Errepideak eta kaleak bete dira berriro autoz, joandakoak itzuli diren seinale. Hemen dugu atzera normaltasuna, bere zalaparta eta kabitu ezinekin.
Asko aipatu da aurten jende asko gelditu dela ibarrean, beste urte batzuen aldean. Etorriko dira datu zehatzak inpresio hori berrestera edo zuzentzera.
Aipagarri izan da, nola ez, eguraldia. Abuztukoa izan da benetan sanoa, bero larregi barik eta gauetan fresko. Askok uste du horrelako eguraldiarekin etxean eman daitezkeela oporrik onenak.
Aipagarri, era berean, abuztua bare joan izana politikari dagokionean. Ez da udako sugerik ibili bazterrak nahasten, eta apenas jarri diren kaleak sutan, Getxon edo Donostian.
Aipagarri egin zait aurkitu dudan baikortasuna etorkizun hurbilari buruz. Bereziki animatuta ikusi ditut ibarreko sozialista esanguratsuak, auskalo zer kontatu dien Zapaterok.
Aipatzekoa da egunotan bertan ikusten den zuhurtzia politikarien artean. Oraindik ez da egongo mami handirik, baina giroa zeharo aldatu da urte betetik hona. Alde ederrekoa oraingo Versalles hau orduko oilategiarekin!
Niretzat, ordea, eta barkatu zilborkeria, aipagarriena izaten ari da mahastien oparotasuna. Bikain, ugari eta goiztiar dator mahatsa eta, itxura guztien arabera, aurtengo uzta izan daiteke akordurakoa.
Beste horrenbeste opa diet Ibarretxe, Zapatero, Otegi eta enparauei!
