data: 2009(e)ko apirilaren 28a Egilea: marijo

DV

Wayomig poz-pozik dago!
Azkenean lortu du Bruni anderea bisitan etortzea. Ta, egunkari guztietako zuzendari eta editoreak zoratu egin dira! Frantzia eta Espainiako agintari nagusien bileratik aipagarriena Leti eta Bruniren
ipurtaldeak dira! Gora kazetaritza informatiboa! Noizko agintari “ederrak” egunkarietako azaletan? Non daude gure begiak alaitzeko “bikote” ederrak?
Ikaragarria.

Kategoriak Politika | Etiketak , , | 4 iruzkin

Zer dago laino artean?

Data: 2009(e)ko apirilaren 24a Egilea: marijo

lainoa3-20090423

Gaur ez, beranduago etorri naizelako Gasteizera. Baina atzo goizean, Barazarrera igotzeaz batera, pare bat metro aurrerago zegoena antzemateko ere nahikoa lan izan genuen gidariok.

Horrelakoetan, laino artetik autoak eta kamioiak beharrean (ordu horretan nahi baino gehiago), besterik agertuko ote daitekeen pentsatzeko joera izaten dut. Hobe izaten da adi joatea, aurrekoak frenatu duela igarri orduko, haren gainean egoten baizara; baina, gertaera katastrofikoetan barik ametsetarako aukera ere ematen du egoera horrek. Autoa ezin duzu geratu; aurrera egin beharrean zaude, derrigorrean; begiak gehiago zabalduta ere berdin ikusten duzu (ezer gutxi); pareko bidetik datozen ibilgailuen argiak ñimiak zerbait badatorrela ohartarazi orduko pare-parean aurkitzen duzu trailer erraldoi bat… Hala ere, ematen du amesteko aukera: tunel luze eta amaigabeetan sartzen zarenean errepikatzen den sentsazio bera (Eskoriatzarainoko autobide berria hartu neun joan zen astean Gasteiztik, eta… ze tunel amaigabe; 3 km lurpean!). Ta, gainera, laino itxi horrek normalean beldurrezko filmetan erabili ohi izaten den errekurtsoa izan arren ere, hortxe etorri nintzen zerbait ederra aurkituko nuela lainoaren bestaldean. En pin… amestea debalde izaten denez, ba atzoko Gasteizerako bidea horretan eman nuela.

Kategoriak Ispiluari begira | Etiketak , , | Utzi iruzkina

Ta zuk? Zuk ez duzu zure burua engainatzen?

Data: 2009(e)ko apirilaren 20a Egilea: marijo

Mentiras-y-gordas-b

Mentiras y gordas. Pelikula horixe ikusten izan ginen atzo arratsaldean. Gazte asko egon zen aretoan; gurasoak gutxi. Justu bezperan SER irratian entzun genuen zela guraso batzuk euren seme-alaba gaztetxoekin pelikula ikustera joan ziren. Aita batek pelikularen hasieran semeak hartu eta aretotik atera zela kontatu zuen. Pelikula ikusi ostean ulertu dut; agian bere semeak gaztetxoegiak ziren. Hala ere, gurasoentzako ez dago txarto filma; gehiegikeriak era guztietakoak ageri diren arren, ez dago batzuen errealitatetik oso urruti; beti ere Euskal Herrian txortan ez dela egiten dioen esaera hori alde batera lagatzen badugu, jakina!

Badira urte batzuk nire ohe laguna antzeko giroan ezagutu nuela. The Organizationek Txitxarroa lehertarazi aurretik izan zen hori. Ez dut sekula gustuko izan musika ‘zera’ hori, baina aitortu behar dut, begiak itxita entzun ezkero, halako ‘zera’ bat sentitzera iritsi zaitezkeela, zela da hori: subidon, subidon subidon!!!!

Aspaldian ez dut horrelako dantza leku bat bisitatu; nahiago dut rokanrolla eta popa. Baina gustatu zitzaidan Mentiras y gordas filma. Eta amaiera aldeko irudi espresioa, Aste Santua pasa berri dela kontuan izanda, oso aproposa iruditu zitzaidan. Herrietan ez, baina euskal hirietan egon badira horrelako giroak, esku-eskura gainera. Gehiegizkoa bada ere filma, Callejeros ikusi baitugu gehienok Cuatron, eta hango gazteak ez dira filmakoak bezain ‘ederrak’, ratu bat pasatzeko modukoa iruditu zait. Kultura ministra berriak idatzi ei du filmaren haria, Alfonso Albacete eta David Mencesekin batera. Berak alaba bi ditu; jakin nahiko nuke alabek amak imajinatu duen errealitate horri buruz ze iritzi daukaten.

Ze, pelikulan bertan egiten diote elkarri galdera pertsonaietako bik: “Ta zuk? Zuk ez duzu zure burua engainatzen?”.
Auskako!

Kategoriak Sailkatugabeak | Etiketak , , , , | Utzi iruzkina

Ni ere ‘Ezenarroren sokakoa’ naiz

Data: 2009(e)ko apirilaren 12a Egilea: marijo

The organizationen azkeneko komunikatuan irakurri daitekeenez: “Hauteskunde antidemokratiko horietan Aralarrek emaitza ttipiak baina
gozoak jaso ditu ilegalizazioaren lepotik. Etsaiaren estrategia
errepresiboan Aralar ezinbesteko tresna bilakatu da independentismoa
txikitzeko asmotan. Zer lotsa ez lukete sentitu behar «ezker abertzale
berria» aldarrikatzeko ezker abertzalearen ordezkariak espetxeratu eta
egun batzuetara. Zer lotsa ez lukete sentitu behar ezker abertzalea
botoz hustu, ordezkatu eta Gazteizko besaulkietara eta bertan irautea
beste asmorik ez duten Ezenarroren sokakoek Rubalcaba eta
Conde-Pumpidoren txaloa eta zorion publikoa jaso dutenean: penagarria.
Ezker abertzalea etsaiarengatik gogor zigortua izango da bere
konpromiso eta borrokagatik, baina Aralar izenondo garratzez zigortua
izango da herri honen historiagatik.”

Eta hau irakurri ostean, nire artean esan dut, ba ni ere Ezenarroren sokakoa naiz; are gehiago, Aintzane Ezenarroren sokakoa naiz. Argi hitz egiten duen politikaria dela erakutsi duelako, sinistu egiten duen horretan lan eta lan egiten duelako; berarekin lanean daramadan denboran egiten duen horretan sinisten duela ikusi dut, konbentzituta dagoenean halaxe erakusten du eta azpi jokorik gabe aritzen da politikan, beti aurrez, uste duena esaten eta ezer ezkutatu gabe. Bere diskurtsoak, iritziak, defendatzen duenak lekurik ez duela ikusten duenean inolako konplexurik gabe etxean geratuko den politikaria delako. Baina gaur gaurkoz bere burua ezker abertzalean kokatzen duenak “Rubalcaba eta
Conde-Pumpidoren txaloa eta zorion publiko”tik haratago begiratzen jakin behar du; bere burua ezker abertzaletzat duenak The Organizationen txalo eta zorion publikoaren menpe egotetik ez du aurrera egingo; ikusi dugu, ikasi dezagun.

Kategoriak Sailkatugabeak | Etiketak , , | Iruzkin 1