Amesetan egindakuakin barreka

Data: 2008(e)ko abenduaren 18a Egilea: marijo

Despertadoriak jo dabenian “flipatzen” esnatu naiz. Amesetan egon naiz, antza, ta horixe etorri jat derrepentian gogora: amesetia. Benetan, penia amesetan ikusi dotena grabatzeko aukeraik euki eztotela! Zelako barriak bota ditxuten lankidiari deskribitzen saiatu naizenian.

Han nitzan, atzera be, Durangoko Kafe Antzokian. RafaRuedan konziertua ikustera jun giñan, abenduan 5ian egin giñuan moduan. Baina oinguan Plateruena leporarte beteta zeuan; etzan iñondako lekuik geratzen. Ta, horreatik eneban ulertu zela derrepentian jentia lekua itxen hasi zan. Baten bat zetorren eta jentiak “pasillotxua” itxia lortu zeban. Nor agertuko eta… Idoia Zenarruzabeitia lehendakariordia abrigo luze-luze batekin. Platerueneko eskenatokiko eskaileretara arrimau zan; eskailerak direnak baino zabalauak ziren amesetan, eta hantxe makurtuta, eseri zan, bueltia emon zan, publikoarengana, eta buruan zeukan kapela burutik kentzen zeban bitxartian, sekulako erreberentzizixia egin dau!
Ointxe akordatzen, oindio barriak urtetzen dozt!

Ta, segiduan konziertua hasi da. Txaketa-pranka jantzi dotore batekin urten dau Rafak eszenarixora. Trajian koloria! Urre kolorekua! Brillante brillantia! Ta, buruan metxa rubixo-rubixuak! Oindio ikusten naiz, laguna onduan daukatela, ahua zabal-zabalik: eskaileretan idoia “super abriguakin” eta eszenarixuan sekulako diztirak botatzen ditxuan rubixua!

Holakuak gehixautan amesetan egin biharko ditxut, ze, bota ditxudan  barriak mortalak izan die!!!

Kategoriak Sailkatugabeak | Etiketak | 4 iruzkin

On line ikastaroen aldeko eta kontrakoak

Data: 2008(e)ko abenduaren 14a Egilea: marijo

Proiektuen zuzendaritza delako ikastaroan izena eman nuen, Asmoz Fundazioak antolatuta. Beti gustatu izan zait lan taldean aritzea eta taldea bera eta egin beharreko lana antolatzen jardutea. Horregatik, ikastaroaren berri izan nuenean ez nuen birritan pentsatu eta izena eman nuen, matrikulazio epea amaitu baino ia bi hilabete lehenago-edo.
On line egiteko ikastaroa da, eta nire lan jardunaren ordutegi desantolatua tarteko, egokiagoa iruditu zitzaidan era horretan ikasten hastea. Nahi dudan orduan lotzen naiz ikastaroaren webgunera eta nahi dudan lekutik. Hori abantaila da niretzako.

Igarri diot, baina, ikastaroa on line izateagatik desabantailarik: pantaila aurrean lan egiten dudan arren, ez naiz oraindik testu luzeak-eta pantailaren ordenagailutik irakurtzera ohitzen. PDFak jaisteko aukera ere ematen du webak, inprimatzeko; baina oraingoz ez dut aukera hori egin.

Badira ppt erako dokumentuak ere pdf eran jaitsi barik bertan ikustekoak, baina egileak ez du kontuan hartu pantailarako erabili beharreko letra koloreak eta fondo koloreak ezin direla papererako edo ppt presentazioak egiteko erabiltzen diren pantaila handi baterako modukoak; kolore lasaiak eskatzen dituzte ordenagailuan irakurtzeko testuek, ez larrosa, gorri, hori eta bestelakoak.

Klase presentzialekin ikasi izan dut beti, on line egin nuen beste ikastaro bat kenduta. Orduan ere, antzeko “akatsak” sumatu nituen. Asmoa praktikoa da oso, eta gainera teknologiak berak ikasteko prozesua oso parte-hartzailea izaten dakar, foroen bitartez, lotura interesgarrien aukeren bitartez, ariketen bitartez…

Hala ere, praktika falta dut. Ordenagailu aurrean ordu dezente egiten ditudan arren, era horretan ikasteko ohiturarik ez dut eta hori kosta egingo zait; laster pdf-eak inprimatzen hasiko naizela uste dut, gutxienez, errepasatzeko sesioak egiteko eta begiek atseden hartu dezaten.

Kategoriak Sailkatugabeak | Etiketak | Iruzkin 1

Laguna haurdun dagoela, eta ni negarrez

Data: 2008(e)ko abenduaren 9a Egilea: marijo

Benetan gauza bitxia gertatu zitzaidan atzo. Lagun batek deitu zidan
haurdun dagoela esateko eta, emozioak eraginda-edo, negar malkoek ihes
egin zidaten. Jakin banekien Nagorek umeak izatea nahi zuela, eta Ismak
ere ezetzik etziola esaten gaia ateratzen zen bakoitzean. Etorriko zela
eguna esaten zioten elkarri. Baina sorpresa ikaragarria hartu dut.

Berehala, ordea, nire erreakzioan arraro sentitu naiz. Beragatik poztu
naizelako eta maite ditudan lagunak direlako izango zen negarrari
ekitearena, baina arraro sentitu naiz, oso arraro.
Juergarako
laguna dut Nagore ezagutzen garenetik eta oso ondo konpontzen gara.
Orain dela bi urte eta erditik bakarrik ezagutzen gara. Denbora gutxi
izan daiteke, baina konplizitatea izan dugu alde eta harreman polita
eraiki dugu bion artean. Aurrerantzean ere hala izaten jarraituko du,
baina juergarako laguna izaten jarraitzea ez da hain erraza izango;-)

Kategoriak Sailkatugabeak | Etiketak , | 3 iruzkin

Azokako leihotik, asteburu osoa

Data: 2008(e)ko abenduaren 6a Egilea: marijo

barikua 3 093 baja

Atzo arratsaldean iritsi nintzen Durangoko Azokara. Izaskun Ellakuriagari esku bat botatzera aurten ere durangokoazoka.com eta bestelako kontuetan.
Hortaz, hemengo kontuak, egunotan, handik ekarritakoak izango dira.

Azoka (I)

Azoka (II)

Azoka (III)

Argazkia: Txelu Angoitia

Kategoriak Sailkatugabeak | Etiketak , | Utzi iruzkina

Franco Antzuolako ohorezko alkate izan da 59 urtez

Data: 2008(e)ko abenduaren 1a Egilea: marijo

Antzuolako Udalak ere izendatu zuen Francisco
Franco Bahamonde herriko ohorezko alkate. 1949ko abuztuaren 22an izan zen.
Pilar Etxaniz Zutik-Aralar-EBko zinegotziak bidali dit gaur orduko aktaren
kopia bat.

Egia aitortzeko, nik ez nekien Antzuolako
ohorezko alkate izan dela kaudilloa 59 urtez. Pentsatzekoa zen , inguruko
herrietan ere horrela egin “beharra” egon zenez, Antzuolan ere egin
zutela. Baian sorpresa hartu dut Pilarrek bidalitako kopiarekin. Gehiago
oraindik, nola ez zaion inori orain arte akordatu izendapen horrena. Tira,
zerak dioen moduan, hobe berandun inoiz baino.

 Franco

Asteazkenean plenoan Zutik-Aralar-EB taldeak aurkeztutako mozioa eztabaidatuko dute, hain justu ohorezko titulu hori kendu diezaion Antzuolako Udalak.

59 urte beranduago bada ere, egin dezatela bai!

Mozioak zera dio:

“Eskubide zibil, politiko eta sozialen alde borrokatu zirenen oroimena berreskuratu, gertatutako guztia argitu eta urte luzeetako diktadura ilun eta mingarria jasan behar izan zuten pertsona guztien duintasuna aldarrikatu nahi dugulako zera proposatzen diogu udalbatzarrari:

1. Francisco Franco Bahamonde Ohorezko Alkate izendapena kentzea, 1949ko abuztuaren 22ko akordioa balio gabe utziz.

2. Diktadura frankistaren biktima guztien errekonozimendua adieraztea.

3. Oroimen historikoa eta egia berreskuratzeko lanetan diharduten pertsona eta taldeen ahalegina eskertzea.

Kategoriak Sailkatugabeak | Etiketak , | Utzi iruzkina

Karneta? Ez, ekarri telefono mugikorra, itzuliko zara-eta

Data: 2008(e)ko azaroaren 30a Egilea: marijo

Joseba Azkarraga Justizia eta Lan sailburua ez zen Confebasken urteurren ekitaldian egon, “Errege Etxeak nortasun agiria ematera “behartu” zuelako (Berria).
Baina ez dakit ba nortasun agiri “nazional” horri garrantzi gehiegi ez ote dion eman Azkarraga jaunak. Herenegun gasolindegian gertatu zitzaidanagatik diot. Gasoila ordaintzera joan, txartelarekin, eta akatsa ematen zuenez, dirua ateratzera joango nintzela esan nion gasolidengikoari. “Karneta-edo utziko dizut, nahi baduzu”. “Karneta? Ez, ez. Utzidazu mobila”. “Mobila?”. “Bai, karnetaren bila etorriko ote zaren ez dakit, baina mobilaren bila ziur naiz itzuliko zarena”.
Goizeko 8ak jo barik ziren, eta ez nuen harekin eztabaidatzeko batere gogorik izan; ezta erreakzionatzeko ere, “ez daukat mobilik” esatea ere ez zitzaidan okurritu.
Hortaz, telefono mugikorra han laga eta kutxazain batera joan nitzen. Dirua atera, gasolindegira itzuli, dirutan ordaindu eta nire telefonoa errekuperatu nuen.
Gernikatik Gasteizera bidea hartu nuen segituan, eta orduan gogoratu nintzen Azkarragaren eta Errege etxearen arteko hartaz; alegia, karneta eskatu ziotelako ez zela Confebasken 25. urteurren ekitaldira joan “gure” lan sailburua. Tira, izango zen bada Espainiako erregea ere gonbidatuta egon zelako, pentsatzen dut, ze, gasolindegikoek ere ez dituzte jada NANak nahi!

Kategoriak Sailkatugabeak | Etiketak | Utzi iruzkina

Genero indarkeria hedabideetan

Data: 2008(e)ko azaroaren 25a Egilea: marijo

Horrela titulatu du Kazetarion Berdinsarea: Genero ikuspegia duen euskal kazetarien sareak gaur bere blogean.
Kazetarigintzatik genero indarkeriarekin zerikusia duten albisteen tratamendu zuzena aldarrikatzen du Berdinsareak; era horretako eraso bakoitzaren atzetik historia pertsonalak, indibidualak, egon arren, hedabideen lana ez da hori azpimarratzea, baizik eta, “arazoaren jatorrira jo behar dugu kazetariok, eta argi azaldu emakumeen
aurkako indarkeriaren oinarria sistema patriarkalean eta genero
desberdintasunean dagoela, hots, historikoki gizonek emakumeak mendean
hartu izanaren ondorio dela”.
Bat nator erabat Berdinasareak hemen proposatzen duenarekin.

Kategoriak Sailkatugabeak | Etiketak , , , | Utzi iruzkina

Denon diruak eta batzuen fama

Data: 2008(e)ko azaroaren 24a Egilea: marijo

ASTELEHENEKO GOIENKARIA (2008-11-24)

Euskal kulturak
hainbat titular ikusgarri eskaini dizkigu asteon. Eliseo Gil arkeologoak egindako lanaren inguruan Iruña-Veleiako
aurkikuntzatako batzuk faltsuak direla jakin dugu. Zaharberritzaile lagun batek
esan didanez, Gilek itzelezko ibilbide profesionala dauka eta dudan jarri ditu
batzordeak baliabide zientifikoak ez dituela behar bezala erabili.

Hori gutxi balitz, Madrazok eta Azkaratek 702.000 euro emango dizkiote Kepa Junkerari euskal musika berritzeko eta kanpoan zabaltzeko.
Antzeko programa baterako, hau da, euskal musika gure mugetatik kanpo
sustatzeko, Jaurlaritzak 230.000 euro aurreikusi ditu, Euskadiko Soinuak
programaren barruan, 2009ko aurrekontuetan. Proportzionaltasun printzipioari
jaramonik ez, antza.

Horren haritik Javier Muguruzak euskal kontseiluaren aholkulari izateari laga dio. Euskal
kulturaren alde egin behar du administrazioak, bai. Baina euskal kultura
orokorrean hartuta eta ez sortzaile baten edo beste baten proiektuak bakarrik
bultzatuz. Horretaz ere jardun dut zapatuan Gernikako Trinkete “antitxokoan” Rafa Ruedarekin. Disko berria aurkezten dabil eta Gernikakoa bigarren
kontzertua zuen (abenduaren 5ean Durangoko Plateruenean). Esaten nion euskal
kultur sortzaileek beren iritzia agertu beharko luketela Jaurlaritzak hartutako
erabakiaren inguruan. Durangoko Azoka horretarako erakusleiho aparta izan
daiteke.

Kategoriak Sailkatugabeak | Etiketak , , | Utzi iruzkina

Gaztelaniara bihurtzekotan, barriz be

Data: 2008(e)ko azaroaren 19a Egilea: marijo

Gaur ere atzera ernegau dot. Elebakar bihurtzeko puntuan izan naiz barriz be, gaztelaniazo elebakarra. Ala beti gu izan behar ote gara tonto lanetan jarduten dogunak?

Zelako biharra daukun euskaraz lan egin nahi eta euskaraz ez dakitenekin elkarlanean aritu behar dugunok. Ze, nirea, kasu bat baino ez da; pentsatzekoa da herri elebi honetan egunerokoa dela. Baina nik ernegau egiten dot. Batez be, barriz be, euskaldunok galtzen ateratzeko erabakiaren alde egin dalako. Jakina errazagoa dala hizkuntza bakar baten jardutea eta dokumentazioa sortzeko orduan iñori etxakola gustatzen birritan jardutea. Baina, aizu! Euskaldunak gara eta euskaraz lan egiten dogu! Horixe da gure aukeria.

Lan bilera euskaraz egin dogu: Legebiltzarrean aurkezteko ekimena aurkezteko bilera. Ordubetez euskaraz, lege baten inguruan eta bera hobetzeko egin daitezkeen proposamenetaz, adituei entzuten. Interesgarria oso eta aberasgarria era berean. Gainera, jaramon egin eta saiatuko gara, dagokigun heinean, ekimen horrek eztabaida parlamentariora eramaten. Baina, aldez aurretik, erroldara aurkeztu behar da ekimena ta hortxe arazua! Dokumentazio osoa gaztelaniaz dago! Sormen lana egiteko be itzulpengitzan jardun behar.

Telefonoz deitu (lana aurreratze aldera) ia ekimena euskaraz duten galdetzeko eta ezetz! Aukeratu egin behar izan zala, eta danok euskaraz ez dakitenez, ba… Bikain! Oraingoan ere bardinak galtzen. Barriro be euskaldunok ez gara izango ekimenak aurkezten orijinalak, jatorrizkoa gaztelaniaz dagoelako (ta, lan bikoitza egin beharko dogu, dokumentazio hori lehenengo itzuli egin beharko dogulako aurkeztuko dogun ekimena landu ahal izateko).
Elebakarrek jakingo balute zenbat lan ordu egiten dogun gure eskubidea dan hori praktikan jartzen…  Eta, elebidunek ere horixe bera gogoan izango balute beti horixe bera…

Kategoriak Sailkatugabeak | Etiketak , , | 2 iruzkin

Araba aldeko paisaiak

Data: 2008(e)ko urriaren 28a Egilea: marijo

legutioko irlatik

Aldatu dugu ordua. Gauez laneratu eta gauez etxeratzen hasi naiz asteon. Igarri ere dezente igarri dut umorean. Tristezia antzeko batekin nabil egunotan. Ez dakit benetan igartzen duen norbaitek energian aurrezten duela ordu aldaketarekin, baina nik neuk behintzat, nire pila propioak kargatzeko erabiltzen nuen argindar barik geratu naiz: eguzkia, egunsentia, iluntzea, zeru urdin-gorrixkak…
Hola behar duela badakit; negura iristen goazen heinean behintzat. Baina ordu aldaketara ohitu behar du nire gorputz eta buruak. Eta, era honetako argazkiak atzera ikusteko aukera gutxiago ditudala jakin arren, udaberriko loreak ere usainduko ditugula maizago gogoratu beharko dut.

Kategoriak Sailkatugabeak | Etiketak , , | Utzi iruzkina