Euskalerria irratia

Data: 2007(e)ko otsailaren 19a Egilea: piperrautsa

Distantzian sentitzen nuen hurbil Iruinerriko irrati euskarazkoa. Entzun ez, baina tokatu zait harremanen batzuk izatea hangoekin. Eta miresgarria iruditzen zait egiten ari diren ahalegina bizirauteko, egoerarik aldrebesenean, lizentziarik gabe.

Duela hilabete gutxi, deitu egin zidaten eta kolaborazio bat eskatu. Mikel Aramendi -aspaldiko kolaboratzailea- nahi zuten nazioarteko politikan zentratu, neuk etxekoa jorratzea onartzen banuen. Eta, lan egoera berrian juxtu kontrakoa egiten ari nintzen arren, -alegia, lana uzten- baietz esan nien. Nola ukatu ezer haiei?

Hutsa da, astean behin ordu laurden. Baina oso gustura ari naiz. Juan Kruz Lakasta eta Pello Argiñarena izaten ditut solaskide, txandaka; lana ondo prestatzen dute, haria bikain eramaten, umorea eta ironia primeran erabiltzen…

Nik dudan onena ateratzen didate. Amaieran, beti pentsatzen dut: ‘Joño! ez duk batere gaizki joan’. Mila esker, Juan Kruz eta Pello!

Kategoriak Sailkatugabeak | Etiketak | 8 iruzkin

Anoetan atletak

Data: 2007(e)ko otsailaren 16a Egilea: piperrautsa

Txoko honetara hurbiltzen denak badaki nekez
aurkituko duela futbol konturik.

Zergatik orain bai? Ba, inguruan bekozko
ikusten dudalako jendea, areago Donostian lan egiten dudanetik. Gaur zioen
lagun batek, inoiz ez duela lehen mailan iraun sasoi honetan Realak oraintxe
dituen puntu apurrekin zegoen talderik. Real zalea da, eta etsita dago.

Gogoan dut Reala lehen mailara igo zeneko poza, Tolosan autobusa
agurtu genuenean. Orain, bigarrenera jaitsita, ez dut neurri bereko penarik hartuko.
Eta inguruak kontsolatzeko, badut proposamen bat. Bigarren mailan jokatzeko, Realak nahikoa izan lezake Zubietarekin. Berreskuratuko dugu Anoeta
atletismoa bultzatzeko? Naroa Agirrek eta enparauek aukera bat merezi dute.

Kategoriak Sailkatugabeak | Etiketak | Utzi iruzkina

Beste urte bete

Data: 2007(e)ko otsailaren 12a Egilea: piperrautsa

Urteak bete ditut atzo, 53. Urte bat gehiago naiz, atzoz geroztik.

Horrela esanda, adinak erantsi egiten dio pertsonari zerbait: honi, jakinduria; hari, esperientzia; besteari, patxada… Denoi zerbait. Urte asko dituenak, zaku bete bizi dauka barrenean, birziklatzeko eta goxatzeko.

Beste urte bete hartu, bai. Eta galdu dudana? Pentsatzen jarri nintzen batean, erabaki nuen galtzea -ezer baino lehen- galdutakoaz gogoratzeko memoria. Harrezkero, ahaztu egiten zait lehen zer nuen edo zer nintzen; horrela, ezin dut jakin zer galdu dudan.

Urteetan aurrera, urteak bete, urteak hartu, urte bat gehiago izan… Esaldi hauek asmatu zituenak ere pozik hartzen/betetzen zituen urteak!

Kategoriak Sailkatugabeak | Etiketak | 8 iruzkin

Arrasate gainbehera

Data: 2007(e)ko otsailaren 9a Egilea: piperrautsa

Ia 300 biztanle galdu ditu Arrasatek iaz,
Gipuzkoako herrien artean galerarik handiena. Bi mila biztanletik gora ditu
galduak, azken hamar urtetan. Une bateko kontua ez den seinale.

Izango dira etxebizitza garestiak, eta
inguruko herrietarako joera. Aipatu da herritarren bizi-maila, eta Donostiako
bigarren etxebizitza; zergak arintze aldera bizitoki aitortzen dena, asteburuko
atsedenleku besterik ez bada ere. Autopistak lanera etortzeko erraztasuna
dakarren bezala, nonahi bizitzeko aukera ere ematen duela ezin uka.

Faktore asko, denak itxuraz balekoak. Eta,
hala ere, ez dakit Arrasate hustearen arrazoi nagusia ez ote den bertan
bizitzeko ilusio falta, tokiarekiko maitasun eza. Triste ikusten dut herria,
noraezean.

Kategoriak Sailkatugabeak | Etiketak | Utzi iruzkina

Garzon bueltan

Data: 2007(e)ko otsailaren 5a Egilea: piperrautsa

Aspalditxo etorri zen -EEBBetatik bueltan- gure
andaluza, (epaile ona zala-ta, zakurraren putza, diosta belarrira
bertso-memoriak). Harrezkero, Garzonek beste buelta bat ere hasi du, emeki bada
ere: muturretik normaltasunera doana, hain zuzen.

Oso adierazgarri egin zait joan den astean
super-epaileak argitaratu duen ebazpena, ezker abertzalearen eskubide zibil eta
politikoak aitortuz. Muturrera zihoala, Garzon bera izan baitzen ‘dena da ETA’
dotrina juridikoaren aita; berak jarri zuen oinarria gero etorri diren hainbat
gehiegikeria posible egiteko. Izutu egin ote da, bere sorkuntzarekin zer egin
daitekeen ikusita? 

Garzonen bueltak izaten badu joanekoak izan zuen
arrakastaren erdia, agian, negua ez da hain gorria izango.

Post scriptum

Txirritak botea omen, hargin andaluz bat horma okerra egiten ikusita:

Haizeak ekarri du handikan honuntza

geroztik hemen dabil gure andaluza

hargin ona zala-ta, zakurraren putza!

bera eroriko dek, ez hakiok bultza.

Kategoriak Sailkatugabeak | Etiketak | Utzi iruzkina

Gerry miresten dut

Data: 2007(e)ko urtarrilaren 28a Egilea: piperrautsa

Oraintsu jakin dut Sinn Féinek onartu egin duela Ipar Irlandako polizia; eta, horrela, azkenetako oztopo bat desagertu dela hango gobernua berriro indarrean jarri eta bake prozesua burutzeko.

Kristoren poza hartu dut. Jenio bizikoa banaiz ere, biolentzia gorroto dut errotik, pentsatzen hasi baino aurretik. Eta gatazka biolento bat bakebidean jarrita, poztu egiten zait barrena.

Baina kasu  honetan, erreakzio primario horri gehitu behar zaio prozedura berak eragin didan lilura. Sasi guztien gainetik, sendotasun eta argitasun itzela ikusi dizkiot Ipar Irlandako prozesu osoari, John Majorek abiatu zuen une beretik.

Eta miresten dut, bereziki, Gerry Adams. Azken unera arte, bere indar guztiak jarri dituelako konponbidearen alde, eta gai izan delako bide horretan berarekin eramateko biolentzian aritu eta ohitutako kide guztiak.

Zorionak, Gerry!

Kategoriak Sailkatugabeak | Etiketak | Utzi iruzkina

Etorkizuna zor

Data: 2007(e)ko urtarrilaren 26a Egilea: piperrautsa

Sasoi honetan beti jaio izan da jende asko:
gure etxean, bederatzitik lau ginen urtarrila edo otsailekoak. Oraintxe ere,
baditut jaioberriak inguruan. Horietako baten aitak azaldu zidan, ez aspaldi,
bere kezka seme berriaren etorkizunaz. ‘Zer utzi behar diegun hauei…’, alegia.

Egoera politikoaz ez nago oso ezkor. Nola
izango den ez dakit, baina aurten bertan espero dut bakerako bigarren saiakera
bat. Eta hamarkada honetan, konponketa. Bada arazo larriagorik: jaioberriek
gero beharko duten ingurumena gu ari gara orain jaten, eta agian ez dute izango
bigarren aukerarik. Euskararen egoera normaltzea ere gazteen esku ari gara
uzten; baina gaur katea eteten bada, gero jai.

Eta etorkizuna zor diegu
gaur jaiotzen ari direnei.

Kategoriak Sailkatugabeak | Etiketak | Utzi iruzkina

Foroetako zalaparta

Data: 2007(e)ko urtarrilaren 22a Egilea: piperrautsa

Ez da kontu berri-berria, irratiak aspaldi ari
dira telefonoa zuzenean irekitzen, entzuleen iritzia jasotzeko huntaz eta
hartaz. Horrez gain,  irrati-telebistetan ikaragarri ugaldu dira
tertulien formatua eta orojakileen espeziea (neroni bat izaki, zozoak beleari?)

Baina, Internetek sortu du iritzia emanez edonork edonon partehartzeko fenomenoa.
Komunitate txikietan eztabaida edo elkarrizketa politak ikusi izan ditut,
baliotsuak eta eraginkorrak. Baina, plaza handietan eta gai jakinetan, ilara
amaigabeak sortzen dira minutu gutxitan, eta zalaparta galanta pizten.
Normalean, jarrera manikeoak nagusitzen dira; eztabaida irabaztea helburu
hartuta, sinplifikaziora jotzen dutenak; eztenkadak. Edo, bestela, topiko
marruskatuak, borondate onena azaldu ondotik. Azken adibidea aurkitu dut Ibarretxek ireki berri duen blogean: konpondu.net

Egingarri litzateke lagin hori hartzea
jendartearen erakusle; eta aieneka hastea, jendartea ez delako gure klase
politikoa baino hobea eta, beraz, gureak ez duelako erremediorik. Egingarri
bai,  esaterako, iritzi emaile profesionalak bere
burua zuritze aldera. Baina, inolaz ere ez litzateke zintzoa. 

Irekitzen diren leiho horietan jende mota
batek hartzen du parte nagusiki: ausartak edota beroak. Hiritar zentzudun asko
ez da sartzen, zaila delako zalaparta giroan ñabardurak sartzea, errazago
lortzen duelako txaloa ziztadak, iritzi lasaiak baino. Ez dira lagin benetakoak,
jendarteak sen gehiagoz jokatzen du, bere ustezko bozemaileok erabiltzen
dugunetik haratago.

Kategoriak Sailkatugabeak | Etiketak | Iruzkin 1

Kolpez kolpe

Data: 2007(e)ko urtarrilaren 19a Egilea: piperrautsa

Bigarren kolpea jo du Danbaka lehiaketak.
Aurtengo finaleko hiru taldeak oso ezberdinak ziren elkarren artean, aurrekoan
baino alde handiagoekin. Amaitu ziren garai uniformeak, askatasunean libre
dabiltza musikariak, entzuleon onerako.

Irabazlea, Aby-Kem,
oso indartsu ikusi nuen. Entzutea, beste gauza bat da: musika gogorra eta
dezibelio gehiegi, nire belarriak ez du ezer igartzen. Belceblues, onak eta klasikoegiak. Blues klasikoko taldeak ingelesez,
satsa lez daude munduan. Euskaraz egin beharko lukete, balio erantsia izateko. Malenkonia iruditu zitzaidan talderik
interesgarriena baina, nire belarriaren arabera, desafinatu egin zuten.

Antolaketa, bikaina. Jendetza, itzela.
Debagoienak harritu egiten nau, oraindik ere.

Kategoriak Sailkatugabeak | Etiketak | Utzi iruzkina

Contra Franco…

Data: 2007(e)ko urtarrilaren 15a Egilea: piperrautsa

Franco hil berritan, joandako garaien penatan zeudenek lelo argia asmatu zuten: Con Franco vivíamos mejor. Fatxa arriskutsuak begi ertzetik zelatatuz, progre ezkertiarrek aurrera egin zuten… harik eta arazoak iritsi ziren arte. Batzuk agintearen erotika probatu zuten eta haren limurkerietan katiatu. Bestetzuk, jarraitu zuten borrokan, ezintasunarekin topo egin arte. Horietan, banakak eutsi, gehienak etsi; guztientzat, ametsa hautsi egin zen. Desencanto deitu zioten sentimendu horri. Eta, norbaitek asmatu zion ilusio eta batasun galduen baladari izenburu bikaina: Contra Franco vivíamos mejor.

ETA Barajasen berpiztu denean politikariak nola jardun diren ikusita, burura etorri zait lelo zaharra. Guztiek ematen diote ETAri protagonismo erabatekoa gatazkaren amaieran, haiek nahi ez duten artean zer eginik ez balego bezala. Seguru politikatik ahal den guztia egiten dela baldintzak eta kontraesanak sortzeko? Ez da ba izango, ETAren aurka erosoago ari direla?

Kategoriak Sailkatugabeak | Etiketak | 2 iruzkin