Oporretatik bueltan, Buztantxo eta Potolito ere Usaetxeko ludotekara bueltatu dira. Gure sorpresarako Potolito ondoezik ikusi eta Arrasate Zoora eramatea pentsatu genuen. Bertan aleta bat hautsia zuela esan ziguten eta ez zuela asko iraungo. Hala ere, guk indarra emateko helburuarekin kanta bat sortu genuen eta oraindik gure artean da.

” Gure arrain maitea

bi koloreduna

guri ematen digu

beti poztasuna

eskertzen da piloa

elkarmaitasuna

zurekin bizi dugu

bizipoz eguna”.

Zure bihotzeko lagunak.

Orain egunero abesten diogu gure arrain kuttunari eta egia esan, askoz alaiago ikusten dugu. Aupa Potolo!

Guztiok eginiko bertsoaz eta arrainekin.

Kaixo lagun!

Bihar Okendoko ludotekak 12 urte beteko ditu. Gurekin ospatzeko prest?

Santamainako eta Usaetxeko bazkideak gurera etorriko dira eta ikuskizun ezberdinez gozatuko dugu. Hori gutxi ez eta ludoteka bakoitzean sukaldatu duten jakiak jango ditugu. Napolitanak, bizkotxoa, palomitak…

                               Urte askotarako Okendo!

Gabon hauetan zehar ere ludotekan geratu gabe ibili gara ondo pasatzen ! Abenduaren 29an Zine Erraldoia izan genuen Okendoko ludotekan, eta Santamaina eta Usaetxeko erabiltzaileekin batera Ametsen lapurra filma ikustea erabaki zuten haurrek.

Jada tradizio bilakatzen ari den izotz pistara bisitatxoa ere egin genuen, eta Abenduaren 30ean 75 pertsona inguru joan ginen Durangoko izotz pistara bertan irrist egitera eta primeran pasatzera barre artean, guraso batzuk ere animatu zirelarik txikienekin batera !! Argazkian ikus daitekeen bezala espedizio itzela gerturatu ginen izotz pistaraino !

Urte berriari ongi etorria emateko ludoteka bakoitzean trufa goxoak gertatu genituen Urtarrilaren 2an. Azpiko irudian Santamainako Ludotekan gertatu genituen trufa goxoekin gozatzen bertako haur batzuk !!

 Urte berriari indarrez ekingo diogu, beraz badakizu, gerturatu ludoteketara eta etorri gurekin euskaraz jolastera !!

Arrasateko udal ludoteketan Gabonetarako ekintza bereziak antolatuko ditugu. Hona hemen zerrendatuta;

• Abenduaren 29an ZINE ERRALDOIA izango dugu Okendoko ludotekan.
• Abenduaren 30ean Durangoko IZOTZ pistara irteera egingo da. Irteera ordua 9:30etan izango da Abaroatik eta buelta 13:30etan egingo dugu leku berera.
• Urtarrilaren 2an SUKALDARITZA izango dugu.

Ondo amaitu urtea eta hobeto hasi!

URTE BERRI ON!

Kaixo irakurle!!!

Ludoteketako haurrak zein hezitzaileak ezberdinak gara oso eta horregatik ahal dugun heinean guztion behar ezberdinei erantzuten saiatzen gara. Hori horrela izanik, ikuspegi inklusioa elikatzeko asmoarekin hainbat jarduera gauzatzen edo sortzen ditugu haurren interesa abiapuntu izanik. Hona hemen haur eta hezitzaileok sortutako jolas baten adibidea, “Laztantzen” jolasa hain zuzen ere.

Jakin nahi al duzu nola jolasten den? Tira ba! Haurrek ezpain gorria izatearen nahitik abiatuta sortu zen jolas hau. Honela, borobilean eta txandaka bata besteari margotuko diogu ezpainak. Baina, hori egin aurretik margotuko diogunari, bere ezaugarri positibo bat nabarmendu beharko diogu. Honela, elkarrekintzan autoestimua landuko dugu giro atsegina sortuz.

Aipatzekoa da, aurreko ikasturtean sortutako jolas hau urte batetik bestera asko aberastu dela; nabarmendutako ezaugarri positiboak, itxuratik/fisikotik izaerara salto egin baitute, egoera emozional sakonagoa sortuz.

Hezitzaileok ezin dugu ahaztu, une oro haurrak direla gure protagonista nagusiak eta ezaugarri anitz guztiak kontutan izan beharko ditugula, erantzun aberatsena eman ahal izateko.

Beno irakurle, animatzen al zara jarduera inklusiboak proposatzera? Badakizu, gerturatu guregana eta proposatu!! Hurrengorarte!!

Ikasturte honetan aurreko urtean amaitutako gure eszenatoki zoragarriaz gozatzen ari gara etengabe.

Honen adibide, gure nagusienek aurreko astean eskainitako ikuskizuna. Aste ugari aritu dira ludotekako entsegu gelan jo eta ke ikuskizuna prestatzen,hala nola, atezua egiten eta atontzen, jantziak eta aurpegi margotzeak asmatzen, koreografia apartak sortzen…

Honetarako, ludotekako baliabide anitzez baliatu dira, beti ere , ludotekako  haur askoren laguntza eta parte hartze aktiboarekin.

Entsegu askoren ostean, egun berezia iritsi zen :,  Teknikaria eta argazkilaria  beraien postuetan jarri eta  gure artistak “Putx eta Potx” pailazo bihurtu ziren.

Fokuek  gure eszenatokia argiztatzen zuten bitartean, eta ludotekako haur guztiek emozioa barruan  eutsi ezinean ,sekulako ikuskizunaz gozatu  genuen elkarrekin, haur, hezitzaile, guraso, aiton-amon, anai-arreba…

Beste behin ere, ludokendoko artistek aho zabalik utzi gintuzten erakutsitako bizipozaz     eta egindako lan bikainarekin.

Eskerrik asko zuen ametsak gurekin batera egi bihurtzeagatik!!!

Sentitu, pentsatu, ekin!

Aurreko astean ate irekiak zirela eta, haurrei zer egin nahi zuten galdetu genien. Ideia zaparrada baten ostean, txokolatezko eta gaztazko napolitanak  egitea eta jolasak prestatzea adostu zuten guztien artean. Gainera, ate irekien zabalkundea egin eta egunean haur gehiago etor zitezen, ludoteka kanpoan jartzeko kartel handiaz gain beraien eskoletan jartzeko kartelak ere egitea pentsatu zuten.

Lanak banatu eta gero, hauek aurrera eramaten hasi ziren. Batzuk eskoletarako kartelak egiten eta  beste batzuk, kartoiak eta spryak erabiliz, ludotekarako kartel handia egiten.

Gurasoak ere artista batzuk eginak daude, beraien laguntza ere izan zuten hauek egiteko!!

Ate irekien egunean berriz, napolitanak egin genituen. Lehenengo erosketak egitera joan ginen eta osagai guztiak lortu genituenean, napolitanatxoak egin genituen denon artean.

A ze nolako goxoak irten ziren!!

Atzo berriz, Euskararen eguna zela eta, zerbait berezia egin nahi zuten galdetu genien aurrez. Tenperak erabiliz, euskararen aldeko kartel  handi bat egin zuten aurreko egunean.

Eta atzo herriko ospakizunera joatea zaila izango zela pentsaturik, txokolatea ludotekan egitea pentsatu zuten. Honetarako erosketak egin eta txokolate goxo beroaz gozatzeko aukera izan genuen.

Txokolatezko asteak izan ditugu oraingoan Usaetxen!! Ia hurrengorako zer asmatzen duten!

IRITSI DIRA LUDOTEKAKO ATE IREKIAK!

Gaur Arrasateko ludotekak denontzat zabalik. Bertan, ekintza desberdinak izango dituzue aukeran.

 Santamainako ludotekan, JOLAS HEZKIDETZAILEEZ gozatuko dute.

Usaetxeko ludotekan, NAPOLITANAK egingo dituzte.

Okendoko ludotekan, TRATU ONEN PLAZERRAz gotzatzeko aukera izango da.

                            Animatu zaitezte guregana!

Udazkenak ekintza desberdin ugari ekarri ditu Santamainako ludotekara, eta azken asteotan gurasoak ere animatu dira eguneroko dinamikan parte hartzera. Adibide bezala, beheko argazkietan azaltzen den sukalde tailerra. Guraso batzuk galiziar jatorria daukaten filloak gertatzen lagundu zieten haurrei, eta sukaldatzen laguntzeaz gain, jaki gozo honen jatorria zein den ere azaldu ziguten.

Honetaz gain, ponpoiak egiten laguntzera ere animatu ziren guraso batzuk, eta eskulanak izandako arrakasta ondorengo egunetan antzeman zen, izan ere, haur askok teknika ikasita, ponpoiak egiten jarraitu zuten. Argazkietan ludotekako haur batzuk beraien ponpoiak harro erakutsiz.

  Eta amaitzeko gaurkoan ludotekan izan dugun sorpresa ederra, izan ere, Musakolako Gaztetxokoko lagunen bisitatxoa izan dugu, eta bertako hezitzaile eta gazteekin arratsalde polita pasatzeko aukera izan dugu elkarrekin jolasean.

Badakizue, Santamainako ludotekak beti ditu ateak irekita ideia berrientzat eta kide berrientzat, beraz, animatu, gerturatu, proposatu eta batez ere, jolastu !!!

Azaroaren 15ean eman genion hasiera aurtengo Jostailu Truke Merkatuari Azokan jostailuak biltzen, eta gaurtik aurrera, berriz jasoko ditugu jostailuak egun eta gune ezberdinetan.

 Gaur arratsaldean, Arimazuri plazan egongo gara 17:30etatik 19.00etara bitartean, bihar SªMarinako ludotekan eta etzi Herriko plazan. Egun gehiagotan ere jasoko ditugu jostailuak: Abenduaren 3an San Antolingo parkean, 4an Usaetxeko ludotekan, 10ean SªMarinako ludotekan, 11n Okendoko ludotekan eta bukatzeko 12an Arimazuri plazan. Baina ez itxaron azkeneko egunera arte jostailuak txartelen truke egiteko, egunak berehala pasatzen baitira eta konturatu orduko Truke eguna iritsiko da eta egun horretan beranduegi izango baita.

Beraz gogoratu!!! Gustatzen ez zaizkizun edo eta erabiltzen ez dituzun jostailuak etxean badituzu, trukatu txartelengatik eta Abenduaren 13an etorri Azoka plazara gustura erabiliko duzun beste jostailu egokiago bat aukeratzera.