Azaroak 25ean Emakumeen Aurkako Indarkeriaren Nazioarteko eguna ospatzen denez, ludotekan ere egun honetarako zerbait berezia egitea pentsatu genuen eta ekintza desberdinak egin genituen Arrasateko hiru ludoteketan.

Santamainako ludotekan, egun honetarako motorrak berotzen joateko, esperimentu txiki bat egin genuen aurreko egunean. Egunerokotasunean ematen diren egoera ezberdinen inguruko esaldiak idatzi genituen kartulinetan eta haurrek hauetako bat aukeratu eta honen inguruan zer pentsatzen zuten kontatu ziguten, adibidez, “gizonek emakumeek baino indar gehiago dute” edo “pertsona guztiek merezi dugu errespetu bera”.  Oso polita izan zen haurrek esaldi hauen inguruan zer pentsatzen duten jakiteko.

Honetaz gain, Azaroak 25eko egunerako, egoera desberdinak planteatu, haurrek antzeztu eta guztion artean egoera hauen inguruan hausnartzea ekintza polita izan zitekeela pentsatu genuen. Honetarako, haur talde batek, beraien iniziatibaz, egunerokotasunean bizi dituzten bazterketa edo eroso sentiarazten ez dituzten egoerak pentsatu eta antzeztu zituzten ludotekan geunden gainerako haur eta hezitzaileontzako. Antzezlan hauen amaieran, guztion artean egoera horien inguruan hausnartzeko tartea ere hartu genuen.

Honetaz gain haurrek margoak hartu eta emakumearen sinboloa irudikatzen duen irudia aurpegian margotzea erabaki zuten.

Santamainan argi daukagu, egun guztiak indarkeriaren aurkako egunak direla eta tratu txarren ordez, tratu edo keinu onak nahiago ditugula!

Aurten ere hasi gara Jostailu Trukea egiteko jostailuak biltzen. Atzo Arimazuri plazan egon ginen eta gaur SªMarinako ludotekara joango gara. Bihar berriz, Herriko plazan batuko ditugu jostailuak eta datorren astetik aurrera ere egongo da aukera etxeko jostailuen ordez txartela jaso eta abenduaren 12an jostailu berri edo ezberdinaren truke aldatzeko.

Datorren astetik hasita hauek dira jostailuak jasoko ditugun guneak arratsaldeko 17:30etatik 19:00ra bitartean:

Abenduak 1……………………Okendoko ludotekan

Abenduak 2…………………..San Antolingo parkean  

Abenduak 3……………………Usaetxeko ludotekan

Abenduak 9…………………..SªMarinako ludotekan

Abenduak 10…………………Okendoko ludotekan

Abenduak 11…………………Arimazuri plazan

Lehen aipatu bezala, Abenduaren 12an Azoka plazan egingo dugu Jostailu Truke Merkatua goizeko 11:00etatik 13:00etara bitartean eta jostailuak sortzeko aukera ere izango da.

Beraz, hasi erabiltzen ez dituzuen edo gustuko ez dituzuen jostailuak biltzen eta bilguneetara eramaten. Erosi gabe, jostailu ezberdina eta gustukoa izateko aukera paregabea eskaintzen dizugu eta.

Azken asteotan Santamainako ludotekatik auzora zabaldu gara ekintza desberdinak egitera eta jolastera, haurrek ala eskatuta. Askorentzat, toki berriak ezagutzeko modua izan da, eta honen adibide Makatzena auzoko frontoira joan ginen eguneko arratsaldea.

Bertan, haur talde batek aurreko egunean proposatutako pala partiduak jokatzeaz gain, jolaslekuan aritu ginen jolas dinamika desberdinak eramanez aurrera, eta haur askok beraien inguruarekiko ezagutza adierazi zuten pozez, izan ere inguruan bizi dira ludotekako haur dezente.

Ludoteka inguruetako beste espazio batzuetara ere joan izan gara, eta eguraldia lagun daukagunetan ere jarraituko dugu gure ludotekako mundutxoa handitzen, euskara eta jolasa bidelagun izanik. Animatu eta parte hartu !!!

Kaixo lagun!!

Gaurkuan aurreko astien eindako ospakizuan berri ematera gatoz. Egixa esan zoragarrixa izen zan Usaetxe auzoko gure plaza ume eta gurasoz beteta ikustia!!

Urteurren batek esfortzu asko eskatzen zauenez, aste hasieratik buru belarri jarri ginen hortara. Aurretik ludotekako nagusixenek egitaurautxo bat proposatu zauien eta hau,  guztion artien elkarbanatu eta gero ardurak banatu ginuzen.

Astien ziher bakoitzak beriai ekin dotza eta txukun gainera! Horren adibide garbi daukogu aurreko aste osua eta baita barikuan  beste ludotekako laguntxuekin gozatutako festa.

Egunian bertan, 16:45 elkartu ginen, eta apaingarrixak jartzen hasi ginen batzuk. Beste batzuk al
diz, jolas eremuak eta materialak sailkatzen. Konturatu orduko 18rak zien eta guztiok batera taldeak eiten ari ginen jolasei hasiera emuteko. Jolasaz gozatu ondoren sorpresa, dantzaldi eta erakustaldi batzuk dastatzeko aukera euki ginun eta azkenik guztiok eindako jakiez bete ginun sabela.

MUNDIALA IZAN ZAN! MILESKER PARTE HARTU ZENUTEN GUZTIOI!

Usaetxeko 8. urteurrena iritsi dela eta, ospakizun berezia egingo dugu ostiralean Usaetxeko ludotekan.

Bertako erabiltzaileek jaialdia prestatu dute eta ikuskizun desberdinekin gozatzeko aukera izango dugu. Gainera, bai Usaetxe, eta baita Santamaina eta Okendoko haurrek urteurrena ospatzeko askarirako janaria prestatuko dute.

ZORIONDU EZAZU ZUK ERE USAETXEKO LUDOTEKA!! 

Aurten ere, KulturAtek eskainitako ikuskizun zein ekintzetan parte hartzen hasiak gara. Bertako langileak, ludotekara gerturatu ziren “Biblioteka” eguna dela eta eskainiko zituzten ekintzetara gonbidatuz.

Haurrei, asanblada bidez gonbidapenaren berri eman genien, gurekin bertara gerturatzeko animatuz. Haurrak pozez hartu zuten notizia, eta asteko bi ekintzetan parte hartu genuen; batetik, osteguneko ipuin kontalarian izan ginen, belarriak tente eta irribarrea ahoan, eta bestetik, ostiraleko ikuskizunaz gozatu genuen.

Aurrerantzean ere, herriko ekintza ezberdinetara gonbidatuak izateko eta parte hartzeko desiratzen gaude!

Herritik ludotekara eta ludotekatik herrira!

Urria bukaera iritsi dela eta ostegun honetan ATE IREKIAK izango ditugu udal ludoteketan.

Okendon euskararen jolas erraldoiarekin jolastuko dute, Santa Marinan ortuan zein barazki landatuko duten adostuko dute denen artean eta Usaetxen Gaztainak erre eta jango dituzte.

Animatu guregana!

Ikasturtean helburutxoak landatu ditugun bezalaxe, aurrerantzean Usaetxen sorturiko ortuan  uzta oparoa izango dituzten landareak landatuko ditugu. Aurreko astean haurrek inguruko lorategi batean landatzeko nahia azaldu zuten. Hau ikusirik, ludotekan horretarako aukera genuela esan genien.

Ludotekara bertaratu eta bertan zegoen materiala ikusi eta garbitu ondoren, zerbait landatzeko lur beharra geneukela somatu zuten haurrek. Hau honela, denbora urrian lurra lortzeko aukerak aztertu genituen eta azkarrena auzoko baserrira lur eske joatea zela ondorioztatu genuen.

Bizilagunarentzat sorturiko mapa.

ESAN ETA EGIN! lurra hartzeko tresnak esku artean gogo biziz joan ginen. Baina bertan inor ez zegoenez. Gutun bat eta mapa bat egin zieten haurrek bizilagunei. Gutuna buzoian utzi genien eta hurrengo egunean bertara gonbidatu gintuzten nahi genuen lur guztia hartzera. Frakak altsata gogo biziz ekin genion lanari baita pikuak batzeari ere!!

Beste bide batzuetatik lurra lortu genuen eta guztiarekin GURE ORTUA SORTZEARI EKIN GENION!! ILUSIOZ ETA GOGO BIZIZ!!

ORAIN ZER LANDATU NAHI DUGUN ERABAKI ETA UZTAREN ZAIN GELDITUKO GARA GURE LURRAK ZAINDUZ ETA MAITATUZ!

Ikasturte berriarekin batera aurreko urteetan horrenbeste poz eta momentu polit ekarri dizkigun txokoa ere martxan jarri dugu, ortua !! Haurren gogo eta nahiei kasu eginez aste honetan ortua txukuntzen aritu gara, belar txarrak kendu, lur berria bota ortura eta ingurua txukuntzen eta garbitzen.

Haurrak ortuan daukagun kaxa handiko lurra mugitzen aritu ziren, ondoren lur berri gehiago bota eta haziak ereiteko prestatuz eremua.

Udan zehar ortuko beste eremu batzuetan agertu diren belar txarrak kentzen ere aritu ziren txikienak, eta ederto pasa zuten ortuko txoko desberdinak atontzen.

Askotan gertatu izan zaigun bezala, oraingoan ere ortuak ustekabe polit bat oparitu digu, izan ere aurreko ikasturtean landatu eta ahaztuta geneukan lorontzi batean patata txikitxo batzuk hasi ziren, eta haurrak izan ziren aurkitu zituztenak, irribarre galanta marraztuz beraien aurpegietan !!

Zuk ere Santamainako ortuan eta ludotekan parte hartu nahi baduzu, ez izan zalantzarik eta gerturatu !!

Iraila badoa eta honekin batera ate irekiak. Baina honek ez du esan nahi, gure ateak itxiak daudenik, izan ere, nahi duzunean etorri zaitezke ludoteka probatu eta lagunekin gozatzera!

Haurren nahi eta beharretara egokitzen den egitasmoa da gurea, asanbladak ardatz izanik, egunero gabiltza ludoteka eraikitzen. Asko izan dira bertan aurrera eraman ditugun ekintzak, Usaetxeko laberintoa, Santamainako ortua edota Okendoko eszenatokia. Denak haurretatik, haurrekin eta haurrentzat eraikiak. Hezitzaileok haurren bidelagun izanik, baloreetan oinarritutako aisialdi batean sinisten dugu, sormena, autonomia, parte hartzea edota hezkidetza landuz.

Zaletasun bat duzula? Gurekin zerbait konpartitzeko gogoz zaudela? Zatoz gurera eta proposatu!