Ohituta gaude kapitalismoaren zurrunbilo gizajale honen aurka altxatzen diren punk taldeak ezagutzera, baina agian gehiago kostatzen zaigu imajinatzea gaurko Txina komunistan burua (gandorra eta guzti) agertzera ausartzen den talde anarkista bat. Horixe da Brain Failure, 90. hamarkadan Beijingen jaiotako banda. Diotenez, Maoren herrian mohikana buruan zutela kaleratzen ausartu ziren lehenetarikoak.
Harrezkero ez dute etenik izan, eta The Clash, Sex Pistols edo Ranciden haziak harresi handiaren bestaldean landatu ondoren, harresia bera gainditu eta hainbat herrialdetatik ibili dira jo eta su. Ez dakit gaur egun Txinako adierazpen askatasunaren osasuna zelan dabilen (gure inguruko egoera ikustea nahikoa da goragaleak jota ibiltzeko), baina mutil hauek mozorrorik gabe jaurtitzen dituzte euren mezu politikoak, mandarinez zein ingelesez. Hona hemen adibidetxo batzuk…
Eta ea honen soinuen atzetik zein talde identifikatzeko gai zareten (kontuz, bertsio bat baino gehiago egin da, eta agian hau benetako bertsioa izateko libreegia da, punka bera legez):
Txinatar lagunen bat baduzue, badakizue handik ekartzeko zer eskatu, hemen topatzea zailtxoa izango baituzue. Dena dela, aMuleri esker gauza asko eskura daiteke gaur egun…
