Zarimutz Eskoriatzan dago, herri gunetik hiruzpalau kilometrora, eta Leintz-Gatzarekin mugakide da. Gaur egun 60 bat biztanle ditu.
Auzoko eliza oso polita da. Bertan antigualeko konfesionario bat dago eta sakristian meza-jantziak txukun-txukun gordetzen dituzte.
Kanpandorrean hiru ezkila daude. Kanpai handiak hizki batzuk dauzka, erdi ezabatuta, eta ezin da irakurri testua. Bigarren kanpaiak bi zulo dauzka, gerra zibilean bala batek egindakoak. Kanpai txikia, berriz, Gasteizen eginda dago, Muruaren alargunaren tailerrean. Bertan, testu hau ageri da, erderaz: “Soy el ángel que del alto anuncia Maria Gratia Plena.”
Bestalde, Zarimuzko elizako erloju zaharra 1807an egindakoa da, bertan itsatsita daukan plaka baten ageri den moduan. Miguel Josef de Ezcurrak egin zuen, Leintz-Gatzagan egin ere. Geroago, berriz, 1953an Jose Agiriano Garrok konpondu zuen. Aspaldiko urteotan, ordea, Ricardo Segurak zaintzen du erloju hori.
Hona hemen Zarimutz elizateko hainbat argazki.
atauri
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak. Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez. Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da. Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.