Azken egunotan eztabaida interesgarri batean parte hartzen ari naiz. Orain arte Flickr niretzat gertukoei Marta eta bion argazkiak erakusteko leku eroso bat baino ez zen, baina Interneten maiz gertatzen den legez, haren bitartez espero ez nuen jendea hasi naiz (birtualki) ezagutzen eta argazkien bitartez batzuek salaketarako eta pentsamendu askearen aldarrikapenerako egiten duten lanetara hurbiltzen.
Gail Oreinstein da aldarrikapena eta artea lotuz kontzientziak astintzen dabiltzan horietariko bat, eta haren lanari jarraituz kezka batzuk areagotu zaizkit.
Denok dakizkigu, edo susma ditzakegu, sarea kontrolatzeko batzuek izan ditzaketen interesak. Horretan beste atal batean aipatzen dudan Gilen Ateak ospetsuak zeresan handia dauka, bere MS sistemak beti interes “handien” mesedetan jarriz, AEBren eta kapitalismo basatiaren txakur jagole leiala.
Dirudienez, antzeko zerbait gertatzen da Yahoo-rekin eta haren atala den Flickr-ekin. Azken boladan ikusi ahal izan dut zelan bertako hainbat erabiltzaile joan diren euren kontuak galtzen, zelan izan diren ezabatuak, Flickr-en “politikaren” aurkako erabilerak egiteagatik. Kasu batzuetan, hain zuzen ere, politikagatik, eta ez argitaratzen zituzten argazkiengatik.
Hori gertatu zitzaion nik inondik ezagutzen ez nuen Gail Oreinsteini, orain itzuli dena bere lanari jarraipena emateko prest. Argazki batzuk probokatzailetzat har daitezke, beste batzuk baten batek lizuntzat hartuko ditu, baina Yahoo-ren agintariak deserosoen sentiarazi dituenak argazkiekin batera idazten dituen testuak dira. Agintari horietako baten esanetan, alde batetik, Gailen argazkiek mutil gazteak “kitzikatzen” ditu, eta hori ez ei da ona. Gorputz biluzi batek kitzikatua izatea ez dakit noiztik ez den ona, baina tira. Horregatik balitz, Flickr-eko hamaika erabiltzaile desagerrarazi behar lituzkete, ez direlako gutxi eduki asmo benetan pornografikoa dutenak. Baina horiek bertan diraute. Emakumea objektutzat tratatzea ez dago txarto ikusita Flickr-en. Horren adibide, Flickr China-ren politika: kudeatzaile bat kaleratu berri dute Flcikr China berriak ez ei dituelako pirtzindun aurpegiak gogoko, pirtzindun aluekin batere arazorik ez duen bitartean.
Zelako arriskua!
Baina mamitsuena beste alde batetik dator: Yahoo-ren agintari berberaren esanetan, Gailen testuek pentsaraz dezakete “Bush gaiztoa dela” eta “Irakeko gerra ez dela ona”. Eta holakoak ezin dituzte onartu. Horregatik da Gail arriskutsua.
Are gehiago: irakurri dudanagatik, Yahoo lako zerbitzuetan nahikoa da Israel ozenkiegi kritikatzea ezabatua izateko. Judutarren eragin taldeen boterea noraino iristen den beharbada inoiz ezagutuko ez dugun errealitatea da.
Ezagutzen ez dugun antzeko zenbat kasu ote dago hain askea dirudien sarean? Arakatu eta harritu egingo zarete. Zein da mundu honetako askatasunaren benetako etsaia? Gero esango dugu ezdakitnon adierazpen askatasuna arriskuan dagoela…
