Gaur haserre etorri naiz lanera. Irratian entzun dut Gipuzkoako Diputazioak egindako azken azterketaren emaitza: “Merkeagoa bada ere %18k erabiltzen dute garraio publikoa Gipuzkoan”. Zuek zarete tontoak, gipuzkoarrak, dirua galtzen ari zarete egunero autoa hartzen…

Antzuolan bizi naiz eta Arrasatera etorri behar izaten dut egunero. Ordu erdi baino gehiago (batzutan ordubete ere bai) behar izaten dut 11 kilometro egiteko. Goizeko 8etarako Arrasatera etortzea odisea moduko bat da eta orain arte entzunda nuen arren, ez nuen horrelakoa zenik uste. Duela bi aste-edo hasi nintzen Arrasaten lanean eta ondo ikusi dut gertatzen dena.

Bueno, ba goizeroko auto-ilaran nengoela entzun dut irratian Diputazioaren ikerketaren berri. Sutan jarri naiz, berriz ere gu (gidariok) baikara errudun eta tonto.

Nabarmena da gure ibarrean garraio publikoa oso eskasa dela, baina hobetzeko nik ez dut mugimendu handirik ikusi. Lurraldebus izeneko ekimen bat sortu da; tranbia ere egiten hasiko dira… Baina, hala ere jendeak autoa hartzen jarraitzen du. Ez duzue uste autobus zerbitzu egokia egongo balitz jende askok autoa etxean utziko lukeela? Nik bai behintzat eta inguruko beste askok ere bai. Orduan, zertarako itxoin tranbia egin arte? Zergatik ez da orain hobetzen garraio publikoa, autobus gehiago jarri? Eta ikusten bada geroago tranbia beharrezkoa dela, bada egin. Baina ez itxoin horrenbeste.

Bitartean, egunero autoa hartu behar dugunok gara tontoak.