Atzo, hilak 20, Ruper Ordorikak kontzertua eman zuen Oñatiko Guria tabernan. Izan ere, datorren apirilean 30ean itxiko dutela eta, hainbat
kultur ekitaldi eta musika emanaldi antolatu dira. Orain dela bi aste Txuletons oñatiar talde mitikoarena. Esan bezala, azkena, Ruper Ordokorikarena izan da.
Bi zati izan zituen kontzertuak. Lehenengo zatian bakarrik aritu zen eta bere betiko abestiak kantatu zituen. Bigarren zatian, berriz, Oñatiko hiru musikarik lagunduta abestu zuen: Iñigo (Malenkokia taldekoa), Ander Etxaniz eta Soraluzekin, alegia. Gainera, Xolonpok ere abestu zuen, Zenbait bertso xelebre abesti ezaguna, hitzak moldatuta.Taldeari nolabait deitu behar eta “Guria Garaje Banda” izena jarri zion Ruperrek lau musikariok osatutako taldeari.
Aurreko igandeetako kontzertuetan bezala, Guria gainezka bete zuten Ruperren jarraitzaileek. Kanpoan sartu ezinda geratu zirenentzat pantaila bat jarri zuten antolatzaileek. Azken abestia kanpoan kantatu zuen Ruperrek.
Hemen dituzu Ruper Ordorikak Gurian emandako kontzertuko argazkiak.
atauri
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak. Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez. Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da. Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.