Udalaitz da Arrasateko gailurrik ezagunena eta arrasatearrek gehien maite dutena. Aspaldi honetan, gainera, asteburuetan zein astegun buruzurietan, beti aurkituko duzu norbait mendi buelta bat egiten.
Ederra eta gogorra izateaz gainera, ikuspegi apartak dauzka Udalaitzek. Alde batera, Anboto eta Orixol. Bestera, berriz, Kurtzebarri, Orkatzategi eta Aloña. Kostaldera ere, mendi andana: Oiz, Izarraitz, Ernio, Txindoki, Beriain… Zein baino zein ederragoa.
Aste honetan, aspaldiko partez, Udalaitz igo dut Felipe Uriarterekin batera. Eta bueltatzekotan geratu gara, bizkar edo haitzen bat igotzeko.
Hona hemen Udalaitz mendian egindako ibilaldian Felipek eta biok ateratako argazkiak.
atauri
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak. Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez. Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da. Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.
