Nire Begietatik

Goizeko hamabiak inguruan, nire mugikorra jo ta ke ibili da lanean. Deiak, mezuak, dei galduak, … Inoiz ez ditut hainbeste mezu eta dei jaso egun berean. Berriak merezi zuen eta behingoagatik pozik ibili naiz mugikorrari itsatsita. Oso pozik gaude, azkenean ETAk su-eten iraunkorra iragarri du martxoaren 24tik aurrera. Berri pozgarria, espero genuen, baina ez hain azkar.

Esan daiteke “errezena” egin dela, su-etenaren iragarpena. Baina orain zer? Orain gatzena dator: guztiok jarri beharko gara ados, guztiok parte hartu beharko dugu (bazterketarik gabe), elkarrizketa bidean jarri beharko dugu, …

Gauza ugari konpondu beharko dira: espetxe politika, zigor politika, independentzia, askatasuna, hizkuntz politika, … Beste asko bururatzen zaizkit, baina hauek utziko ditut.

Euskaldun bezala asko poztu naiz, politikari bezala ere. Lehen pausua emanda dago, orain Madriletik ere pausuak eman beharko dira.

Bidea irekita dago, luzea izango da, baina oraingoan egi bihurtuko da. Ziur nago.

Bai, zahartrosisa. Ez dakit non entzun nuen, baina bitxia egin zitzaidan, hortik aurrera nire hiztegi partikularrean daukadan hitz berezia da.

Bai, martxoak 11, 24 urte bete ditut. Gaur 24 urte amak munduratu ninduen, Guggenheim museoaren aurrean zegoen klinika batean. Goizeko 5etan erabaki nuen burua ateratzea. Badakizue, ni beti ibiltzen naiz goiz: denbora emateko gosaltzeko, dutxatu, metroa hartu, … Batzuk badakizue zertaz nabilen jejeje! Ez dakit, ikusten dut nire bizitzaren beste aro batean sartzen nagoela. Gaztea naiz, baina aldi berean ez naiz hain gaztea. Ez dakit nola azaldu, baina nagusitzen edo ari naiz. Formaltzen ez!

Eguna aprobetxatuko dut eta behintzat hori da nire intentzioa. Familiarekin, skouteko basatiekin eta lagunekin parrandatxoren bat. Bai, parrandatxoa, oraindik gaixo nabil. Denbora egongo da parranda on bat botatzeko!

Ez dakit inor gogoratuko den egun honekin, agian Madrileko atentatuekin bai. Nirekin ez dakit…

Getxoko komunikazio plana martxan jarri nahi du Getxoko Udalak. Horretarako herrian talde desberdinetan gabiltzanak, politikariak, kirol arloakoak, kulturan dabiltzanak, … elkarrizketatzen ari dira. Azaroa aldean elkarrizketa egin ziguten bakarka eta orain batu gaituzte talde desberdinetan iritziak konparatzeko.

Asko kritikatu genuen udala. Getxoko Udalak gauza asko egiten ditu txarto, eta txarrena da, ez dituela onartzen akats horiek. Bai, badakit politikariak direla, baina ez litzateke noizean behin norberaren burua larrutzea.

Etxebizitza herri honetan kaosa da. Orain babes ofizialeko 5000 etxebizitza eraikiko dituzte. Baina zelako politika dauka Getxoko Udalak lurzoroaren legearen inguruan? Zero patatero!

Ez dakit beste udalerriek nolako aurrekontua duten, baina beste udalerri batzuekin alderatuta Getxokoak dirua dauka. Gestioa itzela da! Bakarrik ematen diete dirua daukatenei!
Gustatuko litzaidake jakitea zein den dirulaguntzak emateko irizpide errealak. Skoutekoei beti diru “apurtxu” bat ematen digu. Bai, gazteei dagokionean gu gara gazte gehien dituen erakundea, baina klaro, nola eman diru gehiago? Nork jakin!

Zaharrentzat eginiko herria da: eskailera mekanikoak, Ereagako funikular-igogailua, zahar-etxea, nagusien etxeak, … Zer gehiago?

Gaur arratsaldean eztabaidatzen egon gara bi ordu luzez gure herriaren egoerari buruz.

Azken galdera izan da, nolako Getxo nahi dudan. Ba ez dakit. Agian Getxo “herritar” bat, bere plazekin, bere landekin, herritarren parte hartzearekin, elkarteek bultzatutako proiektuak aurrera eraman, ….

Gauza gehiegi herri batentzat. Hamar urte gehiago irauten badu blog honek, kontatuko dizuet zer nolako Getxo daukagun.

Orain hiru urte, ohetik altxatu, irratia piztu eta berri txar bat hartu nuen: Guardia Zibila “Euskaldunon Egunkaria”n zeuden.

Txarrena pentsatzen hasi ginen, itxi behar zutela. Euskaldunok, ohituta gaude txarrena pentsatzeko eta beti asmatzen dugu.

Ikaragarriena Donostian batu zen jendetza izan zen. Inoiz ez dut hainbeste jende ikusi manifestazio batean. Izugarria! Behingoagatik batu ginen pentsakera desberdineko euskaldunak helburu batekin.

Bai, itxi zuten eta gainera jende andana atxilotu zuten. Atxilotzeaz gain, torturak pairatu zituzten. Famatu egin ziren Martxelo Otamendiren hitzak kartzelatik irtetzerakoan.

“Egunero” sortu zen “Egunkaria”ren tokia hartzeko. Herri eta auzoetan batzordeak sortu ziren harpidedunak lortzeko, kamisetak saltzeko, …

Ekainaren 21ean egunkari berri bat sortu zen: “Berria.”http://www.berria.info Herri-lanaren fruitua izan da “Berria”http://www.berria.info.

Jada hiru urte pasatu dira eta ez da epaiketarik burutu. Zer espero behar dugu? Justiziaz oso gutxi espero dut, egia esateko, ezer.

Egunkari bat itxi zen, baina euskaldunak burugogorra gara denaren gainetik eta egunkari berri bat sortu zen lau hilabetera.

EGUNKARIA AURRERA!