Eskuak gabardinaren patriketan eta oinak plazara bidean, errepasatu egin zituen urrats hura emateko arrazoiak, erabakia tinkotze aldera. Erakutsi behar zuenak merezi zuen, dudarik gabe. Erakusteak berak sendotu egingo zion ahul samartua zuen autoestimua. Zerbaiten abiapuntua ere izan zitekeen, agian.
Plazan jende asko zegoen. Ez zeuden guztiak berari adi, baina bazekien erreparatuko ziotela, denen aurrera irtendakoan. Asko pentsatu barik igo zituen eskilarak eta pauso txikitan iritsi zen agertokiaren erdira. Gabardina barrenean ageri ziren hanka bilutsiek erakarri zuten lehen ilarakoen arreta, eta begira gelditu ziren, zer gertatuko zain.
Eta orduan, bapatean, zas! gabardina erabat ireki eta agerian jarri zuen bere… bloga.
