Erlijio eskolek ikastetxeetan lekua izan behar duten ala ez, ez da gaur goizeko eztabaida. Azkeneko urteetan matrikulazio kanpainen aurrean berpizten den aldarrikapena da. Stee-Eilas sindikatuak, esaterako, berriro ekin dio eskariari: “Erlijioa Eskoletatik at!!”. Gainera, gurasoei dei egin die erlijioaren ordez hezkuntza sailak ezarritako alternatiba ere ez dezaten aukeratu, presio moduan. Zertaz ari garen zehazte aldera, Eilas sindikatutik diote, “indarrean dagoen arautegiarekin erlijio irakasgaiak 945 ordu inguru betetzen du Haur eta Lehen Hezkuntzan, eta beste 450 DBHn”; alderaketa egitera, “Arte Hezkuntza edo Gorputz Heziketa irakasgaiak baino gehiago”.
@rikarregi
Ricardo Arregiren txioa ikusita gogoratu naiz, aurreko legegintzaldian, eta Eilasen ildo horretan, hainbat ekimen aurkeztu zirela Eusko Legebiltzarrean, erlijio eskolak kentzeko eskatuz orduan Isabel Celaak zuzentzen zuen Hezkuntza sailari.
Oraingo legegintzaldian, kurioski, alderdi popularreko Iñaki Oyarzabal izan da gaian interes gehien erakutsi duen legebiltzarkidea. 7 ekimen aurkeztu ditu, tartean, sailburuari interpelazioa bat eta baita interpelazioaren ondorengo mozioa ere. Eskaria argia zen: erlijio ikasgaiaren inguruan indarrean dagoen lege-esparrua betetzea, hau da, aukeratzeko askatasuna izan dezatela gurasoek eta, erlijioa aukeratzen ez dutenen kasuan, ordezko alternatiba izan dezatela; 1979an Espainaiko gobernuak Vaticanoarekin sinatu zuena betearaztea, alegia:
1979ko BOE
PPren eskari horri EHBildu eta UPyD taldeek zuzenketa bana aurkeztu zieten. Eta, azkenean, EHBilduren testuaren puntu bakarra onartu zen 2013ko abenduaren 19ko plenoan: “Eusko Legebiltzarrak Eusko Jaurlaritzari eskatzen dio: Eskola publiko laiko baten alde lan egin dezala”. 2. puntuan UPyDren abestentzioak berdinketa eragin zuen (EHBildu-PSE alde, EAJ-PP kontra) eta 3. puntuan, berriz, PSE ere gehitu zitzaien EAJ eta PPri, kontrako bozketan.
Esan bezala UPyDk abstentzioaren alde egin zuen, Maneiroren zuzenketa harago zihoalako, eta arrazoi osoz gainera. Izan ere, eztabaida horren oinarrian dagoena Espainiako gobernuak Vaticanoarekin 1979an sinatu zuen konkondartua edo akordioa delako. Franco hil eta 4 urtera sinatu zutena. Berez, 1976an sinatu zenaren berrestea zena eta, aldi berean, 1953an Francok sinatutakoari jarraipena ematen ziona. Aurten 61 urte beteko duen akordioa!
UPyD horren jakitun, bere zuzenketako puntuen artean sartu zuen eskaria, aurreko legegintzaldian Aralarrek hainbat aldiz eskatu bezala. Ulertzera heltzen ez naizen arrazoiren bategatik, Legebiltzarreko taldeek onartu ez duten eskaria.
Bai, arazoa, eskumenena da berriz ere. Era horretako erabakia Espainiako kongresuan baino ezin delako hartu. Hortaz, zergatik ez eraman Eilasen eskaria kongresura, demagun, Amaiur taldearen eskutik? Zergatik ez planteatu Espainiako kongresuan, Amaiurren eskutik, “Espainiaren eta Egoitza Santuaren arteko 1979ko urtarrilaren 3ko Akordioa bertan behera utz dezala eskatzea?”.
Legebiltzarreko akordioa ikusita, pentsatzekoa da, UPyD, PSOE, BNG, IU-ICV-CHA eta Mistoko gutxienez Esquerra, GeroaBai eta, akaso, kanariar, asturiar, valentziarrek ere, babestuko luketela. Akaso, abenduan ez bezala EAJk ere babestuko luke ekimena, Wert ministroaren hezkuntza lege berriaren kontrako jarrerari eutsiz.
