Asteleheneko Goienkaria 07-10-22
El País, tilde urdin eta guzti, eskuratzeko zain nintzen atzo. Goio Aranari irakurri nion Superbai blogean atzo zirela egunkariaren diseinu berria estreinatzekoak eta ikusmina piztu zitzaidan; gainera, horri esker, –eta Pedro J.ri egunkariek opariak egitea gustatu ez arren, atzo bere Mundon aitortzen zuenez– Oscar Marinék diseinatutako erlojua eskuratu dut, doan (diseinatzailea aipatzen dut, erlojuak gehiago merezi ez duelako).
Diseinuak, Superbaik idatzi du, ez du aparteko aipamenik merezi, baina edukietan intereseko letra asko topatu nituen: Zioen Maragallek ‘Eisenhower’ gaixotasunaz, “identitatea galtzea are zailagoa dela denek ezagutzen zaituztenean”. Borroka berriari ekingo dio Kataluniako presidente baino Bartzelonako alkate izateagatik ezagunago egin zenak. Memoriari eusten eta, Doris Lessing 89 urteko literatura Nobel saridunak, egunkari berean zioena, gogoan izaten saiatu beharko dugu guztiok ere: “Gerra eta memoria ez dira inoiz amaitzen”. Horren adibide, egunkarian zetorren hurrengo erreportajea: San Cristobalgo gotorlekuan hilobiratutakoen ondorengoak, Aranzadi Zientzia elkartearen laguntzarekin, han eraildakoen memoria errekuperatzen ari direla.
