Bakebidea hasi besterik ez da egin, baina iritsi dira lehen etekinak. Bilboko manifestazioan txalo beroenak joan zitzaizkion Reid abade irlandarrari. Bera izan da bitartekari eraginkorrena, gauden unera iristeko. Eta txaloek lan hori eskertu diote. Barne-pozaz gain, herritarren esker ona jaso duzu, Sir Alec. Negozio biribila.
Ostalaritzak ere izango du negoziorik. Hoteletako gelak eta jatetxeetako mahaiak samurrago saltzen dira bake giroan. Industria suspertu bitartean, gaitzerdi zerbitzuen sektoreak konpontzen badizkigu ekonomiaren zifra potoloak.
Eta argi dago bakeak etekin politikoa ekarriko diela hura gorpuzten dihardutenei. Aldiz, negozio txarra izango da gatazkan gizendu direnentzat. Hauek asko dute galtzeko eta pentsatzekoa da saiatuko direla bidea oztopatzen. Zorionez, negozio honetan herritarroi dagokigu etekinak banatzea.
