Terribleak dira egunotan ikusten ari garen Ukrainako irudiak. Salagarriak dira beti gerrak, salatzekoa armen erabilera, kondenatzekoa guda oro. Baina egunotan ikusten ari garen irudiak, gizonak bulegoetan bilerak egiten, eta emakumeak ihesean seme-alaba, aiton-amona eta gaixoekin…
Gizonak gerran geratzen direla, edo gerrara doazela ari zaizkigu kontatzen Errusiak Ukraina inbaditu zuenetik. Gerra legeak aginduta, 18 eta 60 urte bitarteko gizonezkoak derrigortu dituzte gerrara joaten. Eta, ondorioz, gainerako herritar guztiak derrigortu dituzte ihes egitera.
Gizonek egiten dituzte gerrak; gizonek deklaratzen dituzte gerrak. Eta bitartean ari gara ihesean doazen milaka emakume ikusten, milaka ama, arreba, emazte, lehengusu, loba, iloba, amama, birramama…
Gizonak gerrak egiten dituzte eta emakumeak ihes egitera kondenatzen.
