Euskarazko film bat Oscarretarako bidean eta telesail bat Greziarakoan. Euskaraz egitea muga erreala da? https://t.co/PI12fw0dtE
— NOR ikerketa taldea (@NORikertaldea) October 9, 2015
Datu horiekin, garbi esan dezakegu euskaraz egitea ez dela muga erreala. Are, aukera bat dela. Hala demostratu digute zinea euskaraz egiten segitzen dutenek: ondo egindako lanek errekonozimendua jasotzen dute, dena delako hizkuntzan direla ere.
Gaur egun, teknologia hain eskura izateak, ekarri digu hango eta hemengo zine eta telebista ekoizpenak ikusteko erraztasuna eta ez diegu, jada, muzin egiten ulertzen ez ditugun hizkuntzetan badira ere. Dirudienez, halaxe komentatu dit Pausokako Xabier Zabaletak, telebista serie turkiarrek sekulako arrakasta dute jatorrizko bertsioan entzun eta azpidatzita ikusteko ohitura duten Europako herrialdeetan. Beraz, ez litzaiguke hain arraroa egin behar Pausoka ekoiztetxeak ETB1erako sortu duen “Aitaren Etxea” seriea greziar telebistan erakustea, euskarazko soinuarekin eta grezierazko azpidatziekin. Lastima, ETB2n ez dutela ematen, ordu eta egun berean, euskaraz (eta gaztelaniaz azpidatzita, nahi izatera); batez ere, euskal telebista publikoaren fikziozko produktu bakarra dela kontuan izanik.
Baina, ai! Gure artean bikoizketak segitzen du nagusi izaten. 1941ean Francok erabaki zuenetik «Queda prohibida la proyección cinematográfica en otro idioma que no sea el español»; nahiz eta bikoizketarako agindu hori bertan behera geratu zen 1946an (BOEn 1945eko urtarrilaren 25ean argitaratu zen). Baina, kaltea egina zegoen eta, badazpada ere, gaztelaniaz ez zegoen guztia bikoizten jarraitu da. Agian, horrek ere eragingo zigun, gure filmak, gure hizkuntzan sortutakoak, gainerako hizkuntza-herrietara zabaltzeko konplexua!
Hizkuntza ezin da ez oztopo, ez muga izan. Are gutxiago, gainerako herrialdeetan jatorrizko bertsioak ikusteko ohitura dagoela jakinda eta ikus-entzunezkoei lotuta teknologiak geroz eta errazago egiten duela eduki horri ulertzen dugun hizkuntza eranstea.
Ea bada, Pausokakoek zortea duten eta ixten duten Greziako telebistarekin akordioa, eta ahal dela, beste telebistaren batekin!
