Ikasketak aurrera doaz, denborak ere aurrera egiten du eta honekin iritsi beharreko momentua heldu da; Bilbo uztekotan nabil.
Bilbora Errealak Txapeldunen Liga jolastu zuen garaian etorri nintzen, gogoratzen dut bai Unibertsitatean kale egindako lehen klaseak Greziara joan izatearen kausa; beranduago 3-0 galdu genuen San Mamesen eta beranduago Bigarren Mailara jeitsi zen Erreala. Orain, Lehen Mailara igotzekotan gaude eta nik Bilbo utziko dut; behintzat behar duen lekuan utziko dut.
Polita izan da Bilbon ikastea, pertsona eta lagun asko ezagutu ditut, baita leku bitxiak ere; Kafe Antzokia ederki asko ere ezagutu dut, haiek garaiak Azkunak itxi nahi izan zuenean, orduan konturatu nintzen zenbat maite nuen Kafe Antzokia. Bilbo asko aldatu da, iritsi nintzenean Tranbia egiten ari ziren, Unibertsitatera behintzat ez zen iristen, gogoratzen ditut Ria 2000 eta bertako lanak. Ez zegoen Zubiarterik, hau egiten ari zirela, zenbait okupa bertara igo ziren protesta moduan.
Olabeagako Gaztetxea itxi eta irekierak, FANT Zine Jaialdiko zenbait edizio, Doctor Deseok zenbait disko atera izan ditu Bilbon egon naizen bitartean, Athleticek ere bere gai on eta txarrak izan ditu, gogoan dut ia ia nola Errege Kopa irabazi zuten; a zer nolako eromena Pozasen; azken urtean Europe Leaguen izandako istiluak. San Mamesen bakarrik bitan izan nahiz, bata Erreala ikusten eta bestea Sevillaren aurka, Ligako partidan lasai, ez nuen Errege Kopako finalerdietara joateko aukerarik izan.
Bilbora iristerakoan ez zegoen Fever edo Santana27rik, baina hala ere ez dut asko maite; nahiago ditut Bilbi edo ta San Frantzisko kaleko tabernak, horixe baita Bilboko gaua. Bai, oraindik ez dut Bilbo utzi baina nolabaiteko nostalgia daukat jada, eramusa bukatzen zaion ikasle atzerritar bati amaitzen zaion moduan.
Hala ere oroitzapen onak gordeko ditut, hiri honetan bizi izan ditudanak liburu bat egiteko modukoak baitira, hala ere ez dut agurrik esan nahi, gero arte; besterik ez. Batzuetan garai batzuk bukatzen dira eta beste garai batzuk iristen dira, oraingoan Bilbori gero arte esango diot, baina seguru elkar ikusiko dugula.
