BERRIRO RUTINA

Data: 2006(e)ko urriaren 6a Egilea: begietatik

Asteazkenean hasi nintzen lanean. Aurten ez dakit uneren batean gelditu naizen, baina beno, esan daiteke beste “ikasturte” bat hasi dela nire bizitzan.

Uda gogorra izan da: kanpamendua, ikastaroa, … Urte osoan jo ta ke ibili eta gero, nire gorputzak eta batez ere buruak, ondoegi onartu dute zama hau.

Orain zama handiagoak datoz: ikasketak, lana, Bizkaiko Txapelketa (badirudi abestuko dudala, baina ez… Nahikoa izango dut lagunak animatzearekin, ez dela lan makala), proiektu asko, skouta, …

Zin egin diot nire buruari denbora hartuko dudala niretzat. Gustokoak ditudan gauzak egingo ditudala (ez du esan nahi egiten dudana ez zaidanik gustatzen), pasiatuko dudala, hortik zehar ditudan liburuak irakurriko ditudala, lagunekin nahi baino kafe gehiago hartuko ditudala, … Promesa hutsak dira, baina aurten egi bihurtu nahi ditut.

24 urte ditut eta askotan nahi baino zama eta ardura gehiago hartzen ditut. Askotan inork ez dituelako hartu nahi eta beste askotan burugogorra naizelako!

Ezagutzen nautenek esango dute badela ordua horrela pentsatzeko. Pentsatzea erreza da (hein batean), baina gauzatzen joan beharko naiz.

Kategoriak Sailkatugabeak | Etiketak | 3 iruzkin

HIRUGARREN URTEURRENA

Data: 2006(e)ko irailaren 25a Egilea: begietatik

Hiru urte. Hitzak soberan daude.  Zauden tokian zaudela, ez zaitugu ahaztuko.

Goraintziak, Jago!

placa_fofi_

Kategoriak Sailkatugabeak | Etiketak | 2 iruzkin

ALGORTAKO SCOUT TALDEAK 30 URTE

Data: 2006(e)ko irailaren 10a Egilea: begietatik

Talde osoa

Talde osoa

Argazki erakusketa

Argazki erakusketa

Orain egun batzuk esan nuen, begiak itxiko nituela denboraldi batez. Baina atzokoa eta gero begi bat ireki dut. Atzokoak artikulu bat merezi duelako (baina nire erabakiarekin irmo jarraituko dut).

Algortako Scout Taldeak 30 urte betetzen ditu aurten Basagoitiko lokalean ezarri zenetik, berez, 50 urte inguru izango ditu. Aspaldi hasi ginen bazkari bat egin behar genuela jende guztia batzeko eta egi bihurtu zen atzo.180 pertsona Bihotz Alai plazan bazkaltzen!

Argazki erakusketa egin genuen, 200 argazki urte hauetako historia errepasatzeko. Asko ez ziren ezagutzen argazkietan urte mordoa pasatu direlako je,je,je!

Giro ezin hobean joan zen eguna. Pena ezin izan geniela askori eskerrak eman. Garai horretako “gaztetxea” izan zen Etorkizuna (orain Algortako Scout Taldea), askoz ezagunagoa Etorki bezala. Esan daiteke Algortako gazte gehienak hemendik pasatu direla eta orain askoren seme-alabak daudela bertan.

Eskerrak emateko jende asko dago: Eugenio, Isidro, Andoni Azkue, Enano, … izen asko eta asko saiatu direnak euren denbora ume eta gazteekin ematen, aisialdi alternatibo bat eskaintzen.

Orain beste batzuk daukagu ardura, lan gatza garaiak aldatu direlako. Ume asko eta begirale gutxi. Badakigu garai beltzak datozela, baina atzokoak indarra eta gogoak eman zizkigun. Inoiz baino gehiago dena eman behar dugu, eta urte batzuk barru horrelako beste bazkari bat egin denak batzeko.

Eskerrik asko skouta posible egin duzuen guztiori!

Kategoriak Sailkatugabeak | Etiketak , | 3 iruzkin

BEGIAK ITXITA

Data: 2006(e)ko abuztuaren 26a Egilea: begietatik

Ez dakit zergatik, baina azkenaldian nire begiak itsu daude. Ez dago askorik kontatzeko. Daukadan apurra nire “disko gogorrean” gorde dut (gauza batzuk ezin dira azaleratu)

Ia hilabete eman dut kanpoan kanpamendua eta begirale ikastaroa kontutan izanda. Bihar Parisa noa oporretan (uste dut inoiz baino gehiago, oporrak merezita ditudala). Ziuraski handik gauza asko ekarriko ditudala kontatzeko.

Baina ez… Begiak itxi nahi ditut denboraldi batez. Atseden hartu nahi dut. Ez zaituztet aspertu nahi eta ez dut nahi nire burua aspertzea.

Beraz, denboraldi batez ez dituzue idatziak aurkituko.

Gero arte, adiorik ez!

Kategoriak Sailkatugabeak | Etiketak , | Iruzkin 1

SOTO EN CAMEROSEKO IBILERAK

Data: 2006(e)ko abuztuaren 22a Egilea: begietatik

Etorkizuneko begiraleak

Etorkizuneko begiraleak

Azkenean etxean! Onartu behar dut zaila egin zaidala egunerokotasunera ohitzea, baina…

Ia hilabete ibili naiz kanpoan kanpamendua eta begirale ikastaroa kontutan hartuta. Hogeitazazpi egun etxetik kanpo. Pentsatuko duzue ez dela ezer, baina jakinda oso etxezuloa naizela, gehiegi da. Hori bai: etxeko atetik sartu eta mundua jausi zitzaidan gainera. Zergatik? Ba ez dakit, agian hogeitazazpi egun horiek ederrak izan direlako eta oroitzapen on asko gorde ditudalako. Dena esan beharra dago, Soto en Camerosekoa ez zen ondo hasi… Arrastiko zazpietan geratuta geunden Algortan Navarretera joateko lotan. Ez genuen izugarrizko paliza sartu nahi kotxean eta bi egunetan egitea erabaki genuen. Baina ez… gabeko hamarretan atera ginen Algortatik! Kar, kar, kar! Behintzat ondo ezagutzeko parada izan genuen. Batzuk elkar ezagutzen genuen, baina beste batzuk ez. Sei euskaldun Errioxara, peligroooo!

Hurrengo egunean bai, heldu ginen Soto en Camerosera. Aurpegi ezezagunak, begirada galduak, beldurra, … Ez genekin nortzuk ziren, zer aurkituko genuen, … Klaseko lehen eguna bezala, baina beno…

“Bunkerrean” sartu ginen (bai, ia egun osoa ikasgelan sartuta hogeitamar pertsona), Gran Hermanoren antzekoa izan da, baina kamera barik.

Txarto hasi ginen, lehen astean mobidekin hasi ginen. Zergatik? Ba ez dakit, eta nahiago dut horri buruz ez hitz egitea. Dakidana txarto epaitu gintuztela, ezagutu barik. Dena konpondu zen eta normaltasuna izan zen nagusi falta ziren egunetan.

Positiboena han egindako lagunak izan dira. Badakit ikastaro batera joan nintzela, baina ez dut ia ezer ikasi. Begirale naiz orain urte nahikotxo eta gauza gehienak banekizkien. Betikoa, ez badaukazu paperik ez zara ezer.

Ikusita nola hasi genuen ikastaroa, ez nuen pentsatuko hain ondo bukatuko genuenik jendearekin. Lagun onak egin ditugu, une ederrak bizi izan ditugu eta pena merezi izan du.

Euskaldunok gure “marka” utzi dugu Soton! Bai, bai! Ez nuen pentsatuko, baina azken egunean negar eta guzti egin nuen. Oso sentimentala naiz, baina pena sentitu nuen handik joaterakoan. Lagunak utzi genituen han eta maitatuak sentitu ginen.

Onena, aste honetan Bilboko jaietan elkartuko garela!

  1. D: Euskal Power! Joan ginen bost horiek ezagutzeko parada izan dut. Ederto pasatu dut zuekin (aguantatu behar izan nauzue)! Eskerrik asko Xabi, Manex, Jani, Bego eta Erika! Chapeau!
Kategoriak Sailkatugabeak | Etiketak , | Iruzkin 1

ARGOTE 2006

Data: 2006(e)ko uztailaren 29a Egilea: begietatik

Lau gudariak

Lau gudariak

Koskorrak

Koskorrak

Oinarinak

Oinarinak

Azkarrak

Azkarrak

Orain bi egun bueltatu nintzen kanpamendutik. Ez osorik, lesionatu nintzen. Lesionatuta joan eta lesionatuago bueltatu, hori da hori pagotsa!

Hori bai: merezi izan du. Berrogei ume, lau begirale eta astean zehar etorri diren beste laguntzaile/marroidun/lagun. Ez nuen kanpamendu hau ikusten, zaila egiten zitzaidan pentsatzea ondo aterako zela. Baina atera da. Lan asko, negar gehiegi, baina garrantzitsuena umeak pozik bueltatu direla.

Konturatu dira gauza batzuk txarto atera direla, beste batzuk ondo, baina dena eman dugula eurak ondo pasa zezaten.

Gaur bertan Errioxara noa, begirale titulua ateratzera. Gogo barik: herriko jaiak dira, hanka ez daukat leloleriak egiteko, eskua oraindik sendatu barik, … Etxean hobeto egongo nintzateke, baina ezin naiteke atzera bota azken unean. Medikuak esan zidan reposoan egoteko. Nahikari Ayo reposoan? Kar, kar, kar ezinezkoa! Aberia handiagoa egingo dut, baina beno… Nahikari naiz.

Ondo pasa oporrak, ondo pasa jaiak eta pika bat hartu nire ohorean!

Kategoriak Sailkatugabeak | Etiketak , | Iruzkin 1

Data: 2006(e)ko uztailaren 17a Egilea: begietatik

Bai, bai, bai… badakit: zer egiten du honek oraindik hemen, larunbatean joan baziren skoutekoak kanpamamenduan? Lasaiiii, gaur bueltatzen naiz. Gaur aitite operatzen dute eta bisita egitera joango naiz ospitalera.

Urte gogorra… teorian atsedena dator, baina kontrakoa da nire kasuan. 27a arte kanpamenduan, gero begirale ikastaroa, abuztuan Parisera… Badakit egiten dudala nahi/behar dudalako, baina aurten ez dakit atsedenik hartzeko parada izango dudan.

Ikasturtea gogorra izan da zentzu askotan: lan asko, proiektuak garatu, liadak, marroiak, … baina gustora. Askok esaten dute beti ibiltzen naizela kexaka, beti dudala zeozer. Izan daiteke, baina zeozer badaut da, gauza askotan sartuta nabilelako. Zer egingo diogu… norbaitek altza beharko du herri hau, ez?

Bueltararte eta ondo pasa jaietan, nik ez dudala aukerarik izango.

Kategoriak Sailkatugabeak | Etiketak , , , | Utzi iruzkina

ALBEko IBILERAK

Data: 2006(e)ko uztailaren 6a Egilea: begietatik

Itxaso Paia, Ipar Uribeko txapeldun

Itxaso Paia, Ipar Uribeko txapeldun

Imanol Uria, EH-ko txapelketan

Imanol Uria, EH-ko txapelketan

Arrate Illaro, EH-ko txapeldun

Arrate Illaro, EH-ko txapeldun

Belabaratz aterpean

Belabaratz aterpean

Galtzak bete lan gabiltza bertso-eskolan azkenaldian. Urtero-urtero eskolarteko txapelketa eta bi urtean behin Bizkaiko Txapelketa. Bizkaikoarekin batera eskualdekoa dator, Ipar Uribeko txapelketa.

Lorpen asko lortu ditu eskolak txapelketa horietan: eskolarteko idatzizkoetan sari andana, eskolarteko bat-batekoan bi azpitxapeldun, Euskal Herrikoan txapela bat eta Ipar Uribekoan txapela.

Eremu erdaldun batean egonda, emaitzak oso onak izan dira. Helburua ez da txapelak lortzea, baizik eta umeak/gazteak zaletzea. Helburua lortuta dago, txapelak lortzen badira askoz hoba.

Urte emankor honi bukaera emateko, bertso-eskolako gaztetxu eta gazteak batu eta Errenteriara joan ginen asteburu pasa. Belabaratz aterpean egon ginen eta handik Hendaiako hondartzara.

Asteburu polita gaztetxu eta gazteak hobeto ezagutzeko (nahiz eta gehienak anai-arrebak izan…). Errepikatzeko modukoa.

Zorionak ALBE!

Kategoriak Sailkatugabeak | Etiketak | Utzi iruzkina

AGUR

Data: 2006(e)ko ekainaren 28a Egilea: begietatik

Gaur izan da “Bertatik Bertara” programaren azken emanaldia. Zergatik? Nork jakin… EITBko buruzagiek zergatik kendu duten.

Eguneroko gaiak, herritar xeheen iritziak, herrietako kontuak, gauza bitxiak, … Jende arruntarentzat eginiko programa zen, baina ikusleen gogoaren aurka kendu dutena.

Gehiago jarraitzen nuen Andoni Aizpuru aurkezle ibiltzen zenean. Gazteago nintzelako eta denbora gehiago nuelako telebista aurrean egoteko. Estitxu Fernandezen lana ederra izan da, goraipatzeko modukoa.

Kazetarien artean euskalki desberdinak entzun ditugu: bizkaiera, Bortzirietako euskara ederra, gipuzkera, … Goraipatzekoa zenbat kazetarien eskola izan den programa.

Tamalez, gaur azkena izan da. Gehiago etorriko diren? Ez dakit… Argi daukadana da, euskaldunok galera izugarria izango dugula “Bertatik Bertara” programaziotik kenduta.

Kategoriak Sailkatugabeak | Etiketak , | 3 iruzkin

DENA TXARTO DOANAREN SENTSAZIOA

Data: 2006(e)ko ekainaren 14a Egilea: begietatik

Askotan, maiz, sarritan dena txarto doanaren sentsazioa daukazu. Gauza bat bestearen atzetik etortzen da,eta gutxitan, onak izaten dira.

Aurpegi ona jarri behar izaten duzu jendearen aurrean, pozik zaudenaren itxura eman beharra dago. Baina umeak konturatzen direnean ez zaudela ondo, hor ez dago balio duen antzerkirik.

Malkoa izaten duzu lagun. Bakardadean, inor ez dagoenean inguruan. Negarrarekin zita egiten denean, intimoa izan behar du. Zita hauetan hobe izaten da bikote bakarra egotea. Zertarako inor gehiago gonbidatu?

Kategoriak Sailkatugabeak | Etiketak , | 4 iruzkin