Hilabete pasa da Urmuga amaitu zela, eta ematen du aspaldiko kontu bat dela. Izan ere, gero eta bizkorrago pasatzen da denbora, edo hala iruditzen zait niri, behintzat.
Aurtengo Urmugako etapa guztiak politak baziren ere, ezin denak egin, hemeretzi egun mendian egiteko sasoian egon beharra dago eta. Aukeratu egin behar, beraz.
Egin nituen sei etapetatik bi etxetik gertu egin nituen: Aramaixokoa eta Oñatikoa, biak ere politak. Hurrengo biak ere ederrak izan ziren, eta gogorrak ere bai: Belate-Saioa eta Saioa-Urkiaga, batetik eta, Urkiaga-Orreaga, bestetik. Beste biak, Urmugako azken biak aukeratu nituen: Larraine-Belagoa eta Lintza-Hiru Erregeen Mahaia.
Errepikatzeko moduko esperientzia polita.
atauri
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak. Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez. Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da. Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.
