Azkenean euria izan zen domekan, eta jende gutxiago
bildu zen Leintz aldera, Kilometroak05 ospatzera. Eguraldia bakarrik zegoen antolatzaileen ahalmenetik kanpo eta, antza, horrek bakarrik egin zuen porrot. Gainontzean, agerian gelditu da beste behin debagoiendarren antolakuntzarako gaitasuna. Zorionak lanean ibili direnei!
Beste kontu bat da diruarena. Jende gutxi biltzen bada, dirua ere proportzioan. Idazten ari naizela, ez dago oraindik datu zehatzik, baina kontu korronte bi zabaldu dituzte, borondate eske. Eta iruditzen zait hortik ez dela askorik etorriko.
Esan ohi da Irunberriko katastrofea gertatu zenean, borondatez jaso zuten dirutza handiagoa izan zela bestela jasoko zutena baino. Hau da, kasu hartan euriaren kaltea mesede bihurtu zitzaiela Nafarroa Oinezekoei, diruari dagokionean.
Baina oraingo katastrofea txikiagoa izan da, Gipuzkoa ez da Nafarroa, eta Debagoienak aberats fama du. Norbaitek esan ere esan omen zuen ea ez zegoen Gipuzkoan beste ikastolarik, Arizmendi baino behartsuago, Kilometroen onurak aprobetxatzeko. Nonbait, kosta egiten da sinestea ikastola diruz estu ibil daitekeenik, eskualde hain aberatsean. Zenbait euskaltzalek ote daki Arizmendi diru premian dagoela? Eta zazpi milioi euroko zorrak dituela?
Ea, elkartasuna piztuta, borondateak bapo betetzen dituen bi kontu korronteak.
