Irakurri dut gaur kazetari profesionalek, gehiegi baitira profesioan ari diren bestelakoak, protesta eguna izan dutela. Lan baldintza eskasak salatzeko, lan hitzarmenik gabe ari diren kazetariengatik salaketa egiteko eta profesio horretan bekarioak hartu duen “garrantzia” salatzeko.
CCOO sindikatuko Maria Martinezek eman dituen datuen arabera, EAEn 1.400 langile inguru ari dira hedabideetan lanean; 774 prentsa, irrati eta telebistan eta 220 bat prentsa kabinete edo bulegoetan. Ba dirudienez, gehien-gehienak lan hitzarmenik ez dute eta gainera, telebista txikietan-eta ari direnen lan baldintzak are okerragoak dira 10-12 orduko lanaldia betetzen baitute eta hori gutxi balitz, mileurista izatea luxua da eurentzat, 700-900 euro inguru kobratzen dutelako.
Gogoan daukat Euskadi Irratian aritu zen lagun kazetari bati “autonomo” egin behar zuela esan ziotenean, lanean jarraitzea nahi bazuen behintzat. Aspaldiko kontua da EITBn egiten diren kontraturik gehienak azpikontratatuko enpresek egiten dituztela eta “etxekoak” autonomo moduan ari direla.
Tokiko komunikabideetan bestalde, saiatzen diren arren, asko dira oraindik lan baldintzak eta baldintza ekonomikoak hobetu beharrean direnak; kasu hauetan, baina egoera bestelakoa da: debaldeko produktua egiten dute, diru sarrera izatekotan publizitatetik datorrena da eta bizirauteko diru publiko behar duten arren, Jaurlaritzak ez du behar den beste diru banatzen. Oraintxe hasi da Jaurlaritza 2008ko aurrekontuak negoziatzen eta ia ba aukerarik dagoen lortzeko tokiko euskarazko hedabideentzako bideratzen den dirulaguntzak duinak izan daitezen. Ze, ziur naiz, goizean protesta egin duten kazetari eta sindikatuek ez dituztela gogoan izan herri prentsa, herri telebista eta irrati lokaletan, edo webguneetan, ari diren kazetari euskaldun finak. Hoiek ere kontuan hartuta 1400eko kopurua dezente gehituko litzateke.
