“Badirudi Roomba aspiragailu elektronikoak ireki duela bidea beste batzuk ere etxerako otsein elektronikoen merkatuan sudurra sartzeko, eta niri neuri arreta eman didaten hiru adibide ekarri nahi dizkizuet gaurkoan”, irakurri diot Joxe Rojasi bere Teknopata blogean. Eta, Maite Goñiren #gaurkohitza tarterako berba egokia iruditu zait #otsein. Izan ere, Bergarako MAYCen egiten ziren etxekotresna txikien marka hari esangura topatu diot, nahi gabe! Joxeren artikuluan ikusi ahala, euskalbar erabili dut eta hainbat emaitza jaso ditut bueltan: Elhuyar, Orotariko Euskal Hiztegia, Hiztegi Batua. Hainbeste urte eta gero otsein izenak esangura duela deskubritu dut (nire ezjakintasunaren erakusle).
Eta, horrela, ba, Google orojakitunari galdetu diot “Otsein Bergara” eta Hoover enpresaren webgunera eraman nau. Izan ere, Otsein eta Hoover etxeak batera ari dira azkenaldian. Otsein-Hoover Historia atalak dioenez, 1951n kaleratu zuen Bergarako MAYC-ek etxeko lehenengo garbigailu automatikoa Otsein markarekin. 1992an Candy etxeak erosi zuen MAYC, baina Otsein markari eutsi zioten.
Hoover etxearen historia lehenago hasi zen: 1900.ean, AEBko Oihonen, aspiragailuak egiten, eta 1932ean ireki zuen Europako bere lehenengo lantegia, Bretainia Handian.
Robo-com deitzen da gure aspiragailu robota
Azken boladan, beraz, Otsein-Hoover batuketaren ondorioz Hoover da merkaturatzen den marka; gure #robocom aspiragailu robota, esaterako, Hoover da eta italieraz zekartzan argibideek diotenez “ritorno automatico alla base di ricarica” egiten du; nik ere nahi gabe, etxe ondora jo dut, “automatikoki”.
