Dirudienez, egile eskubidearen gaineko eztabaida zabaltzen eta barneratzen doa gizartean, eta albiste onena da azken boladan hainbat auzitegi izan direla SGAEren jardun mafiosoa kolokan jarri dituztenak. Horri buruzko azken albistea gaur jaso dute hainbat komunikabidek, eta Bartzelonako epaitegietatik dator. Han, Barrapunto-n lehenago, eta bestelako komunikabideetan ondoren irakurri dudanez, epaile batek zalantzan jarri du SGAEk informatika dendei kobratzen dien sari edo kanonaren bidezkotasuna, batez ere, saltzen diren CD edo DVDak babesik gabeko informazioa gordetzeko denetan. Denok dakigu egun leku gehienetan kobratzen zaizkigun kanon horiek itsuak direla, ez dutela bereizten emango zaien erabilera, eta denoi suposatzen zaigula delitua, erruduntasun presuntzioa dela araua, alegia.
Azken boladan SGAEren gehiegikeriei aurre egiteko iritsi den beste bat EXGAE izan da, eurek dioen legez, herritarrak SGAE eta bestelako kudeaketa erakundeen gehiegikerietatik askatzen espezializatutako lehenengo lege aholkularitza. Haren asmoa kultura zabaltzeko bestelako filosofien alde egitea da. Ez da gutxi, egungo monopolio pribatu horiei mugak jartzen hasteko.
Guda ez dago irabazita, baina mugimendua indartzen ari da…
