Aspaldiko urteotan moduan, aurten ere gora-behera handiko eguraldia egiten ari da. Sekula baino bero gehiago egiten du; euria, berriz, gutxiago, eta,egiten duenean, euri-erauntsi handiak egiten ditu. Klima aldaketa omen.
Lanbroa egiten ere badaki, ordea. Asteotan, esaterako, eguraldi goibela izan dugu, lanbrotsua. Goietan behelainoa eta euri langarra egin digu. Eguraldi ona, oso ona zenbaitentzat. Jose Antonio Artzek maite zuen eguraldia, “Gure bazterrak” poema idaztera bultzatu zuen eguraldia, alegia.
Maite ditut,
maite,
geure bazterrak
lanbroak
izkutatzen dizkidanean,
zer izkutatzen duen
ez didanean ikusten
uzten
orduan hasten bainaiz
izkutukoa…
nere barruan bizten diren
bazter miresgarriak
ikusten.
Hemen duzu argazki sorta bat, behelainoa protagonista duena. Eta hemen beste bat, orain bi urtekoa.
atauri
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak. Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez. Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da. Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.