Honatx 1945ean Donostian egindako argazkia. Badirudi Marin argazkilariak egina dela, baina ez da bestelako daturik tartean (zein lekutan? noiz?…).
Iritsitako albisteek diotenez, gizakume horietako batzuk batera aritu ziren 1936ko gerran Amaiur batailoian (akaso “Arrasate” konpainian). Ez da falta geroago kartzelan edo kontzentrazio-esparruetan ibilitakorik eta, zigorrak bete ondoren, militantzia politiko-sindikalak batu zituenik ere.
Baina hori jakin arren, Belamendin ezinezkoa izan da haiei guztiei izen-deiturarik jartzea.
Horretara dator, beraz, lerroburuko galdera, haien identifikazioa lortzeko nahitaezkoa izango baita irakurleen laguntza.
Zerbait jakinez gero, post honi erantzutea baino ez duzu, irakurle, identifikatutako pertsonari zein zenbaki dagokion azken irudi honetan esanez eta nahi beste datu eta albiste erantsiz. Edo errazago egiten bazaizu, honako helbide elektroniko hau erabil dezakezu berria emateko: belatxingar@gmail.com
Esan beharrik ez dago bihotz-bihotzez eskertzen dela zuen laguntza.
