Goienkaria 2007.02.23
Izen horrekin bataiatu dute Arrasateko Biteri
plazako tramankulua. Eta ez dago gaizki jarria izena, badu-eta gasolindegien
antzik. Nekezago dei dakioke pergola edo aterpe, pergolak dotoreak izan ohi
direlako eta aterpeak, aterpe; hau da, babesleku.
Azkena jakin da Udalak diru gehiago gastatu
nahi duela egitura hori hobetzen; haize-babesak jartzen, besteak beste. Baina,
nekez konpon daitezke ‘gasolindegia’ren akatsak, bera baita akatsa, goitik
behera. Nik eskatu nahi diot Udalari, errespetu handiz, ez dezala ezer egin. Hauteskunde
ondoko Udal berriak gaiari bi buelta eman eta dena kentzeko erabakia hartu
bitartean, hobe ez gastatzea diru gehiago alferrik. Behin hanka sartuta, hobe
da umil jokatzea, egoskor baino.
