“Zergatik hautatu zenuen irakasle izatea?” Galdera ona gaur ikasle batek egin didana… Jakingo banu erantzuna… Halare, berak zerrendatxu negatibo bat bota dit:
– Ikasleak jasan behar dira.
– Askotan ez dute kasurik egiten.
– Malaletxean ateratzen zara egunero.
– Gogoak kentzen zaizkizu seme-alabak izateko.
-…
Eskerrak 11 urte dituen. Zergatik sartu nintzen honetan? Kasualitatez, baina ez naiz damutzen, nahiz eta eskoletatik ateratzen naizenean gogoak izan baten bat akatzeko.
Nekatua egongo naiz? Pazientzia gutxiago izango dut? Umeak gorrotatuko ditut?
Ez dakit, ez dakit, ez dakit… Baina azkenaldian, edozergatik jartzen naiz sutan. Nekatuta altzatzen naiz eta nekatuta oheratzen naiz. Bitamina falta? Pharmaton hartzen hasi beharko dut?
Lehen edozer jasateko prest nengoen (nahiz eta pila bat kexatu), edozein saltsatan ematen nuen izena,… Orain, aldiz, asteburua heltzen da eta lur jota nago. Ez dut parrandarik botatzen, eta nekatuta nago.
Mmmmm! Agian bainuetxe batera joan beharko dut? Yoga? Proposamenik?
Gaurko egun batez…
… 1482an, Tomás Torquemada Espainiako inkisidore izendatu zuten.
… 1851an, Verdik “Rigoletto” obra estrenatu zuen.
… 1931an, Paulino Uzkudun boxeolariak Kennedy kaliforniarraren aurkako konbatea irabazi zuen.
… 1978an, Adolfo Suarezek, amnistia totala onartzen du.
… 2004an, Madrilek ekintza terroristarik larriena jasotzen du.
… 1982an, amak Bilboko klinika batean munduratu ninduen.
Ostegunetan Geroan ematen ditut eskolak, 5.mailan. Aspalditik dabiltza zentru desberdinetako irakasleak arbel digitala nola erabiltzen den ikasten. Irakasleak ikasle!
Gaur bertan erakutsi didate apurtxu bat nola erabiltzen den. Egia esateko, aukera asko ditu eta oso interaktiboa da. Bideoak, power pointak, audioak,…
Aurrerago erabiltzen ikasiko dut, aztertuko ditut zer nolako aukerak ditudan, eta nik ditudan baliabideak bertan txertatzea. Printzipioz, inbentoa nahikotxo gustatu zait.
LH 5-6 eta DBH 1ean ematen ditut eskolak. Pasa den astetik aurrera, ematen du geografia politikoa eta fisikoa ikasten hasi direla. Gela guztiak mapaz beteta daude: mendiak, ibaiak, lurmuturrak, itsasoak, hiriburuak, herriak,…
Geletan ikusi dudan mapa, ez da nire mapa. EAEko mapa politikoa daukate. Bizkaia, Gipuzkoa eta Araba. Herrialdeak falta zaizkio: Nafarroa, Lapurdi, Nafarroa Behera eta Zuberoa.
Zergatik kakazten ditugu umeak? Batzuk ez dakite Euskadikoak diren, Euskal Herrikoak, edo ez dakit nongoak…
Benetan tristetu nau horrelakoak ikusi beharra. Nik gelan, Euskal Herriko mapa neukan. Agian urte batzuk barru, Espainiako zintzilikatuko dute Euskal Herriko eskoletan.
Denboratxua ez dudala bertan idazten.
Denboratxua nire burua kokatzen nabilela.
Denboratxua nekatuta nabilela.
Baina gaurtik aurrera, bertan, berriro gauzak isladatzen hasiko naiz. Beharra daukadalako eta ondo sentiarazten nauelako.
Kaixo berriro ere.
Nekatuta omen zegoen bizitzaz, amomarekin elkartu nahi omen zuen. 89 urte luze zituen. Aste honetan pattal samar zebilen, baina ez genuen uste gaur agurtuko gintuenik. Medikuen esanetan, ondo zegoen, baina nahiko esan du. Goizean joan zaigu.
Lagun batek esan dit, zorte handia dudala nagusi izanda ere, aitite eta amoma bertan izan ditudalako. Eta egia da. Oroitzapen on asko utzi dizkit aititek: hondartzara eramaten ninduen txikitan, soloan ibiltzen nintzen aitxurragaz (askorik ez nuen egiten, baina beno…), Galean emandako pasioak belarra ni baino altuago zegoenean, Athletic-ari buruzko eztabaidak, udaro Tourra ikusi, Wimblendon, zazpi erroreak bilatu egunkarian, Olentzerori uzten genion anis kopa, mimosak hartzen genituenean Artatzan, ikastolara bila etortzen zenean,…
Eta ahaztuko ez ditudan beste mila gauza. Nahiz eta azkenaldian asko eztabaidatu berarekin, amomarekin batera hazi ninduen. Gauza horiek ez dira ahazten. Behintzat, badakit amomarekin elkartuko dela, eta pozik begiratuko gaituztela dauden tokitik.
Ondo izan, aitite. Muxu bat.
Bukatu dira eta eskerrak! Bi aste igaro ditugu jaten. Izugarri gozatzen dut jaten, baina ematen du Gabonak horretarako erabiltzen ditugula, aitzakia polita dela jateko.
Familia batzeko aitzakia izan beharko litzateke, baina gero eta gutxiago gustatzen zaizkit horrelakoak. Aurpegi onak jarri beharra, irribarreak bota,… Sentitzen ez dituzun gauzak egiten dituzu, ingurukoak pozik egon daitezen.
Behintzat bukatu dira. Orain normaltasuna dator. 7an berriro lanera, ume artera.
Ustekabean beste urte bat igaro da. Lekutan geratzen zen 2010, akorduan daukat 2000.urtea atzo izan balitz bezala.
Berandu nabil Olentzerori gutuna idazteko. Beraz, urte berriari egin beharko dizkiot nire eskaerak. Materialak ez dira izango. Eskaerak, besterik gabe.
Osasuna, ai osasuna… Berriro ere nire hanka madarikatua. Tendon de Aquileseko ebakuntza gero eta gertuago daukat. Nahiz eta ondas de choque famatuak eman, ez dut hobekuntzarik igarri. Ahotsa ere, hortxe-hortxe… Osasun apur batekin konformatzen naiz.
Maitasuna,… Ia noiz heltzen den nire printze urdina!
Eta lagunak, nagoen bezala mantentzen banau poz-pozik!
Eta lana… txarra izan behar da joatearren ordaintzen badizute… Lortuko banu agintari lana! Kar, kar, kar! Baina uste dut hori gatza dela.
Betikoa, osasuna izanda nire familia eta ingurukoak poz-pozik!
URTE BARRI ON!
