“Neure ama Roman hil da” erakusketa Donostiako San Telmon

Atzo, urtarrilak 22, inauguratu zen Donostiako San Telmo Museoan 1966 | Gaur Konstelazioak izenburu duen erakusketa. Ehunka lagun eta autoritate ugari, Donostiaren hiritartasun kulturalaren programan dago eta. Oteiza, Txillida, Basterretxea, Mendiburu, Zumeta, Sistiaga eta abarrek osatu zuten talde gogoangarria oroitzea eta gorestea du helburu.

Erakusketaren barruan ezusteko atsegina: Iratxe Jaio + Klass Van Gorkum artista kontenporaneoek (euskalduna lehena, holandarra bigarrena) buruturiko Neure ama Roman hil da erakusketa. Hiru osagai ditu: 1) 34 minutuko dokumentala. 2) Grafitoen 900 marrazki karpeta plastifikatuetan, banan-banan ikusteko moduan. 3) Horietako hainbat horman ipinita.

Kalitate tekniko handiko dokumentalean, faltsutasunaren aldeko bi lagun (Juan Santos Yanguas eta Julio Nuñez) eta benetakotasunaren aldeko beste bi (Koen Van den Driessche eta Juan Martin Elexpuru) agertzen dira ostrakak komentatzen eta bakoitza bere arrazoiak ematen. Osagarri gisa, E. Harrisek aztarnategia bisitatu zueneko sekuentziak, Eliseo Gil, Idoia Filloy eta beren abokatuaren hitzak, eta abar.

Ez genuen astirik izan dokumentala osorik ikusteko eta ilustrazio guztiak begiratzeko, baina aho-gustu onarekin irten ginen. Gure herriko ofizialtasuna gaia modurik itsusienean lurperatu nahirik ari denean, txalotzekoa iruditzen zaigu Iratxe eta Klassen ausardia, ahalegina eta artea.