Urrin samar gelditzen da, baina ez dut aipatu gabe utzi nahi bergararren erakustaldia Bilboko Euskalduna jauregian, Seussen mundua musikalarekin. Aspaldi ari dira ikuskizunak antolatzen eta, arian-arian, profesionalen mailara iritsi direla erakutsi zuten, gabonetako emankizunetan.
Oholtzakoari bakarrik erreparatuta, obra iruditu zitzaidan polita. Kontatzen den historia, txikien defentsan, oso da hunkigarria. Eta musika izan daiteke ohiko samarra, baina atsegina da, zalantza barik.
Ikuskizuna aparta eta harrigarria bihurtzen duena da bergararren lana. Lan bikaina, oro har, hemen azpimarratu nahi dut euskarazko moldaketa, oso ondo egokitua baitzegoen hizkuntzaren soinua kantuen doinuari. Era berean, oso zainduak iruditu zitzaizkidan ikuskizunaren atal guztiak: jantziak, disfrazak, dekoratuak, argiztapena, koreografiak dena zen goi mailakoa. Eta bikain aritu ziren kantari, dantzari eta musikariak, ilusio betean eta akats handirik egin gabe.
Orain galdera parea. Non egon da Bergarako Udala herri osoa mugiarazi duen ekimena babesteko orduan? Eta noiz izango du Bergarak areto bat, herritarren gaitasunen parekoa?
Eta, amaitzeko, pena bat. Oraingoz ez daukate lotuta beste emanaldirik. Hainbeste denbora prestatzen, lan eta eskola orduz kanpo, hain ibilbide laburrerako!
Begiak bustitzen dizkit bergararren eskuzabaltasunak.
