Online egiten den herritarren kazetaritzak elkarlan sarean oinarritzen da: dena izan daiteke, eta hala behar du, elkarbanatua (Melo Thiago, 2014). Filosofia horrekin sortu dira, esaterako, Tokikom-eko hedabideetako batzuen Komunitateak (Guaixe, Goiena, Anboto) eta baita Bilboko Uriola eta bere komunitatea ere. Esperientzia hoien arrakastaren oinarria litzateke herritarren parte hartze ordenatu horri kazetaritzaren printzipioak konbinatzen zaizkiola (López García, 2014).
Irudiak: Guaixe, Anboto, Goiena eta Uriola
Presezki herritarren parte hartzea informazioaren elkartrukatze eta zabalkundean “eskaintza informatiboaren uniformizazioari” aurre egiteko modu bat da (López García 2000). Esaterako, Occupy Wall Street-en mugimenduaren mezua herritarrek eurek lortu zuten zabaltzea sare sozialen bidez, eta kazetariek baino azkarrago eta zuzenago egitea lortu zuten (Anderson, Bell, Shirky; 2012). Gure artean, eta denboran ere gertuago, Herri Harresiaren esperientzia sareaz eta elkarlanaz baliatu zen mezuari ahalik eta zabalkunderik handiena emateko, bai eta atxikimendua lortzeko ere. Kasu horretan ere, sarearen bidez zabaldutako irudiek, bideoek, sekulako oihartzuna izan zuten Occupy mugimenduan gertatu bezala, mugikorrek horretarako aukera ezinhobea ematen dutelako. Hedabide handiek handik elikatzea lortu zuten eta euren informazioak osatzea.
Baina gertaera edo albiste konkretu batetik harago, elkarlan hori noraino hel daitekeen oraindik esperimentazio mailan geratzen da. Mexikon, esaterako, Mural.com egunkari digitalak irakurleen batzordearekin funtzionatzen du: erredakzio kontseilua bailitzan publikoaren eta kazetarien arteko eztabaidak bideratzeko topaleku legez funtzionatzen du, eta albisteen ikuspuntua eztabaidan jartzeak aniztasuna eta gardentasuna gehitzea ekarri die (De los Rios, Marcel, Alcalá; 2014).
Irudiak: Occupywallst, Mural eta iReport
Herri kazetaritzaren eta kazetari profesionalen arteko elkarlan horretan oinarritzen da, baita ere, iReport.com, CNN-k sustatutako ekimena. Kasu honetan, herritarrek aukera daukate euren bideoak edo argazkiak sarera igotzeko eta CNN arduratzen da argitaratzeaz eta informazioa osatzeaz, behin baieztatu ostean. Ondotik, beste inork harekin lotutako informazio gehiago izango balu, edo datu berri gehiago, albisteari gehitzeko aukera dauka.
Maila lokalean, nazionalean ala nazioartekoan herritarrek sortutako albiste sareek lotura estutzea lortzen dute audientziaren eta medioaren artean. Ez da kazetari profesionala ordezkatzen, editore lana egin behar baitute profesionalek, eta datorkien informazioa egiaztatu beharra daukate. Baina era horretako elkarlanak aberastu egiten du medioa eta komunitate sen horrek zer berezi bat ematen dio medioari, loteslea bihurtzen da. Ez delako nahikoa Twitter, Facebook edo Google+ sare sozialetan albisteak edo loturak elkarbanatzea eta komentatzea.
