Multzo polita bildu zen atzo Andra Mari Zuriaren Plazan egindako elkarretaratzean. Bestalde, hedabideek ez diote duen garrantzirik eman 8. urteurren honi. Nahiz eta guztiei (82 helbide, hedabide eta kazetarienak) jakinarazi genien hamabost egun lehenago eguna hurbiltzen ari zela, DNAk bakarrik egin du kronikatxo bat “de motu propio”. Besteek ez kronika, ez elkarrizketa, ez zutabe. Gehienez ere prentsaurrekoaren berri eta bidalitako deialdien eta agirien laburpentxoak. Eta horiek ere kontatuta. Berriak prentsaurrekoaren berri ekarri zuen luze samar, argazki eta guzti. Diario Vascok ere egin zuen laburpena, Efe agentziak landutakoa. Correok digitalean bakarrik. Besteetan, papereko edizioetan behintzat, hitzik ere ez. Euskadi Irratia, Radio Vitoria eta Onda Vasca ere izan ziren prentsaurrekoan. Ez dugu horien jarraipena egin.
