Une larria izan zen joan den asteburukoa. Eta zorionez, istilu barik pasatu da guztia, agerian ez du zauririk eragin. BECekoaz ari naiz, nola ez.
Nire irudipenean, bai Zapatero eta bai Batasuna ustekabean harrapatu ditu Grande-Marlaskaren autoak. Espero zuten PP asaldatzea ekitaldi horrekin, eta zarata handia ateratzea. Baina ez epailearen debekua, jardunaren etetea, eta beste guztia.
Agerian gelditu da Zapaterok ez duela egoeraren kontrol osoa, PPk oraindik lagun asko dituela estatuko egituretan. Eta argi dago PPk gupida barik erabiliko dituela guztiak. Ez da ahaztu behar datorren urtean tokatzen direla udal hauteskundeak, eta hurrengoan Espainiako orokorrak. Hau da, Zapatero legealdiaren erdian dago. Lortuko balu aurten mamitzea eskuartean dituen gai potoloak, ziurtatua luke beste legealdi bat.
Noski, PPk horixe nahi du oztopatu eta, lortze aldera, boikotatu egin behar ditu Zapateroren ahalegin guztiak, nola Kataluniako estatuta, hala euskal auzia. Egoera horretan etorri da BECekoa, eta asteburuko une larria. Gertatu izan balitz istilurik, samur joan gintezkeen denboran atzera.
Baina lan asko egin da askoren artean, katramila gera zedin eskapada hutsean. Seinale erabilgarri daudela zenbat zubi eta kanal. Horixe ondorio ona. Arriskuak, ordea, hor dirau eta aukera bakarra da aurrera egitea. Iritsi da ordua…
