Aurreko batean aipatu nuen, derrepente gogoratuta, Elgetako Jabiertxo, lankide zendua. Geroztik, buruan bueltaka ibili ditut haren oroitzapenak, eta bereziki gozo egin zait lana utzi zuenean egin genion agur-bazkarikoa. Jubilatzeko adina bete baino lehen, osasun arazoak eraginda utzi zion Kutxako lanari. Horri buruz idatzi nion ondoko bertsoa, eta gero koadro dotorean jarri eta bazkalondoan hunkituta kantatu genion:
Eman dituzu eta zabaldu inguruan fruitu onak
eta lankide ginenak ere egin gaituzu lagunak.
Orain akabo, bukatu dira derrigorrezko jardunak,
hori aukera duzuna
gehien gustatzen zaizunaz
igarotzeko egunak!
Gure aldetik bada gauza bat gaur eskatzen dizuguna:
urte askoan nahi zaitugu; zaindu, Jabier, osasuna
zaindu, Jabier, osasuna
