Mikel Irizarren bloga

Goienkaria, 2007.10.11

Ez nahiz bereziki garbizalea hizkuntza
kontutan. Une historiko honetan, erabilera du erronka nagusia
euskarak eta hori lehenesten dut nik ere. Baina amorru ematen didate
euskaldun petoen utzikeriak erdarekiko, hain zuzen utzikeria
direlako.

Horren adibide oso garbia bihurtu da
Arrasateko Garaia Berrikuntza Gunea. Gaztelaniaz ‘Polo Garaia’
jarri diote izena eta non euskarazko hedabideak ere izen hori hasi
diren erabiltzen horrela, ‘copy-paste’ eginda; ‘Berrikuntza
Gunea’rena gustatzen ez bada, sikiera ‘Garaia poloa’ esateko
esfortzua ere egin gabe. Lehen aldiz Euskadi Irratian entzun nuen eta
berehala helarazi nien oharra. Min handiagoa eman dit ordea
goiena.net albistegian idatzita ikusteak. Zuek
ez, mesedez!

Post scriptum. Zintzo izate aldera, albistegian bertan ondo idatzita dago, baina harpidedun postara iritsi zitzaidan mezuak hauxe zioen:

Polo Garaian Parke Teknologikoen VI. Nazioarteko Batzarra egingo dute 

Espainiako Parke Teknologikoen Nazioarteko VI. Batzarra egingo dute urriaren 17an eta 18an Polo Garaia Berrikuntza Gunean. Berrikuntza izango dute hizpide, teknologia, arkitektura edota gastronomia bezalako gaietan. 

Gehiago irakurtzeko: http://www.goiena.net/arrasate/albisteak/polo-garaian-parke-teknologikoen-vi-nazioarteko-batzarra-egingo-dute

Goienkaria, 2007.10.05

Emeki-emeki, ari da garatzen ibarreko
bidegorri sarea. Eskoriatza eta Arrasate kasik jarraian egiteko
moduan leudeke –ez bainaiz oraindik ibili- oinez nahiz bizikletaz,
patxada ederrean. Gogora ekarri dit Urbina-Maltzaga deitzen zen
egitasmoaren eztabaidan nola saiatu ginen talde bat bidegorria
egitasmoaren baitan txertatzen. Lan hari eta beste batzuei esker,
bidean da bide berri gorria.

Bi puntu. Bat, bidegorriak erabiltzen
dira baliagarri diren heinean. Zati txikiek ezer gutxi balio dute,
sarea behar da. Zatiak sarean lotu ahala hasten da bidegorria
ohituretan eragiten. Eta bi, bidegorria gehi tranbia eta autobusa,
ibarreko mugikortasuna goitik behera aldatu behar da. Autoentzat
biltegiak, eta garraio zentzuduna, iraungarria.

Goienkaria, 2007.09.28

Hala omen zebilen beti Pertur, gitarra
aldean, baita desagertu zenean ere. Kantatzeaz aparte, kantu batzuk
ere eragin zituen: Gontzal eta Xeberrik ‘non ote zara?’ kantatzen
zioten, Gorka Knörr-ek ‘Txakurrak’ izenekoa…

Hogeita hamar urte luzez esan digute
Pertur ETAk desagerrarazi zuela. Askori interesatzen zitzaielako,
dudarik gabe. Baina, asteon, tesi sinesgarriagoa eman da ezagutzera
Donostiako Zinemaldian: italiar neofaxistek bahitu ei zuten,
espainiar poliziaren esku uzteko. Gorpua aurkitu arte ezingo da
guztiz berretsi, ordea, eta auskalo oraindik posible den.

Niri, edonola ere, duintasun ariketa
itzela iruditu zait. Giza talde batek aginteari erakutsi dio gezurra
argitzeko ahalmena. Hurrengoan har bezate kontuan.

Goienkaria, 2007.09.21

Debagoienak, gehienetan, liluratu egiten nau.
Seguruenik, kanpotik bertaratua izateak aukera ematen dit begi bereziz
ikusteko. Etxenike fisikari eta gizon handiari entzun berri diot hitzaldi
bikaina, eta han ondoko esaldi-txantxa hau: ‘Einsteinen ekuazio famatuak
(E=mc2) adierazten duena da E=MCC. Pentsa zer nolako energia dagoen
kooperatibetan, nahiz ez dakidan beraiek jabetzen diren.’

Nik ere energia itzela ikusten dut
Debagoienean. Baina batzuetan ez dakit zergatik indar horri hainbeste traba
sortzen zaizkion, ez dadin eragile izan. Mankomunitatearen kargu banaketak eman
dit zer pentsa. Gehiengo berriari erantzuten dio, nola ez. Baina eragileago
izango zen kolore gehiago hartu izan balitu. Ez da hasiera ona, ez dakit.

Goienkaria, 2007.09.14

Eguraldi politiko eskasarekin abiatzen
dugu ikasturte berria. Bake prozesuak etena izan ondoren, Espainiako
hauteskundeak datoz sei hilabete barru. Nekez argituko da denbora
horretan garrantzizko ezer, kieto jarraituko dute gatazka
politikoaren zutabeek.

Batzuk lehergaia astinduko dute eta
kale giroa, besteek polizien porra eta epaileen mailua. Sozialistek
egingo dituzte senperenak eta bi gobernuan jarraitzeko, eta
popularrek beste bi gobernua eskuratzeko. Ostikada galantak emango
dizkiote elkarri, gehienak euskaldunon ipurdian.

Dena zarata izango da udazken/neguan.
Zarata zatarra, desafinatua, interesatua, begibakarrekoa, puztua…
Hobe bolumena jaistea filmaren soinu bandari, osasunez eta gogotsu
iris gaitezen udaberrira.

Oraingoz, papererako idazten dudana bakarrik ekarriko dut blogera, irakurleari idazteko aukera irekitze aldera. Lan egoera berriak ez dit gehiagorako betarik uzten eta, gainera, euskarazko blogosfera asko hedatu da, hasierako obligaziotik libreago sentitzen naiz.

Goienkaria, 2007.09.07

Hegoaldean ez dugu ohitura handirik, baina Iparraldeko alderdiek -Frantziaren eraginez- udako unibertsitate irekiak antolatzen dituzte, etorkizunaz hausnartzeko. Aurten Abertzaleen Batasunak deituta, hitzaldi bat ematea egokitu zait. Eta, giroa lagun, neuk ere egin ditut nire hausnarketak.

Bat. Hegoaldean ez dago hausnarketa irekien beharrik? Ez dago adorerik?

Bi. Non ari gara uzten Iparraldea hegoaldekook? Apaingarri gisa erabiltzen dugu sarri, lurralde menpekoa bailitzan. Eta gure premia badute, baina erakusteko asko ere bai.

Izan zere, zinez ikusten ditut Iparraldea eta Nafarroa etorkizunetik hurbilago, EAE zaharkitu hau baino. Hemen indara, han berrikuntza. Eta bihar nehar ditu Euskal Herriak.

Goienkaria 2007.07.27

Zurrunbiloan bizi gara, hara eta hona,
presaka. Eta sasoi honetan, bat-batean, gelditu egiten da dena.
Akordatu orduko, urtean zehar ditugun eginkizun gehienetatik libre
gaude. Denbora bestelako kontutan emateko moduan. Nik, aurten, inoiz
baino gehiago eskertzen dut udako geldiunea. Seguruenik, bizi dudan
–eta bizi nauen- zurrunbiloa inoizko indartsuena delako. Gozatzen
ari naiz, eginkizunak gelditu ahala.

Txoko hau astero betetzea da horietako
bat. Gustuko eginkizuna dut, baina datorren astetik aurrera atseden
hartuko dut, hori ere gustura. Balantze egin izan dut beste urte
batzuetan, trantze hau iritsita. Aurten ez. Besteak beste, akordatu
barik txokoa bete zaidalako. Gozatu zuek ere geldiunea. Etorriko
da-eta zurrunbiloa bueltan.

Goienkaria, 2007.07.20

Ez dut oraindik bisitatu, baina ez zait
denbora asko joango egin gabe. Bestela ere banuen asmoa, baina
lankide baten kontuek biziki piztu didate gogoa.

Lankidea Arrikrutz haitzuloaren
inguruko baserri batean jaioa da eta txikitatik ezagutu ditu kobaren
gaineko gertakari bitxiak. Ondo gogoratzen ditu kobaren lehen
ikertzaileak, karburozko argiekin, tartean Juan San Martin; baita
Arantzazuko ikasleen sartu aldiak eta estuasunen bat ere; eta nola
bera lagunekin barneratzen zen, sikateak putzuetan noraezean utzitako
amuarrainak harrapatzera.

Ustezko artza lehoi agertu zenekoa ere
ez da makala. Honen kopia bat ikusgai omen dago erakusketan.
Bisitaren ibilbidea eta harainoko bidea primeran omen daude
antolatuta. Zer gehiago nahi dugu?

Goienkaria 2007.07.13

Honezkero askoz badakizue fenomeno
bitxia gertatzen dela Elorrion urtero, uztaila hurbildu ahala.
Munduko toki askotatik hasten dira artistak agertzen, baita etxekoak
ere; herriko txoko ahaztuak paraje zoragarritan bilakatzen dira,
argia, ilargia eta hego haizea lagun; jauregietako lorategi ezkutu
misteriotsuak ikusgai jartzen dira, duten edertasun betean; ermita
eta elizetara fededunak bezala fedegabeak ere hurbiltzen…

Musikaire
deitzen zaio Elorrion fenomeno honi. Hainbat asteburutan zehar
gertatzen da, eta ez dago ordaindu beharrik ikusteko. Aurten ez dut
lehenago aipatu, asti faltan ez bainaiz antolaketan ibili. Joan bai,
joaten naiz hutsegin gabe, eta dagoeneko gozatu ederrak hartu ditut.
Programa hemen: musikaire.com