Tag Archives: telleria

`Soinu bilduma´ potente egin dute Euskadi Irratian

by arantzabal

Manu
Etxezortuk gidatutako saioan entzun ditudanekin blogeko sarrera hau.
Zehatzago, Nagore Telleriak ekarri ditu esaldiok. Ez dugu sarri entzuten
horrelako kazetaritza eta niri, zer esango dizuet ba, datsegit. Eta gogorren
etxekoekin, ez pentsa!

Entzutea gura baduzue (2:42:30ean):


Soinu
bilduman jasotakoak gutxi gorabehera: 

A3, Paula Vazquez eta Carlos Sobera:

  • “Vazquezi
    ihes egin zion pentsamenduak eta  etorkinak
    ez zirela Españolak esan zuen ia nahi gabe”
  • “Ia
    soinekorik gabe geratu zen munduko ahots erreena duen aurkezle ilehoria”.
  • “Inor
    ez luke aztoratuko Paula Vazquez-ek titia erakutsita… aspaldi erakutsi zuen
    Sabrinak…”

TVE1:
Anne Igarteburu eta Imanol Arias:

  • “Instrukzioak
    spidifemarenak bailiran irakurri zituzten”.
  • “Onenak
    beraiek direla esan zuten. Ospitaleko gaisoez ez ziren akordatu, ezta psikiatrikoko
    eroez… baina bai arrantzaleez”.
  • “Diru
    problemarik ez daukatenek esaten dituzten moduko gauzak esan zituzten.”
  • “Ez
    dute patrikako minik ez Igarteburuk ez Ariasek”

ETB1:
atsuak

  • “Zenbat
    izango ote ginen garranxiak ez entzutearren mahatsak gazteleraz jan
    genituenak”.
  • “Atsoek
    garraxi egiten dute eta gainera, gipuzkoarrok lotsatzeko gipuzkera zabarrean
    hitz egiten dute”.
  • “Pentsamendua
    geldotzeko moduko saioa ETB1ean”.
  • “Inteligentziaren
    kontrako programa egin zuten Gabon zaharretan.”
  • “Zuzendari
    berriak gura duena egingo du programazioarekin, baina gutxienez debekatu
    beharko lituztke gaztelera eta euskara erabilita egiten diren txiste auskalo ze
    urtetakoak. Uste genuen duela 20 urte gaindituta genuela umore mota hau”.
  • “Norbaitek
    barre egingo zuen… jarraitu zuten builaka… Pello Zabala erabili zuten bufoi
    moduan…

ETB2, Africa Baeta:

  • “Vaya
    semanitako umoregileak gehitxotan ikusi ditugu”.
  • “Ezin
    etsi gure buruaz hitz egin gabe eta Africa Baetak horixe egin zuen”.
  • “Mahatsa
    jan aurretik ETB2an ere eman zituzten azalpen guztiak baina ez dakit norbaitek
    barre egingo zuen”.
  • “Txisterik
    maxiatuena erabili gabe ezin geratu”.
  • “15
    segundu behar izan zituzten urteberri on esateko. Lehendabiziko euskarazko
    hitzak Television Españolan entzun genituen, 3. segunduan”.

Ba
horixe, “Bakia, ongia eta onespena denoi”.

Ni
jarri naiz pentsatzen ea zer ikustea gurako nukeen, zelan egina, zeinek… eta
ez dut asmatzen. Benetan zaila iruditzen zait 23:45 – 00:15 tarte hori egitea. Ez
dut proposamenik eta gure familian telebistari begira jaten ditugu mahatsak.
Aurten atsuei begira, hurrengo urtean auskalo.

Urteurrena asteburuan: duela 75 urte, gelditu zituzten Francoren tropak Elgetan

by arantzabal

75 urte bete dira Elgetako frontea ezarri zela. Gudari eta
milizianoek zazpi hilabetez gelditu zituzten Francoren tropak
Intxortan. Elgetako Udalak eta Intxorta 1937 kultura elkarteko kideek ez
dute Espainiako gerrako pasarte hori oharkabean pasatzerik nahi ezta elgetarrok ere.
Urteurrena gogora ekartzeko ekitaldiak gertatu dira domekarako.

Zure nabigatzaileak ezditu iframeak onartzen.

Egitaraua

09:30ean kanpai eta etxafuego hotsa izango da Elgetan; 10:00etan
hasita Intxorta 1937 kultura elkarteko kideen eskutik bisita gidatu
berezia Intxortako ibilbidean. Eta ostean, Gerra zibileko harrera gunea bisitatzeko aukera.

Ekitaldi nagusia 12:00etan egingo dute Intxortako Atean. Jarraian,
martxa egingo da Elgetara “Egia, justizia eta kalte-ordaina zauriak
ixteko, askatasunez bizitzeko” lemapean.

Manuel Iturrioz. Borrokalari baten bizipenak (Iturriotz, Joxemari. Alberdania. Irun, 2011) liburutik atera dugu pasarte hau ordukoak gogoratuz:

Gero egun batzuetako atsedena eman ziguten. Errusia
batailoiaren kuartelean pasa genuen, Bilboko Atxuriko eskoletan, eta
handik Elorriora joan ginen. Egun haietan ni kapitain izendatu ninduten
eta Julian Erdozia teniente. Elorriotik Elgetako frentera atera ginen,
Intxorta mendira, Martiartu, Larrañaga, Saseta eta beste batailoi batzuk
indartzera, etsaiak eraso izugarria prestatu baitzuen Bergaratik
etengabe tiro egiten zuten 80 hegazkin eta 156 kanoirekin. Goiko aldean
Santa Kruzen garaiko gotorlekuak zeuden eta berak idatzitakoak
harkaitzetan. Ondo samar gorortua zegoen, baina Deskarga gainaldean
kanoi bat jarri zuten, beti haitzari jotzen ziona, eta tonaka ateratzen
ziren harriek hegazkinek baino hil-zauritu gehiago eragiten zizkiguten.
Aste hura kalbario bat izan zen egunero erasotzen ziguten hegazkin,
artilleria eta infanteriarekin, baina eraso guztiak bota genituen atzera
eta hil-zauritu mordoxka egin genizkien. Ikusi zutenean gure frentea
ezin zutela urratu, Karraskainetik eraso ziguten eta gutako franko hil
zituzten, tartean Arregi izeneko mikelete bat, eta hildakoak eramateko
gaizki samar ibili ginen batzuek bi egun edo gehiago zeramatzatelako
hilik. Azkenean iritsi zen gaua eta arnasa hartzeko unea, baina gero
Karraskainetik Abadiño aldera sartu ziren eta tristura handiarekin utzi
egin behar izan genuen Intxorta, Elgeta gainean dagoen mendia,
Gipuzkoako azken herria.

Gerra guztiak dira krudelak, eta hori ongi erakutsi
zuten Elgetan, urte askoren buruan jakin baitzen zenbaterainoko
ankerkeria erakutsi zuten jendea bortxatuz eta fusilatuz. Baina Sosota
baserriko alabak eraman zuen parterik txarrena, bortxatu ondoren bere
aurrean akabatu baitzituzten bere gurasoak. Gehiago ezin zioten egin”.

Elgetarrok badakigu “Sosota” baserria idazten den lekuan Sesto baserria behar lukeela, edo zuzenago Sesto Gain. Baserriko krimena, haren lekuko eta biktima izandako Anttoni Telleriak kontatu zuen 2003an (Anttoni 2007an hil zen).