ASTELEHENEKO GOIENKARIA 09-11-01
Barikuan Legebiltzarrean
hizkuntza ereduen gaineko enegarren eztabaida izan zen, PPko Oyarzabalen
eta UPyDko Maneiroren eskutik. Harrigarriena, ordea, ez da biak
ala biak euskara politizatzen tematzea. Harrigarriena da Aurrekoetxeak,
EAJk, eta Larrazabalek, EAk, eurekin eta PSErekin adostu zutena.
Batetik, Jaurlaritzari eskatzen zaio “familien hizkuntza aukeratzeko
askatasuna benetan” bermatzea hezkuntza epe guztietan zehar. Bestetik,
Haurreskolak Partzuergoak ama hizkuntza betiere errespeta dezala.
Hau idazteko Aralarreko
Mikel Basaberen berbak errepasatzen aritu naiz, ze, erabakion kontra
egin zuen bakarra izanik, helburuak ekarri zituen gogora: helburua herritar
elebidunak egitea bada, bidaialagun arriskutsuak hartu dituzte EAJk
eta EAk. Ahaztu egin dute, gainera, gurasoen ‘benetako’ aukera orain
ere segurtatzen dela hezkuntza sisteman, eta ahaztu egiten dute Haurreskoletan
murgiltze-eredua ezartzea ez zela kapritxoa, elebitasun hori lortzeko
biderik eraginkorrena baino. Basabek defendatu zuenez, “funtsezkoa
da hizkuntza gutxitua izatea hizkuntza nagusia Haurreskolak partzuergoan”.
Urkulluren
alderdiak ‘no obstaculizar’ erabakia muturreraino eramatea erabaki
badu, malo. Ta, malo ere, PPk Lopez gobernuan jarri
izana aprobetxatzea euskararen kontra jarduteko.
