Urrian sartu garela eta, egun gutxi geratzen dira Maritxu Kajoitarako. Baten bat traje bila hasita egongo da honezkero. Komisiñuak, berriz, betiko lepotik burua, etxeko lanak eginda, aurtengo egitaraua kaleratu du, eta Arrasate Rugby Taldeari eman dio Maritxu Kajoiren enbutua.
Urtero Komisiñuak eskerrak ematen dizkie jaia aurrera eramaten laguntzen dioten taberna, jatetxe eta komertzioentzei, oso testu polita erabiliz eman ere. Ba, testu hori plagiatuaz, parrandazaleei ere eskerrak eman beharko lizkiekela iruditzen zait, izan ere, “eskapularixua, kartela, mirarixa… danak die biherrezkuak, baina ezinbestekuak zeuek zarie, parrandazaleok!”.
Ni neu ere, urtero moduan, lanean hasita nago eta aspaldiko urteotako argazki sorta handi bat aukeratu dut festa berotze aldera. Bitartean hemen duzu 2009-2023 urteetako argazki-sorta, kuxkuseatu nahi baduzu ere.
atauri
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak. Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez. Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da. Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.
