Category Archives: Sailkatugabeak

Leo Bassiren kontra egitten jarraitzen dabe

by arantzabal

Gure herriko alkatiak ohar bat etara dau Leo Bassik Elgetan jokatuko daben antzezlanaren harira jasotako spama dala-eta. Handik etaratako puntu batzuk:

  • Elgetako Udalak 200 mezutik gora jaso dittu azken egunotan Internet
    bidez Leo Bassik abenduaren 1ian Espaloian egingo daben ikuskizuna
    bertan behera lagatzeko neurrixak hartzeko eskatzen.
  • Bigarren aldixa da Bassi
    Elgetara datorrela eta iaz be antzerako mezuak jaso zittuan Elgetako
    Udalak.
  • “Ez dot neurririk hartuko Leo Bassik
    Espaloia Kafe Antzokixan egingo daben ikuskizuna dela-eta”.
  • “Ez Leo Bassik, ez
    beste iñork, ez dau merezi bere ideia, iritzi edo pentsakerak libre
    azaltzeko eragozpenak izatia”.
  • Herritarrak animatu gura dittu aurtenguan Instintos Ocultos  ikustera fateko: “Herritarrek erabakiko dabe ikuskizunak
    merezi daben edo ez . Bakoitzak bere iritzixa euko dau. Hoixe dauka oiñarri
    adierazpen askatasunak, danon askatasuna”.

Goittik behera egitten dot bat gure herriko alkatiak esandakuekin. Halakoik!
Zer uste dabe dirala eskuma muturrekuok holako mezuekin spameatziaz gain artista baten jarduna eragozteko?

Leo Bassiren webgunia

Iaz be egon zan Espaloian hau bufoiau eta esan zoskunez bere armarik haudixena antzeztokixak badira be,  oso gertutik jarraitzen dotsa Internetek. Sarri idazten dau leobassi.com webgunian eta danetik topauko dozu han: Bassibussaren barri, Leo Bassiren gaiñeko kontuak, apostasia egitteko pausuak, agendia … Bassi Elgetatik pasau ostian fango da nora eta Toledora, Ateuen lehenengo kontziliora.

LeoBassiElgetan

Leire Narbaiza: Euskaltegietako irakasleon miseriak eta komeriak

by arantzabal

Leire narbaizaren bloga irakurtzia gustoko dot. Zentzuz eta bizi idazten daben horretakua da Leire. Nik maisu-maistren soldatak artikulua idatzi eta berakin berba egitteko aukeria euki neban. Oin hau artikulu sankonau idatzi dau: Euskaltegietako irakasleon miseriak eta komeriak.

Berak diño: “nik lan hau maite dut, gustura nabil eguneroko borroka honetan.” eta guk zu maitte dotsugu, Leire. Maitte dotsugu ze…  ze zaittugu erakusten jarraittu bihar daben jende hori guztioi bihar dau ondio euskeriak. Bihar dogu euskaldunok. Bihar dabe erdaldunek.

Berriro be irakasliak etorri jataz burura, bestelako kondiziñuetan dagozen  irakasliak. Eta, klaro, desio dot ahalik eta jende gehixenak irakurtzia zure mezua, baitta erakundietakuek be.

Bihotzez eskerrik asko, Leire. Eskerrik asko idatzixoi barru-barrutik sareratziarren.

Kantari: euskal kantuak bultzatzeko ekimen arrakastatsua

by arantzabal

Unai Iturriagak Berrian : Haurrek Txaikovski nor den badakite, baina Imanol ez; norbaitek bultzatu beharko luke hori.

Eta ez du arrazorik falta! Besteak beste horrekin konturatuta Debagoienean Kantari ekimena jarri genuen martxan urriaren 20an. Ideia bat egiteko ETBko “Egin kantu” moduko bat da, baina baditu ezberdintasunak:

  • Ez ditugu ume onenak aukeratu. Denak dira onak.
  • Debagoieneko ume guztiek parte hartu ahal izan dute eta 550 umek igo dute oholtzara.
  • Ez dago irabazlerik. Edo hobeto esanda: denak dira irabazle.
  • Denei erakutsi diegu koreografia minimo bat.
  • Uda aurretik eman genien CD parea 40 kanta euskaldunekin. Hainbat gurasok ere entzun behar izango zuten umeek ikasi beharreko kantua…
  • Ez dira izan euskaratutako kantak, baizik eta euskaraz sortutakoak, euskal sortzaileenak.
  • Denak, 550 umeak aterako dira telebistan, GOITBn.
  • Edozein joan ahal izan da Kantari-ko grabazio saioetara (lau herritan egin dira) eta doan.
  • Denei emango diegu aukera ikuskizuneko DVDa 6 euroan eskuratzeko. Kantariko kamiseta opari.
  • Kantuak: Pirritx eta Porrotxen “Maite zaitut”, Joxe Ripiauen “Kaiser Sose”,  Tapia eta Leturiaren “Galdurikan nago”, Oskorriren “Katuen testamentue”, Itoizen “Goizero”, Hertzainak talderen “Bi minutuero”, Kortaturen “Sarri sarri”,  Hemendik At-en “Eskutitza”, Sorotan Beleren “Arratsalde honetan” eta Latzenen “Laztana”.  Baita ere, zelan ez, ekimen honetarako propio sortutako Kantariko kantua ere.

Unai Iturriagak dioen moduan norbaitek bultzatu beharko luke euskal kantua ezagutaraztea, plazaratzea, erreferente bihurtzea, gozatzea…  Batzuei sorkuntza dagokie, beste batzuei, berriz hori entzunarazteko bideak erraztea: udalak, kultura teknikariak eta zinegotziak, antzoki sareak, euskara elkarteak, tabernak, liburutegiak… badugu zer egina.

Oraingoan ere pentsatzen dut tokian tokiko proiektuek badutela bestela antolatu eta arrakastatsu izateko modua. Debagoienean kantari ekimen xumea Durangaldean kantari ere izan beharko litzateke, edo Goierrin kantari, edo Bortzirietan kantari, edo..  Txaikovskiz gain euskal kantariak ere ezagun izan daitezen.

Zelako bloga abiatu: anonimoa edo izen-abizenduna?

by arantzabal

Nik argi nuen inoiz blogik egingo banu izen abizenekin egingo nuela. Bai, blog onak ere badaude nork idazten dituen ez dakigunak eta izena jartzeak ere ez du bloga ona denik adierazten beste barik… Ez nuke gomendatuko blog anonimo bat egitea:

  • Askoz ere zailagoak dira topatzeko eta baita jarraitzeko.
  • Askoz ere hotzagoak dira aurpegi bakoak diren heinean.
  • Sinesgarritasunean galtzen dute.
  • Izen-abizen barik errazago ateratzen dira mezuak, hau da, izen-abizendun blogak mimatuago edo daude ze nor zaren jakinda kritikak ere badatoz…
  • Anonimoari erantzun bat uztea hartzailearen daturik gabeko karta bat bidaltzea modukoa da: Helduko da, baina ez dakizu zeini.
  • Esaten duena bere zurruntasunean bakarrik hartu daiteke, hau da, ezin punta atera bere berri ez baduzu. Ezin irakurritako mezuari beste adibide erreal batzuk gehitu.
  • Ingurukoak irakurle izatea oso nekeza. Norbanako bakoitzak badugu irakurle kopuru bat gu geu garelako bakarrik, izen eta abizen bat badugulako. Bizitza errealean badugulako komunitate bat.
  • Ezagunak diren irakurleak asko laguntzen diote blogariari: bai blogean egindako erantzunekin; bai pribatuan bidalitako e-postekin.
  • Ezin entzun kalean: “Gustatu zait atzo idatzi zenuena” edo “zelan esan zenezake horrelako astakeria!” edo “atzoko erretratua oso eskasa zen” edo “asmatu duzu titularrean” edo “pasatu egin haiz!” edo… Eta kritika guzti-guztiek laguntzen dute.
  • Batzuk uste dute morbosoago direla ezkutuan. Bada gezur handia da. Ezkutuan daude eta ez dute horregatik bakarrik berezko erakarpenik. Ezkutuan daude eta kito!
  • Susmopean jartzeko balio dezake. Irakurlearen galdera beti da bat: Zergatik gordetzen du bere nortasuna, zer edo zer izango du ezkutatzeko?
  • Komunitatekideenganako errespetua: komunitate txikietan, behintzat, beste denek izen-abizenak dituzte, zein arrazoigatik sare-identitatea ezkutatu zure kideei ere?

Blogak duen gauza politenetako bat da sareko kontu hauek guztiak nahasten direla gero bizitza errealarekin. Erantzun dizun horrekin, eta beti ere zein den badakizu (nik zorte hori badut, zorionez) , jarraitu zenezake eztabaida zerbeza baten bueltan. Eta zein sanoa den bertatik bertarako harremana… Irakurtzen dira testuak sareak hoztu egiten duela diotenak, harremanak ordenagailutik ordenagailura baino ez direla esaten dutenak, baina bai zera! Sarean idaztearen gauzarik onena lehen zenituen harremanetan sakontzearena da, blogean atera den eztabaidagaiari punta ateratzea kafe batekin lagunduz. Polita da zure blogean parte hartzen dutenekin elkartzen zarenean sortzen den konplizitatea.

Bloga izen-abizenekin abiatzea ia ezinbestekotzat jotzen dut. Gainera, zenbateraino zara ba anonimo? hori posible da?

EMUN: lana euskalduntzeko kooperatibak 10 urte

by arantzabal

EMUNek antolatutako ekitaldittik etorri barri nago. Pentsau dot kronikatxo bat egittia, baiña bai argazki kopuruagaittik, idatzittakuagaittik eta bizkortasunagaittik lankidiek baiño hobeto egingo ez dotenez EMUNeko webgunian sartu barri dagon albistia irakurtzera gonbidatzen zaittuet.

Bi izen aittatu gura dittut, baiña. Ekitaldixan egon ez diran izen bi. Bata Nepalen dagola esan dosta goizeko kafian Jexux Garmendia lagunak; bestia, Canadan dago, ingelesa ikasten-eta.

Emunen zenbateraiñoko garrantzia izan daben ez dot bizi izan, baina entzun da aipamenen bat. Nik bixak euki izan dittut goguan, bixak euki dabe neregan influentzia haundixa. Dauken txarrenetik be edango neban, zelan ez, baiña txar askorik ez daukenez… Onetik edan dot asko eta euskararen mundua gertuagotik ezagutu dot bixegaittik. Euskalduna izatia euskeriakin eta euskeria erabiltziakin bakarrik lotzen ikasi neban hamarnaka urte dala.

Gaur Julen Arexolaleibakin gogoratu naiz eta baitta Juan Martin Elexpururekin be. Julenekin irakasletzako eskoletan euskeriaren beharraz eta inddarraz konturatu nintzan (soziolinguistikia, Txepetx…) eta Juan Martiñek euskalkixaren onurak zeintzuk ziran erakutsi zostazen (Gerora Badihardugu…).  Horratx bi lagun ekitaldixan faltan bota dittudanak.

Ekitaldixa oso ondo egon da, hizlarixek laga dittue “dejada” batzuk eta horrek frontoiko pintxo artian komentatzekuak izan dira. Kantu emozionante bat be kantau da ekitaldixa amaitzeko “gero gura” eta berriz be Jon Sarasuaren eskua egon izana eskertu dogu entzuliok. Errepikia hauxe:

Gora-gura gara
gora-gura
Gure gero-gura
Gara gu

 Emun10Urte

Ino Galparsoro alkatiak emondako gomendixua gustau jata eta haretxi lapurtuta idazten dot hemen: EMUNekoak animatu pertsonetan eta elkartasunezko parametroetan lanean jarraitzera. Zorionak EMUN!

iPhonea: ederra katxarroa!

by arantzabal

Asteburuan iPhone bat izan dut eskuetan. Hiru egunetan dale eta dale ibili naiz ukimen-pantailari zirrika. Ederra da, polita eta baita erabilgarria ere. Katxarroa, neska-katxarroa edo mutil-katxarroa esaten den adieran eta ez katxarrozarra!

Nik erabili dudan iPhonea ez dago salgai Euskal Herrian. Ez dakit Applen dendetan salduko denik ere. Telefono konpainia batek ere ez du jarri dendetan. Zurrumurruek diote Telefonica izango dela Apple etxeak aukeratu(ko) duen operadorea. Horixe gustatu zait gutxien. Urte lartxo dira Timofonica dirua lotsa barik kentzen…

IbanArantzabalIPhone.jpg

Argazkia: Josetxo Arantzabal

Ahaztu Timoak eta berriz iPhonera. Nik hauxe nabarmenduko nuke: 

  • Teklatua: gehien harritu nauena da, duda barik. Zuk idaztea gura duzuna zer den badakiela dirudi. Antzarrak perratzera oraingo sms-ak bidaltzeko modua! Teklatu honek mila buelta ematen dizkio. (ñ-rik ez du eta guk bustidura hori asko erabiltzen dugu, baina 🙂
  • Nabigazioa: oso bizkorra, wifietara konektatzeko abilidadea du iPhonak (Espaloian eta Oñatiko Gaztelekuan oso ondo dabil). Safari bidez, ondo.
  • GPS antzerako bat ere bada. iPhoneari nondik norakoa sartu eta segituan egiten dizu ibilbidea. Oñati-Elgeta sartu nion eta ematen ditu kilometro kopurua, ibilbidea markatu, satelite bidezko ikuskera ere badu, baita idatzizko azalpenak ere.  Google earth-en antza hartu nion.
  • Ukipen-pantaila: Atzamar bikin egiten dira zoomak, oso modu bizkor eta erabilgarrian. bertikalean eta horizontalean ikusi daiteke dena. Batzuetan modu batera komeni da eta besteetan bestera… telefonoari buelta ematea besterik ez. Efektu hau oso baziloia da.
  • Agenda: iCal ezagutzen nuen eta horixe bera da. Ona.

Erlojua, kronometroa, eguraldia, tenperaturak, ipotxa, erretratuak etaratzeko makina kalitateduna, erretratu albuna, 8 GB… Ez da pisutsua eta bateria autonomia ona du. Ederra katxarroa!

ABC-ko hau ez da kazetaritza. Domingo Iturbek burua altxauko baleu…

by arantzabal

Domekako ABC-tik:

Una de las calles de la localidad guipuzcoana (sic) de Elgueta (sic) se denomina «Domingo Iturbe», en recuerdo y homenaje al que fue dirigente de ETA, con el alias de «Txomin», durante la primera mitad de la década de los 80, precisamente la más sanguinaria en la sanguinaria historia de la banda terrorista. Fue la etapa en la que la banda introdujo el coche bomba.

Titularra: La ley de Memoria Histórica  “olvida” eliminar las calles de homenaje a etarras

Puta idearik be ez dauke! Gure Domingo Ameriketara fan zan eta urriakin negoziuak egindda aberastu ei zan. Nik ikasittako eskoliak horixe izenoi zeukan eta Txomin Iturbe arrasatearra baiño lehen jaiotakua zala Domingo ez dago dudarik.

Serixua da gero periodikua aukeratzia!

Aibalaletxe! Elvis!

by arantzabal

Aibalaletxe! barre egin dot ba. Gustora barre egin be. Cristina Garmendiak esaten ei dau “Kontua ondo pasatzia da, nork bere buruaz barre egittia, mundu guztiak dakixen moduan, oso osasuntsua da-eta!” Barre egitterik gura? ba hemen erretratu potentia. Neure buruaz barre egitteko modua da Etxebarri blogian jartzia:

Iban Arantzabal =Elvis

Eta erretratu gehixago, blogosferan ezagunak diran jentiarenak. Patxi Traperok berriz be emon dosku edukixa. Eskerrik asko Patxi. Demasa haiz, gero!

Euskalbar

by arantzabal

Ez galdu denborarik hiztegixak kontsultatzen: erabilli Euskalbar, bajatu Euskalbar. Hiztegixak kontsultatzeko modu onena!

Ez dago motiborik ez erabiltzeko:

  • Ona da.
  • Erabiltzeko erreza
  • Bizkorra
  • Duan (soft libria)
  • Billaketa aurreratuak egitteko modua
  • Hiztegi pillo bat
  • Kontsultarako aukerak

Euskalbar Firefox-erako tresna-barrixa da (Explorerrekin bazabiz be denboria galtzen zare, aldatu firefox-era) , euskera-gaztelera itzulpenak egitten laguntzen dau, esaterako. Ingelesetik be bai.

Honek hiztegixok kontsultau leikez da batian: Euskalterm, Elhuyar, Hiztegia3000, Euskaltzaindia, ItzuL posta
zerrendaren artxiboa, Harluxet, Mokoroa, ZT Corpusa, Opentrad
itzultzaile automatikoa eta XUXENweb zuzentzaile ortografikoa) Eta baitta Bergara aldeko hiztegixa (ondio netkam.com-en).  Euskalbar 3.0 bertsiñuan dago eta Addons.Mozilla.Org (AMO) webgune ofizialian topauko dozu.

AMOko arautegixak erabiltzaillien komentarixo positibuak eta landuak jasotzia eskatzen dau. Egin probia eta ez ahaztu komentarixua webgunian lagatzia. Euskalbarren lan-taldiak merezi dittu bai komentarixo positibuak eta baitta egindako lanaren errekonozimendua be.

Eskerrik asko Euskalbarlarixei.

Zer egin anonimoekin?

by arantzabal

Akaso galderak behar luke: “zer egin gura ez ditugun anonimoekin?” zehatzagoa litzateke, seguruenik.

Lagun batek bidali dit hauxe (kasua erreala da):

Iban, ez dakigu zer egin. Pertsona bakarrak lagun askoren artean jasotako proiektua kakaztu (nahi) digu. Primeran hasi ginen; proiektuak hasieratik izan zuen estimazioa jendearen artean. Bisita mordoa izaten genuen eta parte hartzea ere oso handia zen. Herritarron arteko komunikazioa aberasteko eta indartzeko tresnarekin asmatu genuela sinistuta geunden.
Baina, bat batean, anonimo bat hasi zitzaigun batere logikarik ez zuten komentarioak egiten. Hasieratik ikusi genuen honen asmoa ez zela iritzia ematea edo parte hartzea. Proiektua izorratzeko komentarioak ziren; jendea nazkatzeko komentarioak. Eta hala gertatu da: jendea nazkatu egin da. Hala esan digute ingurukoek eta lagunek. Jendea gero eta gutxiago sartzen da gure webgunean, eta komentarioak izugarri jaitsi dira.
Hau omen da Internet. Hala entzun nizun proiektua martxan jarri aurretik izandako batzar batean. Baina, Internet hau bada ere, guk arazo honi irtenbideren bat eman behar diogu. Eta ahal den azkarren, gainera. Zuk zer egingo zenuke, Iban?

Nik egingo nukeena, laburtuta (e-posta jakinez gero):

  1. Zuen webgunean albiste bat egin joko-arauak zein diren azalduz. Guk goiena.net-en arau hauek ditugu. Erakutsi zuen webgunean ezin dela edozer egin, serioa dela gunea.
  2. Karta atsegin-atsegin bat idatzi eta ezizendun horri zuzendua. Berari bidali. Zuek arazotzat daukazuena komentatu e-posta batean.
  3. Esan Internet askatasuna dela, baina erabiltzen jakin behar dugula askatasun hori. Askatasuna ezin da edozelan jokatzearekin parekatu, eta bera editorea ez den webgune batean gutxiago.
  4. Zuen webgunean erantzunak ematea libre dela, baina horrekin espero duzuena albistea garatzea, osatzea, hobetzea dela. Baita iritzi ezberdinei lekua egitea ere, baina beti, errespetutik.
  5. Ez zaudetela anonimoei plaza eskaintzearen kontra, baina aipatu zuen webgunea egokiago ikusten duzuela izen-abizendun jendeak hornitua ahal bada, edota gutxinez anonimotasunaren izaera aprobetxatzen ez dutenekin.
  6. Badaukala gura duen moduan idazten jarraitzeko aukera. Zabaldu dezala blog bat. Blogak.com, blogari.net… badaudela modu erraz eta doakoak. Han bai, han esan eta idatzi ahal izango duela gura duena, bideoak jarri ahal izango dituela, podcastak egin… bera izango dela bere buruaren editore eta “zentsore”. Askatasun guztia izango duela.

Eta ez badu kasurik egiten?

  1. Jarri webgunean posta helbidea derrigorrezko, iritzia eman ahal izateko. Helbide hori konfirmatzekoa izan behar da. Horrela beste gutunen bat ere bidali ahal izango da.
  2. Umorea izanez gero saiatu berriz beste gutun batekin. Ia bigarrenean kasu egiten duen…
  3. Lehenengo gutun horren sinatzailea izan daiteke hedabidearen zuzendaria. Bigarren gutunean gunean bertan parte hartzen duten batzuk, edo zuzendaritzakideak, edo zuen elkarteko kide ezagunak, edo… dozena erdi izatea ondo. Izen-abizendunak izateaz gain ahal den jende pisutsuena.
  4. Oraindik ere kasurik ez? ba e-posta horri oztopoa jarri. Blokeatu partehartzea.
  5. Beste e-posta batzuk ere sortu ditzakeela? ba bai, baina beti egongo da berriz ere sarbidea moztea. Sortu blokeatuen zerrenda.
  6. Jarraitzen duela? izan zuek hobeak teknikoki bera baino. Antzeman, aurreratu.
  7. Jende horren zein beste edozeinen mezuak ere tentuz jarraitu eta tonoz kanporako guztiak ezabatu. Ez joan itsu-itsuan ezizen baten kontra. Egin jarrera baten kontra, berdin da izena.

Eta oraindik ere ez?

  1. Ba erregistroa gogortzea da posibilitate bat, baina ez nuke erabiliko azken-azken puntura heldu arte. Eta orduan ere… Nik zalantza dut. Sinisten dut jendea ez dela berez oker-okerra.
  2. Puntu honetara helduta beste zerbait pentsatu behar, baina izan daiteke berari blog bat egitea eta txukun-txukuna egitea eta blog komunitate berri bat zabaltzea zuenean eta bera horko parte bat izatea. Izango luke anonimo jaunak edo andreak bere lekua eta finito! Blog horren irakurleak? bere jarreraren arabera, zelan ez. Normalean gutxi. Baina zuen webgunean bake piska bat eta berriz ere informazio serioa emateko aukera.

Eta hau guztia planteatzen egote hutsak esan gura du webgunea irakurri egiten dela, komentatua dela, kalean ere badagoela jarraipena, sarean baduela eragina… Zorionak! gauzak ondo egiten zabiltzate!