Category Archives: Sailkatugabeak

Bi modutako tabernak dare

by arantzabal

Rogelio Botanz kantautoriak badauka kantu bat Tiempo diskuan: Gente que sí. Han esaten da badagola gente que sí y gente que no ba tabernekin be antzera. Taberna batzuk badare baietzaren aldian eta beste batzuk ez.

BAI tabernak:

  • Ez dau euki bihar telebistarik (hau inportantiena dala esango neuke). Bueno, kasu berezixetan jartzeko bada… baiña oso berezixetan, hillian dozena erdi aldittik bera.
  • Erosuak dira barriketan egitteko: lagunekin, bikotiakin, kontrarixuekin…
  • Musika ekipo on bat bihar dau. Mimau bihar da soiñua, baflien kokapena, dezibeliuak…
  • Zerbitzari hutsa barik tabernarixa bada hobeto. Beti dira barriketeruaguak eta mimo gehixau dauke bezeruekin, batez be bakarrik fan ezkero trago bat hartzera.
  • Musikia aukeratzia be izan bihar da zerbitzarixaren lana. Ikusi zelako bezeruak daukazen eta momentuan aukeratu zer jarri.
  • Momentu bakoitzerako bolumen bat eta estilo bat.
  • Goizetan zabaltzen badau armosu ona (tostadak, zumua…)
  • Gabetan berandu ixten badau konbinauak ganoraz preparautakuak izatia ezinbestekua da: limoiak, naranjak, baso egokixak…
  • Atsalde-iluntzekua bada tabernia pitxo bereziren bat be txarto ez.
  • Espazio zabalak daukez askotan eta txikixak badira arnasia hartu leiken tabernak dira.
  • Mahaixak egoteko, baiña bata bestiangatik gertuegi egon bihar barik.
  • Jentia engaiñatzeko txanpon-makiña bakuak.
  • Pertsonalidadedun tabernia izan bihar da. Dekoraziñuagaittik, barra arraro bat daukalako, kafia halakua dalako, te ezberdiñak daukazelako, Halako musika estiluan dagolako berzittuta, toreruen elkargune dalako, edo txirrindularixena, edo idazliena, erretratu erakusketak egitten dittuelako… Hori tabernioi eta ez horko taberna bat.

EZ tabernak

  • Telebistadunak, eta bereziki futbol partiduak erosten dittuenak. Ufff estresantiak be badira asko.
  • Ezin da barriketan egin.
  • Hojalata soinudun musika ekipodunak. Bardin jakuenak CDa arraixauta badago be.
  • Musikia inporta ez jakuen zerbitzarixak daukenak.
  • Ez dabenak kontrolatzen ez bolumena eta ez zein estilo jarri.
  • Goizetan kafia baiño eskaintzen ez dabenak (eta behin goizago jaikitta  😉
  • Gabetan legiaren kontra eta ezin itxika dabizen tabernak, baiña zerbitzu eskasa emoten.
  • Atsalde-iluntzekua bada tabernia ez saldu Eroskin erositako plastiko-tortillarik, mesedez.
  • Puro usain demasa dauke, keia eta keia. Espazio itxixak eta ilun-ilunak. Aire garbi bakuak.
  • Bata bestiaren gaiñian, elkarren txutxumutxuak entzuten. Intimidaderik bapez. Daren kontakatillu pilluakin…
  • Makiña-txanponjaliak dauken tabernak. Behartuen dagon jentia engañatzeko makiñak dira, gaixuei dirua kentzeko dira makiñok. Bai, erabakixa txanpona botatzen dabenana da, baiña tabernarixana makiña hori muturren aurrian jartzia edo ez.
  • Pertsonalidade bakua: bardin da urdaiazpiko bat zozketan jarri bezeruei 2 euro eskatuta edo Errealaren poster bat, edo coke-ren erlojua, edo Campsako egutegixa. Beste taberna bat gehixau. Horixe baiño ez dira, bat gehixau.

WIFIxa

Eta bat gehitzen jako zerrenda honi. Badare tabernak (duako) WIFI zerbitzu libria daukenak eta ez daukenak. Ointxe idazten nagon tabernan esan doste ez daukela WIFIrik. Eskerrak bizilagunen bat taberna honetakuak baiño bizkorragua dala. Eskerrik asko KUPULA tabernakuari barik bertako bizilagunen bati. Ez da ba karua router bat jartzia… aaaaiiiiiiii.

Gune euskaldun gehiagoren alde

by arantzabal

Sortu behar ditugu gune euskaldunak. Euskararen mesedetan dira guneok. Kirol guneak, arte guneak, gaztetxeak, literaturarako guneak… Nik gertukoen kultura gunea dut. Ereduak ez du balioko akaso edozein eskualderendako, baina esango nuke edozein lekutan ere ez legokeela gune euskaldun bat sobera. Gune euskaldunak izan behar du:

Prestigio leku

  • Guneak kalitatezko programazioa badu hori euskararekin lotzen da. Ez da inporta beste hizkuntza batzuetako ekitaldiak antolatuta ere. Horietan detaile txikiak zaindu eta ahal delarik euskarazko sorkuntzari lekua egin.  
  • Euskarazko programazio duina antolatu. Ez euskaraz izate hutsagatik eta bai kalitatekoa delako. Euskaraz kultura eskaintza zabala da musikan, antzerkian, hitzaldietan…
  • Euskaraz bizi naturaltasunez eta euskararen gune izatea ere lortu. Jendea erakarri eta erakutsi euskaraz bizi den mundu bat badagoela, merezi duen mundu bat.

Kalitatezko espazio

  • Izan dadila erosoa, atsegina, errespetuzkoa kultura guztiekin, adin guztietara heltzen dakiena, plurala ideologiekin… eta Madrilen, Parisen edo New Yorken dagoen edozein areto duinek dituen ezaugarri guztiak gehi bat: euskalduna.

Ohitura sortzaile

  • Kultura guneek (berdin izango da, esaterako kiroletakoek… ) ohitura landu behar dute. Kulturaz gozatzeko ohitura batetik eta nagusiki, baina bide batez, ikusleak ohitu behar du: euskara hutsezko oharrak entzutera, sarreren txartela euskara hutsez irakurtzera, sarreran dagoenari “gabon” entzutera…
  • Ohitura gune horretako propaganda guztia euskaraz irakurtzera, gu gaztelera hutsez irakurtzera ohitu garan letxe.

Adibide pare bat asteburukoak: Lennar Green magoaren emanaldia eta bertsolaritza

  • Green: 300 kartel egin dira euskara hutsean nahiz eta jakin Euskal Herritik zein kanpotik etorriko zela jendea. Webgunean euskara hutsez azaldu da zein den Green, nolatan datorren Elgetara… lotura batzuk eman dira, adibidez ingelesezko wikipediara. Prentsara euskara hutsez bidali da prentsa-oharra (Garan ere euskara hutsez agertu da…) Gehienek sarrera gorde dute telefonoz eta deitutakoan lehenengo berba euskaraz izan da “Espaloia bai esan?”. Berdin sarreretan, taberna zerbitzuan, sukaldean… euskaraz ondo artatzen duen jendea dago, euskalduna. Aretoko kartel guzti-guztiak euskaraz daude. Musika euskalduna entzutea oso erraza da (bestelakoekin tartekatua, zelan ez), magoak ingelesez jardun du eta gaztelerara itzultzen zuen mago bat izan du alboan (ez dago itzultzaile euskaldunik magian aditua denik). Emanaldia hasi baino lehen aurkezpen txiki bat egin da eta hau ere euskara hutsez. Emanaldia amaitu, txalo zaparrada artean magoen maisua agurtu eta trago bat bafleetatik kantautore euskaldun bat entzun bitartean. Laburtuta: mundu mailako emanaldi bat euskararen mesedetan.
  • Gipuzkoako bertsolari txapelketako finala. Gunea finkoa ez izanagatik jarduna bai badela hizkuntza bakarrekoa. Horrelako adibide gutxi ditugu tamalez. Bertsolaritzak ematen dio prestigioa hizkuntzari, ohitura sortzen du entzulearengan, euskara ikasteko gogoa sortzen duela ere esango nuke… borobila da bertsolaritzaren adibidea hizkuntzaren ikuspuntutik. Mundu mailako emanaldi bat hau ere.

Kultura guneak gehiago lagundu beharko lirateke

by arantzabal

Herriz herri sortzen dituzte udalek kultura etxeak. Eta herriak 10.000 biztaleko tamaina-edo badu etorriko da jarleku finkoak jartzeko gonbita. Zineak dira aukerarik zabalduena.
Espazio hilak ez badira ere espazio gaixoak sortzen dituzte jaiotzetik beretik, jendearen haruntz-honuntza larregirik ez dutenak. Konparatzen ditut herriz herri dauden belarrezko futbol zelaiekin. Futbol zelaiak hamabostean behin erabiltzen dira eta kultura etxeak ere… Gainontzeko egunetan eraikin hutsak dira, metro karratu hotzak.

Zalantza: udalek kultura sortu behar dute edo kultura lagundu?

Dudarik ez, bigarrenaren aldekoa naiz. Kulturari gagozkiola gehiago ikusten ditut Udalak herrian ez dauden ekimenak sortzen eta ahal delarik egiten edo ematen dituenari laguntzen eta animatzen. Hau da, herri batean gazte kolektibo indartsu bat badago ez dauka zentzu handiegirik Udalak dirua xahutzea gazteendako kontzertuak antolatu eta horrela ekintzak bikoizten. Beste herri batean jubilatuen elkartea bada herriko dinamika markatzen duena Udalak ez luke bikoiztu behar, baizik eta ekimena duten herritarrei lagundu. Margolari elkarte bat badago erakusketa egiten dituena zertarako Udala sartu erakusketak antolatzen? Antolatu beharrean espazioa txukundu, laguntzak eman triptikoak ateratzeko, argiztapen egoki bat izan dezaten inbertsioren bat egin, komunikazioan lagundu…

Lau eredu oker:

  • Okerra da Udala bakarrik eta inor baino gehiago bailitzan jardutea kultura egin guran. Kultura herriak sortu eta bideratzeko ahalegina egin beharko luke, akuilu lana egin. Ez daude alperrik udal askotan kultura dinamizatzaileak. Zer da bada dinamizatzea? Hitzari izana ematen saiatu beharko luke kudeaketa hutsetik harantzago.
  • Okerra da kultura talde eta elkarteak mundutik aparteko sateliteak letxe ibiltzea, bakarrik. Ekintzak antolatu eta antolatu, koordinazio barik eta gainontzeko herri-eragileen berri jakitzeka. Getoak ez dira ez onak.
  • Okerra da proiektuak etorkizuna izan dezan dabilen harriari ibili dadin laguntzarik ez ematea. Lagundu behar zaio ekimena duenari eta autogestioan aurrera egin dezan eskatu.
  • Okerra da Udala eta herria ados jartzen ez diren ekimenez betetzea herriko kultura agenda. Eskutik ebatuta behar lukete kultura guneek eta udalek: batak kultura ekintzak sortzen eta ematen modu independentean; besteak zer lagundu behar den eta zer ez erabakitzen herritarren ordezkari diren heinean.

Kultura elkarlanarekin estuki lotua ikusten dut, zelan bestela?

Errez ikusteko eztabaida saiua da Kalaka

by arantzabal

Kalaka ikusten egon barri naiz medikuen telesaillak gustoko dittudan arren. Gustatzen jata formatua audientzia lortziari begira: dekoratu modernua eta dinamikua plato haundixan, sakonegi landuko ez diran gai pare bat edo hiru baiño ez, jente diferentia gai bakoitzeko (gaixan jakitun diranak betiko kolaboratzailliekin nahasixan), bideuak errutina apurtzeko, kaleko iritzixa (gaurkuan mundiala Bermeoko andra batek esan dabenian “nere lapikuan txorixo bakarra”), aurkezlia gidatzaille ona, gai aukeraketa popularra, kanpoko iritzi kualifikatuak…

Bereziki gustatzen jata Markos Zapiain filosofo eta blogariaren jarduna. Demasa gaur aluaren hutsunian gaiñian eta zakillaren mugen gaiñian bota dabena. Beti dauka zita landuren bat. Ez da tertuliano klasiko bat eta eskertzen da ekarpen hori.

Gero Errealan gaiñian berbetan  hastekotan ziran eta nik ordenagaillua piztu dot.  Pizten nenguan bittartian aluzinau egin dot zelako jendiaren iritzixak lortu dittuen:  Josune Bereziartu, Azkargorta, Iñaki Gabilondo… eta edozein debate gidariri gustauko lejakon Javier Clemente be lortu dabe (klaro, itzulitta). Ondo entzun badotsat Clementei, esan dau: Erreala ez doia ondo DV-k etorkizuna markatzen dotsan bittartian.

Ez dot jarraittu ikusten, baiña gerora penaz geratu naiz ia  hori esaldixoi garatu daben edo ez jakin barik. Ez dakit formatuak lagako zotsan gaixa mamitzen. Ondo legoke.

Zer egin anonimo zaratatsuekin?

by arantzabal

Mezu luze xamar batean horixe galdetu dit lagunak: Hi Iban, gura ez ditugun anonimoekin zer egin?

Ez da kontua gaurkoa. Urrian ere galdera antzerakoa egin zidan. Gaur, hala ere, orduan esandakoek ez dute emaitza onik ekarri. Orduan idatzi nituen ohar batzuk galdera honi erantzunez: zer egin anonimoekin? Gaur, pentsatzen nago lau hizkiko nire izenari beste hiru (tal) jarri beharko nizkiokeela aurretik, akaso. Badauzkat lagunak gogorrago jokatu behar dela diotenak, baina ni talibanegia izan ez… beti pentsatzen dut berba eginda konpontzen direla gauzak eta lehenengotik egurra eman beharrean adostasunetara heltzea zen asmoa. Ez du funtzionatu kasu honetan. Zer egingo diogu ba, aurrean dagoenak ez du beti izaten entzuteko borondaterik.

Eta orain zer?

  1. Jarraitu argi eta garbi lagatzen zeinek agintzen duen webgunean. Arauak gogorarazi webgunean bertan.
  2. Zabaldu dezala blog bat gura duena esateko. Ez utzi zuen lana kakazten. Baduzue e-posta, esan bakea emateko ze gogoa, dirua, ilusioa eta denbora asko eman diozuen proiektu bat dihardu kakazten.
  3. Zarata jasanezina bada argi dago, blokeatu e-posta hori. Beste bat sortuko duela? ba blokeatu hori ere. Berdin hurrengo e-postekin.
  4. Jarrera baten kontra zaudetela igarri dadila, ez utzi horrelako mezuak argitaratuta. Onarpenik merezi ez duten mezuak direla ikusten baduzue (irainak, ez-konstruktiboak, ez dutenak albistea osatzen… : ezabatu.
  5. Jarraitzen duela? izan zuek hobeak teknikoki bera baino. Antzeman, aurreratu.

    Eta ezer ere ez? Gogortu jarrera.

  6. Login sistema bat jarri. Login egin, e-postaz konfirmatu beharko du erabiltzailea bera dela. Login egiteak jendea galtzea dakar, baina zarata gutxitzea ere bai. Nik gurago ditut zarata gutxiko lekuak.
  7. Luistxori kenduko diot zer egin anonimoekin mezuko erantzunaren zati bat: Suntsitzaileei aurre egin behar zaie, neurri teknikoekin bai, baina batez ere determinazioarekin. Bai, hori egiteko momentua da.
  8. Pasa beraren mezuak bakarrik moderatzera. Hau da, egin aurre-moderazioa baina IP jakin bateko mezuekin. Ez denekin, ze asko moteltzen du parte hartzea. Trol horrek idazten duena irakurriko duzue eta gura baduzue paso eman edo gura baduzue utzi argitaratu barik, moderazio kolan. Esango nuke badakizuela honezkero zein IP-tatik idazten duen, ez? Hori zuen alde dago.
  9. Txopiri hartutako ideia: IPak gordetzea. Indymedia Euskal Herrian erabiltzen duten softwareak (edo Apache bezalako web zerbitzariko logak ondo kudeatzen
    badakizue) bidalketa bakoitza, iruzkin bakoitza eta irakurketa bakoitza
    nondik egiten den jakin dezakezue. Egun batzutan zehar azterketa egin
    ondoren, trolaren IPa jakingo duzue. Ez hori bakarrik, erabiltzen duen
    nabigatzailearen izena eta bertsioa ere bai (agentea deitzen dena).     Txopik esan zuen moduan erabiltzaile gogaikarri batez dihardugu, beraz, eliminatu behar da puntu honetara helduta. Gogorragoa izan behar bada izan. Egurra!
  10. Beti da posible moderatutako erantzunak bakarrik sartzea. Metodo honek asko jaisten du erabiltzaile kopurua, baina publikatuko da zuek gura duzuena bakar-bakarrik. Ez badago modu errespetuosoan idatzita atzera eta kitto.

Zentzuratzaileak zaretela entzuteko prest egon zaitezte. Hori bai, nik gurago dut zentzuratzen den webgune bateko jarraitzaile izan eta ez kakaz josita dagoen webgune batekoa. Iritzi askatasuna bai, kaka kakaren gainean ez.

Geroagokoak lirateke, nire ustez, izen-abizendun erabiltzaileak bakarrik onartzea eta abarrekoak. Segi borrokan zuen proiektuak merezi duela uste baduzue. Seguru jende askoz gehiago dagoela egiten duzuena txalotzen duena. Ez utzi hiru-lau memelo edo memelinari ezer kakazten. Animo!

PETTI

by arantzabal

Atzokua ez da erreza azaltzeko. Adibide batekin saiatuko naiz: azkenengo kantuan dozena bat minututik gora jardungo zeben, hala eta be ez neban gura bersiñua akabau zeixen. Horra! amaitzia gura ez dozun kontzertu bat.

Dale eta dale baterixa-jotzaille gazte profesionala lehenengo kantutik zeukan barretxuakin; bajistia erritmuan ondo eta taldekidiekin bat egindda; gitarriari soka bat apurtu eta beste gitarra bat ondoraiño eruan arren jarraittu egin zeban azkenengo kantuko hustutzia ez apurtzeko; ahotsa eta gitarrianak ez dauka izenik, edo bai, barkatu, badauka eta maiuskuletan: PETTI.

Pentsatzen neban Etxeko uzta ezingo zala hobetu… Baiña bai, azkenengo diskua egin daben ONena da. Kantuak dare entzun eta entzun egindda aspertzen ez zazenak. Lasai eta gordin jarduten badaki, erritmo bizixan eta neurtu be bai, goiko erregistruetako amorru-ahotsetan zein behekuetan eroso, arpegio sinploi goxuetan noiz edo noiz eta mastillian gora eta behera ausardiaz askotan. Gitarrero fiña eta gibeletik kantatzen daben monstruoa. Letrak be demasak dira. Hau danau diskuan, baiña zuzenian?

Zuzenian

Zuzenian animalixa bat da Petti. Hain disko ona txiki geratzen da zuzenekuan erakusten daben indarrakin. Kantu gaztienak be hobetuta eta dana entzun nittuan, bizixago batzuk eta ahots joku diferentiekin beste batzuk. Ahots laguntzak gustatzen jataz, baiña gutxitan moduan, ahots bakarrak bete egitten nindduan kantutik kantura, apenas botatzen da faltan beste mikrorik. Zein atrebiduko da ba basajaunaren onduan?

Urteko emanaldi onena ikusi dodala badakit. Durangoko azoka guztian ez da egongo iñor ingurura be arrimauko jakonik. Ez dago bat Euskal Herrixan gitarria eta ahots nagusixa izan eta bixak hain ondo lotzen dittuanik. Haundikerixa barik, ez dago eta kitto! Eta hau holan izan arren batzuk bueltia emon ei zeben dozena bat euro karua dala-eta. Ez dot ulertzen! Kontzertu ona, aretua fenomenua, soiñua argixa eta argixa entzuteko modukua. Antzokiko lagunek oso ondo antolatutako saiua. Atzo Gogortzak etara zotsan etekiña aretoko ekipuari.

Eskerrak, bestetik, badaren disko-etxiak musikan eta musiko onetan sinisten dabenak irabazixen gaiñetik. Ez dot gura pentsatzia holakuen faltia zer litzaken.

Hamabost urte pasau daukazen Ene begiek kantuarekin amaittu zeban kontzertua Pettik. Nik gura neuke kantuko erlojuaren orratzak herdoiltzen diran letxe Plateruenakuak be herdoilduko balira, astiruago juango balitza denboria sikiera, bizitza hau bakarra delako!

Pelota partidurik ez neban ikusi

by arantzabal

Eta arraro sentitzen naiz. Egixa esan parian tokau ezkero ikusi egingo neuke eta gustora ikusi sufridu arren. Gurago izan neban olatu haundixak ikustia kostan, hala eta be.

  • EAEn % 33ko audientzia (portzierto, zelako nahastosua dan erkidegua eta talde politikua be EAE izatia. Nekosua beti ANV-EAE idaztia… ).
  • Nafarruan % 40ko audientzia. Bi lagunetik batek ikusi zeban partidua.

Partidurik ez eta telebistarik bez. Aste akaberia aretotik aretora ibilli naiz.

Barikuan Txuma Murugarren (webgunia ei dauka, baiña telefonicaren lotura bat agertzen da…) eta Gari (ikustera ohittuta ez nagon webgune bat, zeozela esatiarren) ikusi nittuan Plateruenan. Etxian moduan egoten naiz hango antzokixan. Kontzertu ona. Bixak dittut gustoko eta oso oso txarto egin biharko leukie nik okerrekorik esateko. Hori bai, Roberto Mosok urten zeban momentuan… gure lagun batek galdetu zeban moduan: Roberto Morro dok dantzan dabillena?

Zapatuan Leo Bassi Elgetako Espaloia Kafe Antzokixan. Jendez lepo egon zan Espaloia eta ez zan iñor urten disgustora. Berakin afaltzeko aukeria euki neban eta gustatzen jata daukan bizi-filosofixia. Jarduntsua da eta luze egon giñan entzuten kuadrillatxua. Oingo astian Toledon egongo da, ateuen elkargune izango da Toledo. Zein herri eta Toledo! Blogari saiatua da Bassi eta nundik nora dabillen jarraittu geinke errez. Emongo dau zeresana Toledon probokazio-man-ek.

Domekan olatuak ikusten lehenengo eta gero goxo-goxo Victoria Eugenian. Berandu erabaki giñuan Ruper ikustera fatia, baiña aukera ona izan zan. Lekua… elegantia da, baiña gu hirugarren solairuan egon giñan. Zer esango dot ba! Ba galdu egitten da taula gaiñekua bertatik bertara ikusten ez danian. Hirugarrenetik be soiñu ona eta argixak mundial. Jabi Ulla ezaguna da, baiña ezagunago izateko meritu guztiak egin zittuan domekan be. Ruper bera ondo (hobeto egon izan da Ruper be). Atzo nerbioso-edo… anplixari “on” emotia ahaztuta behin, zubitoren batekin be larri, letraren batzukin nekez be bai… baiña ondo. Haizietan jardun zeben  Gorka Benitezek (saxua eta zehar-txirulia) eta Juan de Diegok (fiskornua). Entsegu gutxitxokin seguruenik, baiña kolore politta emon zotzen pare bat kanturi. Jendez lepo aretua eta artistiari txalo zaparrada haundixak joten, entregauta. Politto egon zan. Dana grabau da eta lau kamaratan, gaiñera! Komentarixo asko egin zittuan eta kritikatxo bat be bai. Irratixetan euskal musikarik jartzen ez zebeneko urtien gaiñian egon zan berbetan eta bota zeban: bueno, gaur egun moduan. Txaluak entzun ziran antzokixan. Komentarixuak badauka mamiña, baiña hau beste egun baterako.

Gaur astelehena… eskerrak zubixa be badatorren. Animo!

Euskarazko albistegietarako esku-liburua aurkeztu du EITBk

by arantzabal

Gaur goizean han izan gara, EITBko MEGAestudioetan (inbidiaz diot hau). Hala ere, bisita gidatua agindu digu zuzendariak eta aurrerago idatziko dut horren gainean. Gaur EITBk gonbidatuta egon gara esku-liburuaren aurkezpenean. Esku-liburua? ez zen ba estilo-liburua? ba ez. Nik estilo liburua espero nuen, egia esan. Estilo liburu bat esango zuena nola eman pasoak albisteei, aurkezleen janzkeraz zerbait, hau edo beste albisteetan erabili beharreko irudiez, soinuari nolako tratamendua, elkarrizketak nola, argiztapena nola zaindu informatiboetan, informatiboetako kazetariek erabili beharreko erregistro ezberdinak… Ni estilo liburu baten aurkezpenera joan naiz-eta… Eta kale. Akaso horrelakorik ere beharko da ba… Neure akatsa bila joan naizena ez topatzea.

Liburua jaso dugu eta irakurri dutenen iritziak entzun ere bai. Akademikoegia ez izatearen onura ikusi dio Beatriz Zabalondok. Gaineratu du zehatza dela eta irudia eta soinua kontuan hartuta idatzitakoa. Juan Garziak zuzentasunetik haratago egokitasuna bilatzen dela esan du eta lortu ere lortzen dela. Kritikatxoa ere egin du Giputx-irratiak ere horrelakoren bat behar duela-eta. Jakin dugu lanean dihardutela irailetik. Rosa Miren Pagolak hizkuntza bizkorra erabiltzearen alde egiten duela esan du eta liburua ateratzearren zorionak eman dizkie egileei. Komentatu du azentuan, doinuan… gai suprasegmentaletan badagoela zeregina oraindik. Badugu bai zeregina.

Aholku emaile da liburua eta hori bai, hori demasa da! Ez du kazetaria mintzen “txarto dago, txarto dago, txarto dago” formula erabilita. Hori badu ona bai.

Nik bistazoa jo diot eta euskalkiaren atalaren bila jardun dut. Ez, oraingoan ere ez da tokatu. Eta ez diot nik Maialen Iriarte bizkaieraz berbetan hasi behar denik, baina badago kalera ateratzen diren kazetariek egin dezaketenik. Iritzi horretakoa naiz ni.

Liburua bai, liburua. Papera. Webgunean? ez. Ez oraingoz. Ez dute esan behintzat eduki hau sarean dagoenik eta nik ez dut aurkitu. Notizia atera dute eitb24.com-en. Beñat Oyharçabal ere egon dela irakurriko duzue -X noticia-X goiburudun berrian. Ba alboko tabernan-edo ikusiko zuen kazetariak, edo beste puntaren baten, benetan handia da-eta EITBko egoitza-eta…

Hori bai, liburua erabiliko dugu tokiko telebistok. Anaia handia(e)k egindako lanak beti dira ondo jasoak. Erabiliko genuke irratikoa eginda balego ere, eta baita inork aipatu ez duen Internetekoa. Esku artean daukadan hau ederra da eta eskarmentudun jendeak idatzia egoteak plusa ematen dio. Ez ditu 25 urte alperrik bete telebistak. Eskerrik asko zuen lana liburu batera ekartzearren. Zorionak Asier Larrinaga eta lantaldeari. Baita EITBri ere.

Leo Bassiren kontra egitten jarraitzen dabe

by arantzabal

Gure herriko alkatiak ohar bat etara dau Leo Bassik Elgetan jokatuko daben antzezlanaren harira jasotako spama dala-eta. Handik etaratako puntu batzuk:

  • Elgetako Udalak 200 mezutik gora jaso dittu azken egunotan Internet
    bidez Leo Bassik abenduaren 1ian Espaloian egingo daben ikuskizuna
    bertan behera lagatzeko neurrixak hartzeko eskatzen.
  • Bigarren aldixa da Bassi
    Elgetara datorrela eta iaz be antzerako mezuak jaso zittuan Elgetako
    Udalak.
  • “Ez dot neurririk hartuko Leo Bassik
    Espaloia Kafe Antzokixan egingo daben ikuskizuna dela-eta”.
  • “Ez Leo Bassik, ez
    beste iñork, ez dau merezi bere ideia, iritzi edo pentsakerak libre
    azaltzeko eragozpenak izatia”.
  • Herritarrak animatu gura dittu aurtenguan Instintos Ocultos  ikustera fateko: “Herritarrek erabakiko dabe ikuskizunak
    merezi daben edo ez . Bakoitzak bere iritzixa euko dau. Hoixe dauka oiñarri
    adierazpen askatasunak, danon askatasuna”.

Goittik behera egitten dot bat gure herriko alkatiak esandakuekin. Halakoik!
Zer uste dabe dirala eskuma muturrekuok holako mezuekin spameatziaz gain artista baten jarduna eragozteko?

Leo Bassiren webgunia

Iaz be egon zan Espaloian hau bufoiau eta esan zoskunez bere armarik haudixena antzeztokixak badira be,  oso gertutik jarraitzen dotsa Internetek. Sarri idazten dau leobassi.com webgunian eta danetik topauko dozu han: Bassibussaren barri, Leo Bassiren gaiñeko kontuak, apostasia egitteko pausuak, agendia … Bassi Elgetatik pasau ostian fango da nora eta Toledora, Ateuen lehenengo kontziliora.

LeoBassiElgetan

Leire Narbaiza: Euskaltegietako irakasleon miseriak eta komeriak

by arantzabal

Leire narbaizaren bloga irakurtzia gustoko dot. Zentzuz eta bizi idazten daben horretakua da Leire. Nik maisu-maistren soldatak artikulua idatzi eta berakin berba egitteko aukeria euki neban. Oin hau artikulu sankonau idatzi dau: Euskaltegietako irakasleon miseriak eta komeriak.

Berak diño: “nik lan hau maite dut, gustura nabil eguneroko borroka honetan.” eta guk zu maitte dotsugu, Leire. Maitte dotsugu ze…  ze zaittugu erakusten jarraittu bihar daben jende hori guztioi bihar dau ondio euskeriak. Bihar dogu euskaldunok. Bihar dabe erdaldunek.

Berriro be irakasliak etorri jataz burura, bestelako kondiziñuetan dagozen  irakasliak. Eta, klaro, desio dot ahalik eta jende gehixenak irakurtzia zure mezua, baitta erakundietakuek be.

Bihotzez eskerrik asko, Leire. Eskerrik asko idatzixoi barru-barrutik sareratziarren.