oreka tx txalapartari taldeak zuzeneko musika eta irudiak nahasten dituen ikuskizuna aurkeztu berri du Arrasaten: nömadak tx zuzenean, hain zuzen ere. Ikuskizun horretan oreka tx hainbat musikarirekin batera aritu zen: Mixel Ducau, (alboka, ttun-ttuna, saxoa eta klarinetea), Ritxi Salaberri (bajua), Juanjo Otxantorena (bouzoukia) eta Iñigo Egia (ohol indiarra, bendir-a, bodrham-a eta wok-a). Gainera, eszenatokian jarritako pantailari esker, beste hainbat musikari ere aritu ziren, nömadak tx filmean azaltzen direnak: Ganzorig Nergui, Altai Hangai taldekoa, Khoomi kantu harmonikoa abestu eta Mongoliako Morin Khoor musika tresna jotzen duena; abeslari bereber bat; eta azkenik, Aziza Brahim saharar abeslaria. Esan beharra dago kontzertuko instrumentu nagusia eta beste elementu guztiak batzen dituena txalaparta dela.
Hemen duzu oreka tx txalapartari taldeak Arrasaten emandako kontzertuko argazki bilduma.
atauri
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak. Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez. Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da. Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.