`15 euro karua da´: kaka morralian!

Ots3 by arantzabal

Ez dakit jendeak zelan egiten dituen kalkuluak. Kultura ekitaldi askotara joaten ez den jendea izango da, seguruenik, hain sinple berba egiten duena, hain erasokor eta ezjakin, hain anti-kultura.

Peter Pan Bergarako Musika Eskolak egin duen euskara hutsezko musikala da. Amateurrek egindako musikal profesionala. Landua, borondate ordu asko daudela igartzen den horietakoa, aita-ama asko mugitzen dituena eszenategi osteko lanetan, zuzeneko musika egiten duten hogeita bost bat musikariekin, 70 umetik gora antzezten eta kantuan, denera 120 laguneko ekipo bat taulan, zuzendaria buru-belarri lanean orduari begiratu barik…

Guk talde hau ezagutzeko aukera izan dugu Espaloia Kafe Antzokian. Emanaldi egunaren aurretik ere makinatxo bat lan egin da, eta egunean bertan goizeko 08:30ean hasi zen jendea etortzen. Kafetxoa, eta… beroketa ariketak:

Ondoren, ahots ariketak:

Jendeak ikusi ez zuen orkestra 12:30an entsegu orokorra egiten

Eta hori egiten genbiltzan bitartean ez zuen ba kale egin argi-indarrak? Fase bat erre zen. Eskerrak herrian bertan aita-seme elektrizistak ditugun. Banekien konponduko zutela eta Peter Panek hegan egin ahal izango zuela.Eskerrik asko Iramakoei

Argi eta soinu profesionala. Emanaldi honetan kobratzen duten bakarrenetakoak. Jatorrak eta aretoko arduradunei kasu egiten dioten horietakoak espektakuluaren mesedetan:

Ez zen ba Wendyren ohea apurtu eszena-tarte batean? trankil! borondateak bai, borondatea egonez gero zailtasunak gainditzen dira. 🙂

Beltzezko gizon-emakumeak. Derrigorrezkoak eta gutxien eskertzen den taula osteko hori egiten dutenak goizean goiz hasi eta taula hustu arte (12 ordutik oso gora!)

Zuzendariak antolatu egiten du, gidatu, harremanak egin, entseguak bideratu eta hamaika gauza gehiago. Baita efektu bereziak muntatu eta eztandarazi:

Ikusten ez den gauza asko. Taula ostean kantuan musika zuzendaria pantaila bidez jarraituz

Ikusi zenuten Txilintxo maitagarria? Ba momentu batean lo ere hartu zuen, baina teknika konpondu bizkor batean eta Peter Panen lagun izan zen. Hemen gidarietako bi:

Banbalinak gora eta behera erabili bitartean horrela ikusten da Espaloia ilunetatik, argi-argi, bete-bete, poz-pozik:

Eta publikoak eskertu egiten du txalo zaparrada etenbarikoekin:

Galdetu umeei ia garestia den bi ordu eta erdi irauten duen ipuin musikatu hau bizi izatea.

Eta gero… eta jendearen txaloak jo ostean jarraitzen du lanak, dena jaso beharra dago kamioikada gauza, aulki, mikrofono, dekoratu…

Eta, noski, inori ezin zaio eskatu hau dena ikustea, baina espektakulu horretan sumatzen da lan asko dagoela atzean eta ordu asko. 700 lagunetik gora ikusle eta lanean 130 lagun inguru.

Azkenengo 8 urtetan kultura merkea dela inork ez digu esan, sekula. Baina ohikotasunez antzokira datorrenak badaki jakin zer kostatzen den, eta jakitunago da zenbat irabazten duen norberak horrelakoak ikustera joanda. 15 euro ordaindu eta norbera aberastu. Hori gertatzen da kulturarekin. Herriko 40-50 urte inguruko bi gizonek aitortu ziguten emanaldia negarrez amaitu zutela, emozionatuta, eskertuta. Garestia? kaka morralian!

Zure herrian ere euskara oporretan?

Abu21 by arantzabal

Oporretara joateak dena baimenduko ote du ba? Tabernako bezeroak bakarrik erdaldunak direla dirudi lehen argazkian. Ez dugu ezer aurreratu?
Ikusten duzue, nahikoa da postari berria ekartzea inori ez ardura izateko zein herritan gauden. Berdin-berdin da Murtzia edo Burgos edo Elgeta. Berdin-berdin. Bulegoko orduak, beraz, erdaldunendako. Akaso euskaldunok beste ordu batzuk izango ditugu?

Herriko dendetan antzera. Oporrak aurretik Udala eta UEMA elkarlanean jardunda posible da kartelak moldatzea, euskarak behar duen presentzia ziurtatzea etab. Ahalegin berezia egin da zerbitzu guztietako paisaia euskarazkoa izateko. Erraztasun asko eman dira. Klaro, oporretan… ba euskarak ere opor.

Hori bai, joan ondoko herrira, Eibarrera, eta: bertako El Corte Inglesen euskara entzuten da bozgoragailuetatik, euskaraz egiten duten langileak ere dezente, kartelak ere… eta “Euskal Produktuak” ere bai: euliak akabatzekoa, labexomorroak akabatzekoa, Sevilla kolonia, Play boy lurrina… Hemen, ez dena ere EUSKAL.

Militarrak lotsabako-lotsabako etorri dira herrira

Api24 by arantzabal

Lotsabako-lotsabako eta egun seinalatuan egin dute bisita. Autobuskada bat goizeko 06:30ean heldu da San Romanera, Bizkaiakin daukagun muga ingurura. Handik Elgetako erdigunera, kataira, hau da, Elgetako kultura etxeko arkura etorri dira arma eta guzti.

Memoria aldarrikatu genuen domeka honetan, kolore askotako politikari eta pertsonak batu ginen orain 75 urteko sarraski justifikaezina salatzeko, errespetua eskatzeko, oroimena eta kalte ordainak eskatzeko. Zein da erantzuna? ba berdez jantzitako armatuek maniobrak egitea. Fan Intxortatik, fan Elgetatik.

Goienak albistea egin du:

Urteurrena asteburuan: duela 75 urte, gelditu zituzten Francoren tropak Elgetan

Urr6 by arantzabal

75 urte bete dira Elgetako frontea ezarri zela. Gudari eta
milizianoek zazpi hilabetez gelditu zituzten Francoren tropak
Intxortan. Elgetako Udalak eta Intxorta 1937 kultura elkarteko kideek ez
dute Espainiako gerrako pasarte hori oharkabean pasatzerik nahi ezta elgetarrok ere.
Urteurrena gogora ekartzeko ekitaldiak gertatu dira domekarako.

Zure nabigatzaileak ezditu iframeak onartzen.

Egitaraua

09:30ean kanpai eta etxafuego hotsa izango da Elgetan; 10:00etan
hasita Intxorta 1937 kultura elkarteko kideen eskutik bisita gidatu
berezia Intxortako ibilbidean. Eta ostean, Gerra zibileko harrera gunea bisitatzeko aukera.

Ekitaldi nagusia 12:00etan egingo dute Intxortako Atean. Jarraian,
martxa egingo da Elgetara “Egia, justizia eta kalte-ordaina zauriak
ixteko, askatasunez bizitzeko” lemapean.

Manuel Iturrioz. Borrokalari baten bizipenak (Iturriotz, Joxemari. Alberdania. Irun, 2011) liburutik atera dugu pasarte hau ordukoak gogoratuz:

Gero egun batzuetako atsedena eman ziguten. Errusia
batailoiaren kuartelean pasa genuen, Bilboko Atxuriko eskoletan, eta
handik Elorriora joan ginen. Egun haietan ni kapitain izendatu ninduten
eta Julian Erdozia teniente. Elorriotik Elgetako frentera atera ginen,
Intxorta mendira, Martiartu, Larrañaga, Saseta eta beste batailoi batzuk
indartzera, etsaiak eraso izugarria prestatu baitzuen Bergaratik
etengabe tiro egiten zuten 80 hegazkin eta 156 kanoirekin. Goiko aldean
Santa Kruzen garaiko gotorlekuak zeuden eta berak idatzitakoak
harkaitzetan. Ondo samar gorortua zegoen, baina Deskarga gainaldean
kanoi bat jarri zuten, beti haitzari jotzen ziona, eta tonaka ateratzen
ziren harriek hegazkinek baino hil-zauritu gehiago eragiten zizkiguten.
Aste hura kalbario bat izan zen egunero erasotzen ziguten hegazkin,
artilleria eta infanteriarekin, baina eraso guztiak bota genituen atzera
eta hil-zauritu mordoxka egin genizkien. Ikusi zutenean gure frentea
ezin zutela urratu, Karraskainetik eraso ziguten eta gutako franko hil
zituzten, tartean Arregi izeneko mikelete bat, eta hildakoak eramateko
gaizki samar ibili ginen batzuek bi egun edo gehiago zeramatzatelako
hilik. Azkenean iritsi zen gaua eta arnasa hartzeko unea, baina gero
Karraskainetik Abadiño aldera sartu ziren eta tristura handiarekin utzi
egin behar izan genuen Intxorta, Elgeta gainean dagoen mendia,
Gipuzkoako azken herria.

Gerra guztiak dira krudelak, eta hori ongi erakutsi
zuten Elgetan, urte askoren buruan jakin baitzen zenbaterainoko
ankerkeria erakutsi zuten jendea bortxatuz eta fusilatuz. Baina Sosota
baserriko alabak eraman zuen parterik txarrena, bortxatu ondoren bere
aurrean akabatu baitzituzten bere gurasoak. Gehiago ezin zioten egin”.

Elgetarrok badakigu “Sosota” baserria idazten den lekuan Sesto baserria behar lukeela, edo zuzenago Sesto Gain. Baserriko krimena, haren lekuko eta biktima izandako Anttoni Telleriak kontatu zuen 2003an (Anttoni 2007an hil zen).

Elgetako Mundumira 2011 ikus-entzunezkoan

Eka7 by arantzabal

Gipuzkoakultura bideoak. Jaiaren erakusgarri onena bi bideotan.

Mundumira: Elgeta munduari begira

Mai30 by arantzabal

Ez zait zifra dantza interesatzen, baina
badakigu elgetarrok sekula ez dela horrelako jendetzarik batu gure herrian.

Demasa izan da, baina pena litzateke ondoko herrian baino gehiago edo gutxiago
izateko zifra bat asmatzea. Ez dakigu zenbat lagun elkartu garen, baina herria
handiago ere ikusi dugu elgetarrok. Zerk egin duen herria handi?

Elgetarrek

200 elgetarretik gora ibili gara lanean. Egia
da oso, oso ondo antolatuta egon dela Mundumira eta horren ardura izan dute hiru
lagunek bereziki: Euskal Herria aldizkariko Jesus Mari Perez-ek, Ginmusicako
Sergio Cruzadok eta Elgetako alkate eta Mankomunitateko turismo arduradun Oxel
Erostarbek. Denekin egin dut lan asteburu honetan eta ordu asko izan dira. Hala
ere, zerrenda luze-luzea da, oso luzea zorionez. Trafikoa zuzentzen, herria
garbi egon dadin eusten, kanpotarrak begirunez atenditzen, tabernariak
zerbitzua ematen… eskerrak! Bestela ez litzateke posible izango. Kolore, edade
eta hainbat pentsakerako herritarrok batuta. Mundumirako alderik positiboena
seguruen!

Kanpotarrek

Ez da egon istilurik. Etorri den guztia egin
da herritar derrepente. Kultura askotako jendea, debagoiendar asko, eta
oraingoan, Elorrio aldetik igotako dezente eta baita Eibar aldetik igotakoak
ere. Botiltzar bateko kakatza salbu giro ona egon da eta aipatzekoa da ez dela
arazo bakar bat ere egon.

Musika taldeek-eta

Oso ondo aukeratutako programazioa. Lan ona
egin da eta ondo kudeatu da dena. Hasieran kontratatutzat genuen The Wailers eta talde hori zen nire
apustua ere. Los Delincuentes izan da izarra
lehenengo apustuak kale egin ostean eta niri taldea larregi gustatzen ez bazait
ere onartu beharra dago jendea pozik geratu dela: arrakasta. Programazio
guztitik, Ain_1
taldea taula txikiagoan ikusteko gogoz geratu naiz eta taula handiko apustuan
geratzen naiz La Trova kung-fú taldearekin. Trunboia ere geratu egin
zuten rumba heterodoxo horrekin. Lau tanta baino gehiago ez zituen egin domeka
arratsaldean eta luxuzko itxiera eman zion asteburuari La troba Koungfuk. Joan
Garrigaren ahotsa entzuteaz bat eraman ninduen urte pila bat atzera Elgetako gaztetxearen bosgarren urteurrena antolatu genuen egunetara (uff zenbat urte). Ordutik ezagutzen
dugu Joan Garrigaren ahotsa. Dusminget
izan zen Gaztetxean izan dugun talde borobil horietako bat. 2004ean utzi zion
Dusmingetek talde izateari, baina ahots hori eta soinu txikia ahaztezinak
dira, Gaztetxeko garaiak besteko ahaztezin 🙂

Postuetakoek

Hainbat stand egon dira oraingo Mundumiran
ere. Eta “hippy” mugimenduko jende hori oso errespetuzkoa izan da
herrikoekin ere. Horixe espero genuen eta holaxe izan dela esatea ez dago
sobera. Bai alde gastronomikoaz (zelako gauza goxoak!) arduratu direnak,
artisauak, GKE-ko stand-etakoak, eta baita feriaz feria ikusten ditugun
sailtzaileak ere… bikain! Bereziki aipatu gura dut Goibeko kultura elkartearen
txosnan lan egin dutenak. Herrirako dirua atera da eta erabiliko da bi
gauzatarako, batez ere: Goiena telebistaren seinalea herrigune guztira ondo
heldu dadin; bestetik, Goibeko elkartearen barruan sortu den Txirikil aisialdi
taldeari (txikienekin lan egindo duena) bultzada emateko. A! eta zergatik ez
esan, zortxoren bat ordaintzeko ere bai. Bertatik pasatu dira Elorrioko
lagunak, Bergarakoak, Angiozarkoak… eta herritar pila bat. Denera 45 lagunetik
gora kañeroari kolpeka. Mila esker!!!!!! Kulturak jarraipena izango du Elgetan eta egindako lanak
horretarako ere balioko du.

Kale espektakuloek

Kale antzerkiak, lehenengo aldiz umeendako
gune handia Irrien Klubaren eskutik, boulder txapelketa frontoian (bete-bete
eginda frontoia ere), DJ festa parea Espaloia Kafe Antzokian, batuka jotzaileak
herrian, dantza ikastaroak kalean, txahal-errea Kalitatearen eskutik… Zenbat
gauza!

Sinistunek

Sinisdunak eta egin egiten dutenak. Bazegoen zalantzaren bat hortik zehar Elgeta
ez zela gai izango horrelakorik antolatzeko… Antzerakoa entzun genuen orain
urte asko. Hiru adibide:

“Elgetan herri-aldizkari bat sortzea
ezinezkoa da” eta Goibekokale sortu genuen herritarrok.
“Elgetan kafe antzoki bat izatea
ezinezkoa da” eta sortu genuen antzoki dinamiko bat herritarrok.
“Mundumira ezin da Elgetan egin” eta demostratu da biztande
kopuruz hainbatkoizten diguten edozein herritan letxe antolatu daitekeela
Mundumira Elgetan herritarrok bat hartzen badugu.

Laburtuta, Goienak bere asteleheneko alean
titulatu duen moduan: “Mundumira, borobil”

Gaur mundumiratarragoa naiz orain astebete baino 🙂

Mundumira asteburua

Mai26 by arantzabal

Taula handi-handia jartzen.
Ez da izango asteburu makala herrian. Eta eguraldi ona ei dator gainera. Egia esan behar badut Mundumirak ez ninduen larregi erakartzen. Egon izan naiz beste herri batzuetan, baina handi-edo geratzen zitzaidala uste dut. Aurten, berriz, herri txiki batera dator eta kamiseta erosi eta lan-txandatan izena eman dut. Gustura egingo dut lan, gustura ikusiko ditut beste hamaika herritako lagunak kalean gora kalean behera. Horixe da modua hurrengoan gu ere beste herri batera joan eta gozatzeko.

Elgetan inoiz ezagutu bariko jendetza espero da asteakaberan, bariku gauetik bertatik hasita. Hori bai, prest gaude herritarrok. 100 lagunetik gora gaude txandaren batean sartuta. Herri-giroa ere ekarri du Mundumirak eta modu askotako jendeak egingo du lan gainontzeko herritarrek zein inguruetakoek goza dezaten.

Bazatoz? Ba hemen programazioa (eta autobusez bazatoz hobeto….) Kultura bor-bor Elgetan. Ia pentsatutako guztia ondo ateratzen den eta lan-ordu guztiak balio duten jaia ondo ateratzeko.

GPS-a hartu eta gerra zibileko lubakietatik buelta

Eka5 by arantzabal

Bariku arratsalde polita pasatu dugu. Espaloian elkartu gara eta mapa bat marraztu dugu ia begiz ondo markatzen genuen ordenagailuan geneukan mapan…

Gero, segituan, GPS-a hartu eta ibilbidea egitera. Gari eta Mikelekin egin daitezke ibilaldi hau eta beste hamaika. Lagunarteko komentarioan joan gara Intxortarantz. Bidean informazio panel guztiak markatu ditugu, iturriren bat edo beste ere bai, baita Beldarrainen monumentua eta Elgetan hil zituztenen omenez dagoen Salbadorreko harria ere.

Ibilbidean badago paisaiarekin gozatzea. Horren adibide bat hemen:

Edo eguarbitza atzean ikusten den hau…

Eta bariku arratsaldeko buelta hau zertarako? Ikusiko ditugu emaitzak aurrerago, baina hasteko, openstreetmap.com osatzen goaz.

Lubakiak non dauden ere markatu dugu, gudagunea, faxistak non, non eutsi zituzten golpistak gudariek, belgikarraren postua, zig-zag erako lubakiak, Beldarrain zegoen lekua, babesguneak, parepetoa…

Esandakoa, atsalde polita eta emankorra. Eskerrik asko Gari eta Mikel. Intxortako ibilbidea markatuta.

Intxortatik Euskal Herrira

Mai24 by arantzabal

Elgetako Espaloia kafe antzokia
2010ko maiatzaren 23an

– egunon Iban… zelan doaz gauzak?

– Ez dok asteburu lasaixa izan. Atzo goizeko 03:00ak arte bideuaren
formatua zala-eta burrukan. Gaur goizian 09:00etatik idatzi batzuk
egitten, harreraguneko kontrol guztia daroian ordenagailua izorratuta…
baiña denboraz larri bagabiz be etarako juau. Donostiatik jatok
informatikarixa, laster helduko dok.

-Aste osoa holango izan dok. Azken baten, herri txikiak gaztetxe
handiak dira guretzat. Baina ikusten da gauzak aurrera ataratzeko
gogoa. Jende askok egin jok lana, eta emaitza hemen ikusikok,
laburbilduta. Eguraldiak be laguntzen jok, eta eguna bikaina izangok,
ikusikok. Joseba Tapia laster etorrikok, jendea be hasi dok hurbiltzen,
Espaloia txukun txukun jauk, eta Harrera gunea itzela. Non jauk alkatea?

– Bai bai, ez juat sekula horretan pentsau, baiña hau gaztetxe
haundi bat dok bai. Edurne, Oxel, Josuren, Juan Ramon, Iban… atzo
gabekua izan zuan elkalaneko erakustaldi bat. Herri txikixaguetan
ikusten dok posible dala. Alkatia ETB-kuekin juan dok. Ez dok bape
erreza izan harentzako be. Ordu askoko lana jaok atzian, ikusten ez dan
lana eta Edurne eta bixen artian ondo eruan juek kontua. Eskertzekua
herrittarron aldetik.
Hemen jatok Maria Jesus Aranburu be.

-Sarritan ez dozak ikusiko kotxe ofizialak antzoki atarian, barruraino sartu dozak. Aurkezpenak eta hire kontu Iban.

– Bai, ezagutzen juat. Oso osoko andria dok. Oxel etorri bittartian
nere kontu. Luntxera bideratuko jittuau hemendik aurrera datozen OPI
guztiak. Klaro, lehenengo tabakaleraz galdetuko jotsau. Hor jaok hor
anabasia, Odonekin…

-Hi, hor jatok Tapia be, trikitilaria… beragana najoak. Frogatxo bat
egin, eta dana prest. Aulki guztiak prest jauzak, luntxera be hurbildu
da jentia, itxikok haut. Aurkezlea nor dan esan beharko dostek, etzoat
ezagutzen Maider eta.

– Bai, oin kultura teknikarixa dok Bergaran, baiña GOITB-ko
informatibuetako aurpegi izan zuan denbora luzian. Oso ondo egingo jok.
Gaiñera ona dok beti igualok ez agertzia lehenengo lerruan.

-Hi ba dana prest jauk. Probak, pantaila, jendea, hi jezarri hadi
hor, neure ondoan. Lehen lerroan jauzak Elgetako udaleko ordezkari
guztiak, Diputaziñokoa, 37an hildakoen senideak, jende nagusia, Kafe
Antzokian Euskal Herri osotik heldutako jendea. Egun hau historikoa
dok, hemen zeozer hasten dala iruditzen jatek.

– Bai, hasieria baiño ez dok. Animo, Maiderrekin geratu gazen moduan
bera hasiko dok eta gero dokumentala. Ikusiko dok txulo-txulo geratu
dala. 3D-n eginddako zati batzuk, bonba zaratak… baiña batez be
lekukuak. Lekukuena demasa dok, hori behin ikusi eta gero ez dok
ahazten. Ohera be kontu horretxekin juango gaittuk, ikusiko dok. .

(Hasi da ekitaldia. Maider Osa aurkezle. Eta bideo proiekzioa hasi da)

Hori Bittor Garai dok. Asko ez dala etara jittuen basarri ondotik bost lagunen gorpuak. Isiltasuna demasa dok. Ikusi eta ez galdu aukerarik lekuko hau entzuteko, ointxe jatok Antoni Teilleriarena.
Ez dok denbora asko hil dala eta gustora biziko leukek berak be hau
egunau… Bere ikurriña jarri juau erakusketan. Lagaik momentu baten
twitteatzeia eta segi bideuai.

-Bideoa polita dok, gerra garaiko argazkiak, kontakizun historikoa,
hura bizi izandakoen testigantzak, 3D animazioa, eta Euskal Herriko
historiaren zati bat… orain arte inoiz kontatu ez zaigun moduan, eta
euskaraz.

– Tapi, ezagutzen dok narratzaillian ahotsa? Ines Osinagarena dok, Gosekua.
Patxi, esan bihar jotset danak batera igotzeko gero taulara, berba egin
bihar daben danak batera. Bideua amaittutakuan Tapiaren txanda, pare
bat kantu Agur, Intxorta maite diskokuak.

-Aupa Tapi, amaitu dok dokumentala. Oin dok hire txanda.

– Honek kantuok ez dittuk izango jende multzo haundixendako, baiña
ederrak dittuk, oso ederrak. Haudixa dok Tapia. Oso kantu pare ona
aukeratu jittuk. 5 banderak kantua joten zebillen bittartian igo izana
be ondo. Kolore asko batera. Ondo. Lopategiren “Gaur hirurogei urte
bezela” kantau jok, politta.

-Eta eskenatoki gainean Intxorta 1937
elkarteko Garai, Elgetako alkate Oxel Erostarbe, ANVko zinegotzi Edurne
Alberdi eta Diputazioko ordezkari Maria Jesus Aranburu. Lau buru,
kolore ugari, bi andrazko eta bi gizonezko. Hobeto ezin.

– Danak ibili dittuk ondo, bakoitzak 3 minutu jauzkan, baiña betiko
letxe luzatu… Ondo egon dittuk, hala eta be. Bereziki ondo ikusi juat
gaur Aranburu. Esandakuak eta esandako modua be gustau jatazik.

-Hemen esandako guztiak sinatzen ditut nik. Frente Popularra emoten
jok honek. Jeltzaleak, gorriak, anvkoak eta alkatea akorduan. Barriro
be etorkozak Elgetara faxistak….

– Hauxe dok herri txikixetatik gustatzen jatana. Bakoitzak jaukak
bere errena, baiña batuta egin bihar danian batu eta egin egitten dok.
Baitta antxitxika egin bihar bada be. Hau amaitzen jaok, Tapi berriro
taulara.

-Eta Tapiari egindako txaloak, ez dozak debaldekoak. Barriro be hasiko jaku kalabazia! alai amaitu ditu gerrako ibilerak, agur Intxorta maite diskoa egin zuen trikitilariak. Orain autobusetara joak jendea, Ibilbide tematikoari ekiteko, trintxera eta lubakiak bisitatzera.

– Autobuskadia beteta. Ni bigarrenan zain geratzen nok. Hik igo
megafono hori. Han joiazak Aldundiko auto ofizialian ANV, EAJ eta
Aralar, ordezkatuta. Euzki begixan jaok Asentzio.

-Intxorta 1937ko ordezkariak euskaraz eta gaztelaniaz jabizek
gerrako kontuak aitatzen. Lubakietatik sartu dok jendea, duela 70 urte
baino gehiago dituzten lubakiak. Lurrak ez ditu berdindu, historia
ahazten saiatu dan arren. Intxorta magalean, 36 eta 37ko estrategiak
entzuten. Garaiok ez dira horrenbeste aldatu. Lubakiak beste batzuk
dira orain.

Argazkiak.org | Intxortako lubakiak © cc-by-sa: goioarana

– Egun ederrak urten jok. Gaur “La Belga” metrailladoriaren lekura
ez juatia gomentatu jotset Intxorta e1936-37 elkartekuei eta
udaletxekuei. Hori beste egun baterako ze 14:00ak pasau dittuk…
Intxortako interesguniak hobeto seiñalizatzia falta jakuk, ibilbidia openstreetmap-etik
hartzia, harreragunia zer dan ikastola eta eskola guztiei esan biharko
jotseu, baitta interes minimua euki leikenai eta interesoi sortu
geinken guztiai be… Hasi dok bigarren etapia.

-Hi, nik ondiño etzoat ezer hartu. Egarri nok, eta tapiatarrak be
etxera joan dituk honezkero. Bazkaltzeko planik bajauk ala? Antzokia be
beteta jauk baserritarrez, euren urteroko bazkaria dok ala?

– A! uste najuan Tapiakin-eta bazkaltzeko hintzala. Hori esan
jostek. Guk gero kontzertu bat jakau Espaloian Or2tan eta Grupo San
Juan Atxabaltarrak. Hori bai, gaur goizago ohera. Ez, ez juat
konkistadoria zein dan jakingo ezta Lost-ena ikusteko jaikiko be.
Gaurkua ondo urtetzia oso garrantzitsua zuan eta urten jok.
Errebentauta najaok, baiña merezi izan jok.

-Niretzat be, lanean hasteko aitzakia ona izan dok. Orain bajakiat
non eta zertan ibiliko noken. Hasiera ona, lana ugari, baina ekipoa be
bajauk inguruan… eta ez dok gitxi. Esan duet, herri txikiak gaztetxe
handiak dozak. Jarraituko joau, eztok?

::::::::::::::::::::::::: :::::::::::::::::::::::: :::::::::::

Patxi Gaztelumendik eta Iban Arantzabalek, dokumentu konpartitu batean idatzitako kronHika. Berbaz, nork bere lubakitik. Bere lantokitik. Bere pantailatik. Bere euskalkitik, bere ahotik eta blogetik.

Gerra zibileko biktimei omenaldia Elgetan

Api25 by arantzabal

Apirilaren 24an jausi zen Elgetako frontea, eta urteurrena baliatu du herriak omenaldia egiteko. Hainbat lagunek egin dugu ibilalditxoa eta omenaldi xumea egin zaie, urtero-urtero errepikatuko den omenalditxoa. (Argazki gehiago)

Gerra zibilean faxistek hil eta eraso zituzten elgetarrei egindako omenaldia izan da. Herritik Asentzioko Intxortako Aterainoko ibilbidea egin dugu eta bidean, bi lore eskaintza izan dira: bata Salbadorreko monumentuan eta bestea Intxortako Atean.

Harreragunea Espaloia Kafe Antzokian

Maiatza amaieran zabalduko da harreragunea Espaloian.
36k hainbat materialarekin erakusketa egongo da eta hortik hasiko da ibilbidetxo bat Intxortako atera, trintxerak ikustera, Belgikarrak ametrailadorekin egon ziren lekua… Eta harreragunean proiektu oso inportante bat ere jarri da martxan: “Izen guztiak aurpegi guztiak”.

Materiala

Zentzu horretan herritarrei zein gerrateko materiala izan dezaketen lagunei deia egin zaie etxean garai hartako materialik edukiz gero eta erakusketan ikusgai ipintzea gura izanez gero bertaratu eta jakinarazteko.

Etxebarri

Iban Arantzabalen bloga

Tag Archives: elgeta