Dordoña Frantziako Akitanian dauden departamentuetatik bat da eta izen bera duen ibaiak zeharkatzen du. Bordeletik 70 bat kilometrora dago. Autoz, ordubetera.
Oso eskualde turistikoa da. Izan ere, bertan dira Frantziako herri ederrenetariko batzuk, hala nola: Bergerac, Sarlat, Mompazier, Domme, Limeuil, Belvès…
Arkitekturaz gainera, paisaia polita du. Lau samarra izan arren, Dordoña ibaiaren ibarra muinoz beteta dago. Bizikletan eta kayaken ibiltzeko aprosa da.
Dordoñako gastronomia ere erakargarria da. Ahatea eta foie oso ondo prestatzen dituzte. Perretxiko, onddo eta trufa asko dago. Eta, ardoa gustatuz gero, bertan egiten dira Frantziako ardo ezagunenetako batzuk.
Hitz gutxitan esanda, gure artean oso ezaguna ez bada ere, bisitatzeko moduko tokia da.
Hemen duzu aurten Dordoñan ateratako argazki bilduma txiki bat.
atauri
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak. Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez. Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da. Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.