Profilak mapan: tagzaniaren bidez

Data: 2006(e)ko irailaren 23a Egilea: ziztazale

Poliki baina ari naiz. Profilak, tagzaniaren bidez, munduan kokatzen
ari naiz. Aldapa bakoitzarentzat marka bat jarri dut mapan, aldapa
dagoen tokian, jakina! eta marka horren bidez profilaren argazkiraino
iristeko aukera dago.
Bestalde ezkerreko zutabean atal berri bat jarri dut: Argazkien ingurukoak bertan
bi sarrera daude, batak tagzaniako mapara iristeko aukera eskaintzen
du, besteak flickerreko nire argazkietara iristea ahalbidetzen
du, bertan ibilbideak eta profilak jartzen ari naiz. Baina lasai hartu,
oraindik ez ditut-eta denak jarri…

tagzaniapaste
Tagzania: ziztazale

Kategoriak Sailkatugabeak | Etiketak , | 2 iruzkin

Aldaketa garaia

Data: 2006(e)ko irailaren 21a Egilea: ziztazale

Goienakoek teknologia aldaketak egin dituzte, eta zaharretik berrira, bitakorara, eraman gaituzte.
Orain argazkiak jartzeko modua aldatu behar dugu eta flickr erabili behar dugu.
Horrek beste aukera batzuk eskaintzeko bidea ere
ematen du: profilak mapetan koka daitezke, tag bidezko bilaketak egin ahal izango dira… Ea guztion onerako den.

Kategoriak Sailkatugabeak | Etiketak , , | Utzi iruzkina

Aiako errege berria

Data: 2006(e)ko irailaren 1a Egilea: ziztazale

Abuztuko azken igandeko zitan ez genuen hutsik egin. Hemeretzi ziklistak hartu genuen parte Aiako erregetzako lehian. Hogei ere izango ginen Positibon pare bat egun lehenago lurrera erori izan ez balitz… Urte guztia egun horretarako entrenatzen jardun ondoren, erorketa txoro bat dela-eta (sorbaldan tendinitisa, buruan eta besoan puntuak…) parte hartu gabe geratu zen. Zer egingo diogu bada! Ea laster hasten den hurrengo urterako prestaketan.

Irteera ez zen beti bezala izan, hiru taldetan atera ginen, bakoitzak egin behar zuen denboraren arabera, talde bat edo bestea hautatu zuen: mantsoen egin behar zutenak lehendabizi atera ziren, bost minutura tartean ibiliko zirenak, eta handik bostera erregetzeren bila edo denbora ona egiteko asmo eta gogoa zeukatenak. Era horretan batzuek besteen berri izateko aukera izango genuela espero genuen, eta halaxe gertatu zen. Askoz ederragoa izan zen igoera.

Aurtengoan SupreThonyk ez du irabazi, hirugarren geratu da, eta errege berria Pipi da. Hurrengo urtean ea mantentzea lortzen duen. Errege orde ia-betikoa: Imamol. Norbaitek Imamolen taktika goraipatu zuen, alegia, superThonyren atzetik joaten laguntzeko Pipiren fitxaketa ezin hobea izan zela esan zuen. Baina, superThonyri aurrea hartzea lortu bazuen ere, Pipiren atzetik iritsi zen gora, eta beraz, berriz ere bigarren egin du… Ez dakit hain taktika ona izan den.

Argi dago Uberan fin entrenatu dutela aurten: Uberatarrek denborak hobetzea lortu baitute. Denbora onak egiteaz gain erregintza lortu du Maritxuk. Mari hirugarren lekura bidali dute, Fines ere Pirineotan gogor jardun baita.

Nik urte guztian zehar entzun beharko omen dut 40 minuturen bueltan egin nuela… Baina hurrengo urterako hobetzeko ez daukat zaila!

Bakoitzaren denborak hauek izan dira, lehenengo lauren denborak ikusgarriak!

  • Pipi 23:47 (estralurtarra!)
  • Imamol 25:20
  • Thony 25:28
  • JuanMartin 25:32 (ia podiumean sartu zen!)
  • Esnal 29:47 (eta entrenatu gabe…)
  • Gringo 32:22
  • Maritxu 38:49
  • Fines 38:56
  • Bohero 39:08
  • Mari 39:08
  • Ziztazale 39:08
  • Idoia 40:56
  • Imakatz 40:56
  • Xabin 43:49
  • Ibon 44:22
  • Nerea 47:23
  • Ixubi 47:23
  • Aran 53:18
  • Ainhoa 53:18
Kategoriak Sailkatugabeak | Etiketak , , , , , | Utzi iruzkina

Bonaigua

Data: 2006(e)ko abuztuaren 25a Egilea: ziztazale

Inguruko herriak eta bideak

Inguruko herriak eta bideak

Oporretan Lleidako Port de la Bonaigua igo nuen, ez nuen inoiz horrelako portu luzerik igo, baina ez zitzaidan gogorregia iruditu. Esterri d’Aneu-tik (950 m) irten eta 21 kilometro gorantz egin behar dira Port de la Bonaiguara (2072 m) iristeko. Batez besteko malda ez da gogorra, (% 5.3), Bidea luzea izan arren zoragarria da, nik ez nuen argazkirik atera, baina hemen igoeraren 14 argazki ikus ditzakezue.

Atsedenik gabeko ia 21 kilometroko bidea da, baina bidearen erdialdean lasaitu egiten da eta pare bat kilometrotan %2 inguruko malda erraza dago. Hala ere, horren ondoren berritutako zati bat dago, eta ia gehienetan bezala, berritutako zatia zuzena da, eta bertan dago maldarik gogorrena (ia %10). Hortik aurrera suge baten moduan bailaran gora jarraitzen du, malda gogorregirik gabe eta benetan ikuspegi polita eskainiz.

Nik bi saio egin nituen, lehenengoan ez neukan ideiarik zer nolako bidea zegoen, banekien 21 kilometrotara zegoela gaina, baina ez nekien 2000 metrotik gora zegoenik. Ez nuen uste kilometro horiek guztiak gorantz izango zirenik, eta bi orduko bueltaxka emateko asmoekin abiatu nintzen. 17 kilometro egin ondoren Mare de deu de las Ares (Katalanek, nonbait, ez dute sinisten birjina zenik! Ez dira tontoak, ez horixe.) ermitara iritsi nintzen, bost kilometro falta zitzaizkidala banekien, eta ordurako ordu bete eta 40 minutu neramatzan bizikleta gainean, alegia, bi ordutan ezin nuen goraino igo eta Esterri D’Aneura itzuli. Beraz, Han geratu eta bertatik bailarari begira egon nintzen 10 minutuz. Bideak egiten dituen bihurguneak, gora iristeko falta zitzaizkidanak, alboko mendiko ur jauzi dotore eta handia… Eta gero buelta eman nuen. A zer nolako jeitsiera! Berritutako zati zuzenean pedalei eragin gabe 76 kilometro orduko abiadura hartu nuen: zirraragarria!

Bigarren saioan 3 orduko buelta egitera joan nintzen, alegia, nahikoa denbora hartu nuen igoera osoa egiteko, eta gora iritsitakoan bertaraino Baquiera-Bereteko Telesillak igotzen direla ikusi nuen. Por tzierto, hotz egiten zuen egun eguzkitsua izan arren.

Kategoriak Sailkatugabeak | Etiketak , , , , | 3 iruzkin

Igaratik mendizorrotzerako beste bat

Data: 2006(e)ko uztailaren 20a Egilea: ziztazale

profila ikusgarria da

profila ikusgarria da

Igara eta Orio artean aukera asko dago N634 bidea zapaldu gabe joateko. Aurreko batean Mendizorrotzera igo gabe egin daitekeen aukera bat azaldu nuen, beste behin, mendizorrotzera joateko aukera bat ere dokumentatu nuen, eta gaurkoan hirugarren aukera azaldu nahi dut. Hau ere Mendizorrotzetik pastzen da, baina murgil bidetik igotzen da Igeldoko kanpinera.

Ibilbideak murgil bideari jarraitzen dio

Ibilbideak murgil bideari jarraitzen dio

Bidearen hasiera Igaratik usurbilera doan bide politta da, errekaren ondoan, zuhaitzen itzalpean eta aldaparik gabe. Zalditegira iristean eskuineko bidea hartu behar da, eta aldapa gogor baina oso labur baten ondoren, aurrera jarraitu behar da, eskuinean laga behar da gorantz egiten duen beste bidea eta beheranzko joera duen bideari jarraitu behar zaio. Halako batean hiru aukera eskeintzen dituen bidegurutzea ikusiko duzue, ezkerrekoa usurbil aldera doa (kale-zahar auzo aldera), erdikoa tenis gune batera (bideak ez du jarraitzen) eta eskuinekoa murgil bidea da. Lehendabiziko metroak errekatxo baten ondoan egiten ditu, baina laister gora egiten du, %10eko malda duen kilometro erdia (580 m) egin behar baita. Berotze ariketa gisa hartu behar da zati hori, ondoren ikusiko duguna etsigarria izan baitaiteke. Lehenengo malda gogor horren ondoren, murgil baserriraino 300 metro inguruko aldapa erraz bat dago, %4.3ko malda duena. Baserrira iritsi nintzenean bertako gazte bati Oriora joateko zein aukera zeuden galdetu nion, eta aukera bakarra mendizorrotzera igotzea zela esan zidan (buelta eman eta usurbildik ere joan nintekeen…), baina aldapa gogorra zegoela.

Baserriaren atzeko aldera joan bezain pronto egundoko aldapatzarra agertu zen nere aurrean, pinoi haundia eta plato txikia edukitzea zein garrantzitsua den gogorarazten duen horietakoa. Igeldoko kanpinera kilometro bat baino gutxiagoko bidea dago (966 m), baina 115 metrotatik 250 metrotaraino igo behar da zati horretan, hau da, %14ko malda daukan kilometroa! Eta hasiera da gogorrena, lehendabiziko 360 metrotan 63 metro igo behar baitira (%17.5). Kilometro hori pasa ondoren Igeldotik Oriora doan bidera azaldu nintzen, eta bide hori nahiko ezaguna dudanez gustora jarraitu nuen aurrera, hori bai, behean lagatako murgil baserriari azken begirada bota nion, handik igo nintzela sinisteko-edo. Beste kilometro eta erdi falta zitzaidan, %6ko maldarekin (zer da ba hori?) baina itsasoa ikusteko aukera dagoela jakiteak asko laguntzen du…
Mendizorrotzerainoko bidearen nondik norakoak eta profila irudietan ikus daitezke.

Mendi zorrotzetik (polipaso baserritik) Orioko bentaraino gora-behera txikiak egiten dituen bidea dago; bien artean 10 metroko aldea besterik ez dago, polipasso 335 metrotan eta Orioko benta 325 metrotan baitaude, baina hasieran pixkat igo behar da (345 metro ingurura) eta ondoren beheranzko joera du. Orioko bentan hasten da aldapa behera, eta handik Oriora pedalei oso gutxi eragin behar zaie.

Kategoriak Sailkatugabeak | Etiketak , , , , , , , , | Utzi iruzkina

Zakila-bueltako aldapatxoak

Data: 2006(e)ko uztailaren 16a Egilea: ziztazale

malda gogorrena baina bide laburrena

malda gogorrena baina bide laburrena

luzexeagoa baina laburra hala ere

luzexeagoa baina laburra hala ere

Auskalo zenbat aldiz igaro ditugun meagako eta arroako aldapatxoak! Baina aldapatxo horien profilak ez nituen bere horretan blogean inoiz jarri, eta honako honekin hutsune hori bete nahi dut.

honek 3 km b

honek 3 km b

luzeena baina etzanena

luzeena baina etzanena

zakila-bueltako ibilbidea aspaldi jarri nuen blogean, bloga egiten hasi eta gutxira. Baina artean profilak sartzeko tresna egokirik ez nuen ezagutzen eta ibilbide horietako aldapen berri ez nuen ematen. Horregatik pobre samarra geratzen da zakila bueltaren sarrera, eta bertan igo eta jeitsi beharreko aldapak nolakoak diren ez da azaltzen.

Ezin esan aldapatsua denik ibilbidea, ez horixe! baina badauzka igo beharreko aldaptxoak, aipamena merezi dutenak bi dira, lehenengoa meagako gaina da, 140 metrotara dago, eta bestea, arroako gaina, honek 88 metro inguruko garaiera dauka. Aldapa gogorrena Iraetatik Arroako gainera doana da, 800 metro eskaseko ibilbidea da, baina 52 metro inguru igotzen ditu (%6.5 inguruko malda). Hala ere, bidea laburra denez, errez igo daitekeen aldapatxoa da. Zumaia aldetik igo ezkero bidea luzexeagoa da (ez da 1100 metrotara iristen) baina, beheragotik hasten denez, 60 metro inguru igo behar dira (%5.5 gutxi gora behera).

Beste aldapa. meagakoa, etzanagoa da: Zarauztik 4000 metroko ibilbidea dauka, eta 130 metro inguru igo behar direnez, %3.33 malda daukala esan daiteke. Zarauztik elkanorako bide errazean aldapa horren malda %3.5ekoa dela azaltzen da, kalkulua egiterakoan 140 metro igo behar zirela pentsatu bainuen, baina bordatxo taberna ondoko iturria ez dago zero metrotan (10 inguru izan daiteke). Aizarnazabal aldetik igo ezkero bidea laburragoa da, eta ondorioz tenteagoa, baina hala ere aldapa erraza dela esan behar da: %4.3ko malda dauka (3 kilometrotan 129 metro inguru igotzen ditu bideak)

Bi tontor hauez gain bada beste aldapatxorik ere, baina profila jartzeko modukorik ez. Dena den, Getaria eta zumaia arteko kaminerosen majina bat sprint egin izan dugu…

Kategoriak Sailkatugabeak | Etiketak , , , , , , , , , , , | Iruzkin 1

Zehatz auzoa Aizarnazabalen

Data: 2006(e)ko uztailaren 3a Egilea: ziztazale

milagrosa edukitzea komeni da

milagrosa edukitzea komeni da

Gertu egon arren ez nuen auzoa ezagutzen, eta jantoki baten bila ari nintzela, aldapatxoa igotzea erabaki nuen. Aizarnazabal inguruan omen zegoen jantokia, Zarauztik joanda ezker aldera. Hori besterik ez nekien, eta Aizarnazabal aldera iritsi baino lehen, bar zazpìra iritsi aurretik, ezker aldera doan bide eder bat dago eta bertan sartu nintzen. Garai hartan milagrosarik gabeko bizikleta neukan, nire peugeot maitea, eta goranzkoan pedalei gogor eragin behar izan niela gogoratzen dut. Aldapa laburra, kilometroa pasatxo, baina, dedio!, atsedenik ez du. Halako batean artzai bat ikusi nuen eta berari galdetu nion, ea inguruotan jantoki edo taberna modukorik ba ote zen. Bere erantzuna mundiala izan zen: Jantokirik ez, baina Bilbo inguruko batzuk etxea omen zeukaten goraxeago, eta hura jantoki asko baino jende gehiagok erabiltzen omen zuen…

Hori entzun ondoren berriz ere behera joatea erabaki nuen, alfer-alferrik igo nuen aldapatxoa. Baina, tira, orain auzo hori ere ezagutzen dudala esan dezaket. Gainera, bertatik, urdanetarainoko beste bideren bat ere badagoela uste dut, ez dakidana da bizikletaz egiteko modukoa ote den.

Nik egin nuen bidea honako mapan ikus daiteke.

Kategoriak Sailkatugabeak | Etiketak , , , , , | Utzi iruzkina

Zarauztik Billabonara

Data: 2006(e)ko ekainaren 15a Egilea: ziztazale

Txupatxus itxurako ibilbidea...

Txupatxus itxurako ibilbidea…

Ohiko 40 kilometroak luzatzeko aukera erraza da ibilbide hau, baina denbora gehixeago eskatzen du, 56 kilometro inguru baitauzka.

Aldapa gehiena hasieran dauka

Aldapa gehiena hasieran dauka

Hasiera oso ezaguna zaigu: Aiako igoera baita. Jarraian andazarraterako bide zoragarria dator, eta ondoren Asteasurainoko aldapa behera azkarra: asko disfrutatzeko moduko ibilbidea. Asteasutik Billabonara ere indar gehiegi xahutu gabe joan daiteke, beheranzko joera baitauka, baina Billabonan bideari arreta jarri behar zaio, batez ere autobidea ekidin nahi bada. Guk Adunaren azpian geratzen den industrialdean zehar doan bidea hartu izan dugu beti. Asteburuetan trafikorik ez da egoten eta aldaparik ere ez dauka. Bideak Andoaineraino garamatza, eta han, onena herrira sartzea da, herria zeharkatu eta azken momentuan autobidean sartu behar da. Hala ere Lasarte Oriaraino bide bazter zabala dauka, eta gainera, beheranzko joerak bixi-bixi pasatzeko aukera ematen du. Lasarte-Orian Zubieta aldera doan bidea hartzea da aukera onena, Errealaren instalzioetara doan bidea, alegia. Bide horretan aurrera eginez hipodromo ondotik pasa eta Zubieta herriraino joan daiteke bide hestu eta lasai batetik, eta Zubietatik Usurbilgo Santuene auzoraino luzatzen da bide hori, beti ere Oria ibaiaren ondoan eta kotxe oso gutxiko bideetatik. Santuenen, Txokoalderaino doan bide politta har daiteke, baina horretarako bidea galerazten duen seinaleari ez zaio kasurik egin behar, hau da, trenbidearen parean doan bidea hartu eta ibaiaren meandroarekin batera txokoalderaino iritsi ahal da. Han bukatzen dira bide lasaiak, N634 errepidera sartu behar baita txokoalden. Dena den, autopista merkeago (ez ordea merke!) jarri zutenetik asko jeitsi da bertako trafikoa. Orioraino erraz joan daiteke, eta han zudugaria igotzea edo Talai mendi igotzea erabaki bhear da. Guk errazena hartu genuen, hau da, Zudugarai, baina honek ere %6.5eko malda dauka. Eta bukatzeko, aldapa behera!

Kategoriak Sailkatugabeak | Etiketak , , , , , , , , , , , | Utzi iruzkina

Zarauztik mutrikura

Data: 2006(e)ko ekainaren 13a Egilea: ziztazale

Ibilbidearen nondik norakoak

Ibilbidearen nondik norakoak

Igandean, ekainaren 4.ean, ohikoa
baino buelta luzexeagoa egin behar omen genuen, eta horretarako ordu
erdi lehenago geratu ginen: goizaldeko 8:30tan! Sinestezina bada ere
denak garaiz agertu ginen, eta nora jo erabakitzerakoan, nik
proposatutako madarixako buelta baztertu egin zuten; egun beroa
zetorrela eta aldapa gutxiagoko zerbait egin behar omen gunuen…
Azkenean Mutrikura joatea erabaki genuen. Hasiera oso lasaia dauka,
batere aldaparik ez baitauka Zumairaino. Han Itziarko gainera
doan aldapa hasten da, Ez dauka inongo zailtasunik, eta lasai igo
genuen. (beno bukaera kontuan hartzen ez badugu behintzat) Itziar
aurreko ikuskizuna latza izan zen: jendea botaka, begiak gorri-gorri,
eguzkiaren izpiengandik ihesi baleude bezala… Zer ote ziren haiek?
Banpiroak? Gaupaseroak agian?
Handik Debara joan ginen, eta ibaia gurutzatu beharrean elgoibar aldera
joatea erabaki genuen, bi edo hiru kilometro aurrerago, kalbarioko
gainetik barrena, mutrikura joateko asmoz. Kalbarioko aldapa ez nuen
ezagutzen, baina Xubik, gazteagoa
zenean, sarritan igo omen zuen, eta gogorregia izan gabe oso polita eta
lasaia zela esan zigun. Imamol eta SuperThonik ordurako erronka latza
botata zeukaten, egun hortako errege kalbarioko gainera lehenengo
iristen zena izango omen zen. Eta jakina, bidegurutzera iritsi bezain
pronto han aldegin zuten Itziarko banpiroengandik ihesi ari balira
bezala! Kalbarioko perfila hauxe da, hasiera lasaia dauka, baina gero % 8ko malda dauka, alegia, ez dela gauerdiko ahuntzaren eztula.

Gu gora iritsitakoan han zegoen Imamol, erregatza lortu ez eta gure
zain ordulaurden egin zuela esanaz… Mutrikura jeitsi ondoren bueltako
bideari ekin genion, kostako bidetik Debara, eta handik berriz Itziarko
gainera. Aldapa hori, nik bezala kiloak soberan dauzkagunontzat, ez da
hain gogorra, ez baitauka malda handirik. Horra bere perfila

Hara ere gure super-bikotea aurrea hartuta iritsi zen. Dedio, horiek daukate sasoia!

Bukatzeko, Itziartik Zarautza; dena aldapa behera. Baina, niri
iruditu zitzaidanaren arabera, superThoni hustuta iritsi zen
kamineroseko aldapatxora. Ez Imamol ordea. Kabroi horrek esprina
irabazi ez zidan ba! Amortiguadore gabeko bizikleta horretarakoxe hartu
zuen, aldapa horretako esprina irabazteko.

Beno, saio polita izan zen, ia 70 kilometro eta hiru ordutako izerdi
jarioa: karakolen moduan arrastoa laga nuen bidean zehar. Beti bezala.

Kategoriak Sailkatugabeak | Etiketak , , , , , , , , , , | Iruzkin 1

Gizpuzkoaren barnealdean gora eta behera

Data: 2006(e)ko maiatzaren 15a Egilea: ziztazale

56 kilometro gora eta behera

56 kilometro gora eta behera

Maiatzaren azken asteburuan Xoxote eguna ospatzen da, eta Matxinbentan bazkaltzeko ohitura daukagu. Inoiz Xoxotera oinez igo izan gara, baina azken aldian gutxik hartzen du bide hori. Nik behintzat nahiago dut bizikletaz Zarauztik Matxinbentara joan. Nahi izan ezkero oso erraz joan daiteke, batere aldaparik gabe, baina guk bide alternatiboa egiten dugu, beti bezala trafikoa ekidete aldera. Bidea hemen ikus dezakezue, Bertako aldapa gogorrena ere blogean bertan dago, baina oraingo honetan bide osoaren profila jarri nahi izan dut. Profilean igo beharreko aldapatxo bakoitzaren batazbesteko malda ikus daiteke, bai eta bidean igarotako mendi, herri eta auzoen altuerak ere. Kontuak atera eta 1400 metro inguru igo behar direla konturatu naiz. Ez dago gaizki goiz buelta baterako.

Kategoriak Sailkatugabeak | Etiketak , , , , , , , , , , , , , , | Utzi iruzkina